Ũtukũ wake wa mũico hamwe na atũmwo ake, Jesu aamerĩte ũũ: “Thutha wa kũriũkio, nĩ ngaathiĩ Galili mbere yanyu.” (Mathayo 26:32; 28:​7, 10) Rĩu arũmĩrĩri ake aingĩ magathiĩ Galili, no hihi mathiĩ gwĩka atĩa kuo?

Gũgakinya handũ Petero akeera atũmwo acio angĩ atandatũ ũũ: “Ndathiĩ gũtega thamaki.” Othe atandatũ makoiga: “Tũgũthiĩ nawe.” (Johana 21:3) Makaga kũnyita kĩndũ ũtukũ wothe. Kũrorete gũkĩa, Jesu akamoimĩrĩra rũteere-inĩ, no makaga kũmũmenya. Jesu akamoria ũũ: “Ciana ici, hihi mũrĩ na kĩndũ gĩa kũrĩa?” Makamũcokeria: “Aca!” Nake Jesu akameera: “Ikiai neti mwena wa ũrĩo wa gatarũ na nĩ mũkũnyita kĩndũ.” (Johana 21:​5, 6) Makanyita thamaki nyingĩ nginya makaremwo kũgucia neti.

Johana akeera Petero ũũ: “Nĩ Mwathani!” (Johana 21:7) O rĩo Petero agekĩra nguo yake ya igũrũ ĩrĩa ekũrutĩte agĩtega thamaki. Akarũga maĩ-inĩ na agatubĩra mita ta 90 nginya rũteere-inĩ. Acio angĩ makamuuma thutha o kahora marĩ gatarũ-inĩ magucĩtie neti ĩiyũire thamaki.

Makinya rũteere-inĩ, ‘makona mwaki wa makara na thamaki cigĩrĩirũo igũrũ rĩaguo na hau harĩ na mũgate.’ Jesu akameera atĩrĩ: “Rehei thamaki imwe cia icio mwanyita.” Petero akagucia neti ĩyo ĩrĩ na thamaki 153 nene! Jesu akameera: “Ũkai mwĩgagũre.” Gũtirĩ o na ũmwe wao ũrĩ na ũmĩrĩru wa kũmũũria, “Wee nĩwe ũ?” tondũ nĩ maramenya atĩ nĩ Jesu. (Johana 21:​9-12) Rĩrĩ nĩrĩo riita rĩake rĩa gatatũ kuumĩrĩra arutwo marĩ gĩkundi.

Jesu akamahe o mũndũ mũgate na thamaki marĩe. Thutha ũcio hihi arorete thamaki icio manyita, akoria: “Simoni mũrũ wa Johana, nĩ ũnyendete gũkĩra ici?” Hihi Petero nĩ endete biacara ya gũtega thamaki gũkĩra wĩra ũrĩa Jesu arenda arute? Petero agacokia akoiga: “Ĩĩ nĩ ngwendete Mwathani, wee nĩ ũĩ nĩ ngwendete.” Nĩ ũndũ ũcio Jesu akamwĩra ũũ: “Heaga tũgondu twakwa gĩa kũrĩa.”​—Johana 21:15.

Jesu akamũũria o rĩngĩ: “Simoni mũrũ wa Johana, nĩ ũnyendete?” Petero agacokia ũũ hihi atukanĩirũo: “Ĩĩ nĩ ngwendete Mwathani, wee nĩ ũĩ nĩ ngwendete.” Jesu akamwĩra o rĩngĩ: “Rĩithagia tũgondu twakwa.”​—Johana 21:16.

Jesu akamũũria riita rĩa gatatũ: “Simoni mũrũ wa Johana, nĩ ũnyendete?” No gũkorũo rĩu Petero nĩ ararigwo kana Jesu nĩ gwĩkĩrĩra arekĩrĩra nganja wĩhokeku wake. Petero akamwĩra ũũ atĩtĩrithĩtie: “Mwathani, wee nĩ ũĩ maũndũ mothe; nĩ ũĩ nĩ ngwendete.” O rĩngĩ Jesu akeera Petero ũrĩa agĩrĩirũo gwĩka akoiga: “Heaga tũgondu twakwa gĩa kũrĩa.” (Johana 21:17) Kwoguo arĩa maratongoria rũũru rwa Ngai nĩ magĩrĩirũo gũtungatĩra arĩa marĩ thĩinĩ waruo.

Jesu aanyitirũo na akĩũragwo tondũ nĩ aarutire wĩra ũrĩa Ngai aamũtũmĩte arute. Rĩu akonania atĩ o nake Petero angĩgakua na njĩra ta ĩyo. Akoiga: “Rĩrĩa warĩ mũnyinyi, nĩwe weĩkĩraga nguo na ũgathiĩ kũrĩa ũkwenda. No wakũra, ũgaatambũrũkagia moko mũndũ ũngĩ agagwĩkĩra nguo agacoka agagũtwara kũrĩa ũtarenda.” O na kũrĩ ũguo, Jesu akamwĩra: “Thiĩ na mbere kũnũmĩrĩra.”​—Johana 21:​18, 19.

Petero akona mũtũmwo Johana akoria: “Mwathani, ĩ nake mũndũ ũyũ?” Hihi kũngĩgathiĩ atĩa harĩ mũtũmwo ũcio Jesu endete mũno? Jesu agacokia atĩrĩ: “Angĩkorũo nĩ wendi wakwa aikare nginya ngaacoka-rĩ, ũndũ ũcio ũragũthĩnia nĩkĩ?” (Johana 21:​21-23) Petero agĩrĩirũo kũrũmĩrĩra Jesu atekũmakio nĩ ũrĩa arĩa angĩ mareka. Ningĩ, Jesu aronania atĩ Johana egũtũũra mĩaka mĩingĩ kũrĩ atũmwo acio angĩ na nĩ angĩkonio kĩoneki kĩa Jesu agĩũka arĩ Mũthamaki.

Ma nĩ atĩ harĩ maũndũ maingĩ Jesu eekire, na maangĩandĩkirũo, gũtirĩ mabuku mangĩaiganĩire.