Iti maudi a rabii a kadua ni Jesus dagiti apostol, imbagana: “Kalpasan a mapagungarak, umun-unaakto ngem dakayo a mapan idiay Galilea.” (Mateo 26:32; 28:7, 10) Adu kadagiti pasurotna ti napan idiay Galilea, ngem ania ti aramidenda sadiay?

Naminsan, imbaga ni Pedro kadagiti innem nga apostol: “Innak agkalap.” Simmungbatda: “Sumurotkami.” (Juan 21:3) Awan ti nakalapanda iti nagpatnag. Idi parbangonen, adda ni Jesus iti igid ti baybay, ngem saanda a nabigbig. Impukkaw ni Jesus: “Gagayyem, adda kadi aniaman a kanenyo?” Kinunada: “Awan!” Kinuna ni Jesus: “Iwayatyo ti iket iti makannawan ti bangka ket adda maalayo.” (Juan 21:5, 6) Nagadu ti naalada nga ikan ket saandan a kabaelan a guyoden ti iketda.

“Isu dayta ti Apo!” kinuna ni Juan ken Pedro. (Juan 21:7) Dagus nga insuot ni Pedro ti makinruar a kawesna, ta inuksobna dayta idi agkalkalap. Timmapuak iti baybay ket naglangoy iti agarup 90 a metro a mapan iti takdang. Simmurot ti dadduma a guyguyodenda ti iket a napno iti ikan.

Idi nakadanonda iti igid, nakitada nga adda “beggang ken dagiti matuntuno nga ikan ken adda met tinapay.” Kinuna ni Jesus: “Ikkandak iti sumagmamano nga ikan a kaal-alayo.” Insang-at ni Pedro ti iket, nga addaan iti 153 a dadakkel nga ikan! “Umaykayo mamigaten,” kinuna ni Jesus. Awan ti nakaitured kadakuada a nagsaludsod: “Asinoka?” ta ammoda a ni Jesus dayta. (Juan 21:9-12) Daytoy ti maikatlon a panagparang ni Jesus kadagiti adalan.

Inikkan ni Jesus ti tunggal maysa iti ikan ken tinapay. Kalpasanna, mabalin a kitkitaenna dagiti naalada nga ikan idi insaludsodna: “Simon nga anak ni Juan, ay-ayatennak kadi nga ad-adda ngem kadagitoy?” Napatpateg kadi ken Pedro ti panagkalap ngem ti ipapaaramid ni Jesus kenkuana? Simmungbat ni Pedro: “Wen, Apo, ammom nga ay-ayatenka.” Gapuna, kinuna ni Jesus kenkuana: “Pakanem dagiti babassit a karnerok.”—Juan 21:15.

Insaludsod manen ni Jesus: “Simon nga anak ni Juan, ay-ayatennak kadi?” Nalabit mariribukan, serioso a simmungbat ni Pedro: “Wen, Apo, ammom nga ay-ayatenka.” Impaganetget ni Jesus kenkuana: “Ipastoram dagiti babassit a karnerok.”—Juan 21:16.

Maikatlon nga insaludsod ni Jesus: “Simon nga anak ni Juan, ay-ayatennak kadi?” Nalabit napanunot ni Pedro nga agduadua ni Jesus iti kinamatalekna isu a sipapasnek a simmungbat: “Apo, ammom ti amin a banag; ammon nga ay-ayatenka.” Impaganetget manen ni Jesus ken Pedro ti masapul nga aramidenna: “Pakanem dagiti babassit a karnerok.” (Juan 21:17) Wen, dagiti mangidadaulo masapul nga agserbida kadagiti agbalin a paset ti arban ti Dios.

Naaresto ken napapatay ni Jesus ta intungpalna ti trabaho nga impaaramid ti Dios kenkuana. Imbagana a kastanto met ti mapasamak ken Pedro. “Idi ubingka pay,” kinuna ni Jesus, “kabaelam ti agbado a bukbukodmo ken mapanka iti sadinoman a kayatmo. Ngem inton lumakayka, iyunnatmo ta imam ket sabali ti mangbado kenka ken ipannaka iti saanmo a kayat a papanan.” Kinuna ni Jesus kenkuana: “Itultuloymo ti sumurot kaniak.”—Juan 21:18, 19.

Kinita ni Pedro ni apostol Juan ket insaludsodna: “Apo, anianto met ti mapasamak kenkuana?” Wen, anianto ti mapasamak iti apostol nga ipatpateg ni Jesus? Simmungbat ni Jesus: “No pagayatak nga agtultuloy nga agbiag agingga iti iyaayko, apay a pakaseknam?” (Juan 21:21-23) Masapul a suroten ni Pedro ni Jesus a saan a madanagan iti aramiden ti dadduma. Ngem impakita ni Jesus a napapaut ti biag ni Juan ngem ti dadduma nga apostol ket maikkanto iti sirmata maipapan iti panagturay ni Jesus iti Pagarian.

Siempre, adu pay ti inaramid ni Jesus, a saan a malaon ti adu a lukot no maisurat pay.