Na nkokila ya nsuka yina Yezu lutisaka ti bantumwa na yandi, yandi songaka bo nde: “Ntangu mono ta futumuka, mono ta kwenda na ntwala na beno na Galilea.” (Matayo 26:32; 28:7, 10) Ntangu yai, balongoki mingi ke kwenda na Galilea; kansi nki bo ta sala kuna?

Na ntangu mosi buna, Piere me songa bantumwa ya nkaka sambanu nde: “Mono ke kwenda kuloba.” Bo yonso sambanu me tuba nde: “Beto ke kwenda ti nge.” (Yoane 21:3) Bo me loba mpimpa ya mvimba kansi bo me kanga ve ata mbisi mosi. Ntangu suka ke zola kutana, Yezu me monana na dibungu kansi bo me bakisa ve kana yo kele nani. Yandi me tuba na ndinga ya ngolo nde: “Bana, keti beno kele ti kima ya kudia?” Bo me songa yandi nde: “Ve!” Yezu me songa bo nde: “Beno losa bukondi na diboko ya kitata ya maswa mpi beno ta kanga ndambu ya bambisi.” (Yoane 21:5, 6) Bo me kanga bambisi mingi kibeni, nkutu bo ke kuka ve kubenda bukondi na bo.

Yoane me songa Piere nde: “Yo kele Mfumu!” (Yoane 21:7) Na mbala mosi, Piere me lwata lele na yandi ya zulu, sambu yandi vandaka ve kulwata yo kana bo ke loba. Yandi me kudilosa na nzadi-mungwa mpi me kasa kiteso ya bametre 90 tii na dibungu. Balongoki ya nkaka yina kele na maswa ya fioti me landa malembe-malembe mpi bo ke benda bukondi yina me fuluka ti bambisi.

Ntangu bo me kuma na mukidi, bo me mona “tiya ya makala . . . ti mbisi na zulu na yo, mpi dimpa.” Yezu me songa bo nde: “Beno kwisa kunata ndambu ya bambisi yina beno me katuka kukanga.” Piere me benda bukondi mpi yo kele ti bambisi ya nene 153. Yezu me songa bo nde: “Beno kwisa kudia.” Kansi, ata longoki mosi ve kele ti kikesa ya kuyula yandi nde: “Nge kele nani?” sambu bo me bakisa nde yo kele Yezu. (Yoane 21:10-12) Yai kele mbala ya tatu yina Yezu me monana na balongoki na yandi ntangu bo kele mingi.

Yezu me pesa konso longoki dimpa mpi mbisi sambu na kudia. Na nima, ziku yandi me tala bambisi yina bo me kanga mpi me yula nde: “Simoni mwana ya Yoane, keti nge ke zolaka mono kuluta yai?” Keti Piere ke zolaka mingi kisalu na yandi ya kuloba kuluta kisalu yina Yezu ke zola nde yandi sala? Piere me songa yandi nde: “Ee, Mfumu, nge me zaba nde mono ke zolaka nge.” Yezu me longisila yandi nde: “Disa bana-mameme na mono.”—Yoane 21:15.

Yezu me yula yandi diaka nde: “Simoni mwana ya Yoane, keti nge ke zolaka mono?” Ziku yo me yangisa Piere, yo yina yandi me songa Yezu na masonga yonso nde: “Ee, Mfumu, nge me zaba nde mono ke zolaka nge.” Yezu me songa yandi diaka nde: “Gungula mameme na mono ya fioti.”—Yoane 21:16.

Na mbala ya tatu, Yezu me yula yandi nde: “Simoni mwana ya Yoane, keti nge ke zolaka mono?” Ziku na mbala yai, Piere me kudiyula sambu na nki Yezu kele ti baketi-keti sambu na kwikama na yandi. Yandi me wa mawa mpi me songa Yezu nde: “Mfumu, nge me zaba mambu yonso; nge me zaba nde mono ke zolaka nge.” Yezu me tubila diaka kisalu yina Piere fwete sala; yandi me songa yandi nde: “Disa mameme na mono ya fioti.” (Yoane 21:17) Ya kieleka, bankengi fwete sadila bantu yina ke kwisa na kibuka ya Nzambi.

Bambeni kangaka Yezu mpi fwaka yandi sambu yandi vandaka kusala kisalu yina Nzambi pesaka yandi. Ntangu yai, yandi me monisa nde diambu ya mutindu mosi ta kumina Piere. Yezu me tuba nde: “Ntangu nge vandaka leke, nge vandaka kulwata nge mosi mpi kukwenda kisika ya nge vandaka kuzola. Kansi ntangu nge ta nuna, nge ta tandula maboko na nge mpi muntu ya nkaka ta lwatisa nge ebuna yandi ta nata nge kisika nge me zola ve.” Kansi, Yezu me siamisa yandi nde: “Fula kulanda mono.”—Yoane 21:18, 19.

Piere me mona ntumwa Yoane mpi me yula Yezu nde: “Mfumu, ebuna muntu yai?” Ya kieleka, luzingu ya ntumwa yai ya Yezu vandaka kuzola mingi ta vanda nki mutindu na bilumbu ke kwisa? Yezu me songa Piere nde: “Kana luzolo na mono kele nde yandi bikala tii kuna mono ta kwisa, yo me tala nge na inki?” (Yoane 21:21-23) Piere fwete landa Yezu kukonda kudiyangisa na mambu yina bantu ya nkaka ke sala. Ata mpidina, Yezu me monisa nde Yoane ta zinga mingi kuluta bantumwa ya nkaka mpi yandi ta mona mbona-meso ya ke tubila kukwisa ya Yezu na kiyeka ya Kimfumu.

Ya kieleka, Yezu me salaka mambu mingi kuluta yina bo me sonikaka na barulo.