ជំពូកទី១៣៦
នៅឆ្នេរសមុទ្រកាលីឡេ
-
លោកយេស៊ូលេចមកនៅឆ្នេរសមុទ្រកាលីឡេ
-
ពេត្រុសនិងអ្នកកាន់តាមឯទៀតត្រូវឲ្យចំណីដល់ចៀម
នៅល្ងាចចុងក្រោយជាមួយនឹងពួកសាវ័ក លោកយេស៊ូបានមានប្រសាសន៍ថា៖ «ក្រោយពីខ្ញុំបានត្រូវប្រោសឲ្យរស់ឡើងវិញ ខ្ញុំនឹងទៅស្រុកកាលីឡេហើយរង់ចាំអ្នករាល់គ្នានៅទីនោះ»។ (ម៉ាថាយ ២៦:៣២; ២៨:៧, ១០) ឥឡូវនេះ អ្នកកាន់តាមជាច្រើននាក់ធ្វើដំណើរទៅស្រុកកាលីឡេ ប៉ុន្តែតើពួកគេនឹងធ្វើអ្វីនៅទីនោះ?
មានពេលមួយ ពេត្រុសនិយាយទៅកាន់សាវ័ក៦នាក់ទៀតថា៖ «ខ្ញុំនឹងទៅនេសាទត្រី»។ សាវ័កទាំង៦នាក់ឆ្លើយថា៖ «យើងក៏ទៅជាមួយនឹងអ្នកដែរ»។ (យ៉ូហាន ២១:៣) ប៉ុន្តែ ពេញមួយយប់ពួកគាត់ចាប់ត្រីមិនបានសោះ។ ឥឡូវនេះមេឃជិតភ្លឺហើយ លោកយេស៊ូក៏លេចមកនៅឆ្នេរសមុទ្រ តែពួកសាវ័កមិនស្គាល់ថាលោកជាអ្នកណាទេ។ លោកយេស៊ូមានប្រសាសន៍ទៅពួកគាត់ថា៖ «កូនៗអើយ! អ្នករាល់គ្នាគ្មានអ្វីបរិភោគទេ មែនទេ?»។ ពួកគាត់ឆ្លើយថា៖ «បាទ!»។ ដូច្នេះ លោកយេស៊ូប្រាប់ពួកគាត់ថា៖ «ចូរទម្លាក់អួននៅខាងស្ដាំទូក ហើយអ្នកនឹងរកបាន»។ (យ៉ូហាន ២១:៥, ៦) ក្រោយពីធ្វើតាមអ្វីដែលលោកមានប្រសាសន៍ ពួកគាត់ចាប់បានត្រីសន្ធឹកណាស់ រហូតដល់ពួកគាត់មិនអាចទាញអួនឡើងលើទូកវិញបានឡើយ។
នៅពេលនោះ យ៉ូហានប្រាប់ពេត្រុសថា៖ «គឺជាលោកម្ចាស់!»។ (យ៉ូហាន ២១:៧) ភ្លាមនោះ ពេត្រុសពាក់អាវក្រៅរបស់គាត់ ព្រោះគាត់នៅខ្លួនទទេ រួចមកគាត់លោតចុះទៅក្នុងសមុទ្រ ហើយហែលទឹកប្រហែលជាចម្ងាយ៩០ម៉ែត្រទៅឆ្នេរវិញ។ សាវ័កឯទៀតដែលនៅលើទូកបានចែវទូកមកតាមក្រោយយឺតៗ ព្រមទាំងទាញអួនដែលពេញទៅដោយត្រីមកជាមួយផង។
ពេលដែលពួកគាត់មកដល់ឆ្នេរវិញ ពួកគាត់បានឃើញ«រងើកភ្លើងធ្យូងនិងត្រីនៅលើរងើកនោះ ក៏ឃើញមាននំប៉័ងដែរ»។ លោកយេស៊ូមានប្រសាសន៍ថា៖ «ចូរយកត្រីខ្លះដែលអ្នករាល់គ្នាទើបតែចាប់បានមក»។ ពេលនោះ ពេត្រុសទាញអួនដែលពេញដោយត្រីធំៗចំនួន១៥៣ក្បាល! រួចមក លោកយេស៊ូប្រាប់ពួកគាត់ថា៖ «អញ្ជើញមកបរិភោគ»។ ប៉ុន្តែគ្មានពួកគាត់ណាម្នាក់ហ៊ានសួរលោកថា៖ «តើអ្នកជាអ្នកណា»ទេ ពីព្រោះពួកគាត់ដឹងថាគឺជាលោកយេស៊ូ។ (យ៉ូហាន ២១:៩-១២) នេះគឺជាលើកទី៣ដែលលោកយេស៊ូលេចមកឲ្យពួកអ្នកកាន់តាមឃើញជាក្រុម។
លោកយេស៊ូចែកត្រីនិងនំប៉័ងឲ្យពួកគាត់ម្នាក់ៗបរិភោគ។ បន្ទាប់មក លោកទំនងជាសម្លឹងមើលត្រីដែលពួកសាវ័កចាប់បាន រួចសួរស៊ីម៉ូនពេត្រុសថា៖ «ស៊ីម៉ូន កូនយ៉ូហាន តើអ្នកស្រឡាញ់ខ្ញុំច្រើនជាងអ្វីៗទាំងនេះទេ?»។ លោកយេស៊ូប្រហែលជាចង់ដឹងថា តើពេត្រុសចូលចិត្តកិច្ចការនេសាទជាងកិច្ចការដែលលោកចង់ឲ្យគាត់ធ្វើឬ? ពេត្រុសឆ្លើយទៅលោកថា៖ «បាទ លោកម្ចាស់ លោកជ្រាបហើយថាខ្ញុំស្រឡាញ់លោក»។ ដូច្នេះលោកយេស៊ូនិយាយទៅកាន់គាត់ថា៖ «ចូរឲ្យចំណីដល់កូនចៀមរបស់ខ្ញុំ»។—យ៉ូហាន ២១:១៥
លោកយេស៊ូសួរពេត្រុសម្ដងទៀតថា៖ «ស៊ីម៉ូន កូនយ៉ូហាន តើអ្នកស្រឡាញ់ខ្ញុំទេ?»។ ពេត្រុសប្រហែលជាងឿងឆ្ងល់ការដែលលោកសួរគាត់ម្ដងទៀត។ ប៉ុន្តែ គាត់ឆ្លើយយ៉ាងស្មោះថា៖ «បាទ លោកម្ចាស់ លោកជ្រាបហើយថាខ្ញុំស្រឡាញ់លោក»។ ស្រដៀងមុនដែរ លោកយេស៊ូប្រាប់គាត់ថា៖ «ចូរឃ្វាលចៀមតូចៗរបស់ខ្ញុំ»។—យ៉ូហាន ២១:១៦
លោកយេស៊ូសួរគាត់ជាលើកទី៣ថា៖ «ស៊ីម៉ូន កូនយ៉ូហាន តើអ្នកស្រឡាញ់ខ្ញុំទេ?»។ ឥឡូវពេត្រុសប្រហែលជាឆ្ងល់ថា លោកយេស៊ូកំពុងសង្ស័យចំពោះចិត្តស្មោះភក្ដីរបស់គាត់ទេដឹង។ ដូច្នេះ គាត់ឆ្លើយយ៉ាងប្រាកដប្រជាទៅកាន់លោកយេស៊ូថា៖ «លោកម្ចាស់ លោកជ្រាបនូវអ្វីៗទាំងអស់ លោកជ្រាបហើយថាខ្ញុំស្រឡាញ់លោក»។ រួចមក លោកយេស៊ូបញ្ជាក់ម្ដងទៀតអំពីអ្វីដែលពេត្រុសត្រូវធ្វើ ដោយមានប្រសាសន៍ថា៖ «ចូរឲ្យចំណីដល់ចៀមតូចៗរបស់ខ្ញុំ»។ (យ៉ូហាន ២១:១៧) ពិតណាស់ អស់អ្នកដែលនាំមុខក្នុងអង្គការរបស់ព្រះ ត្រូវបម្រើអ្នកដែលបានត្រូវទាញនាំឲ្យចូលក្នុងក្រោលចៀមរបស់ព្រះ។
លោកយេស៊ូត្រូវគេចាប់ចងនិងប្រហារជីវិត ដោយសារលោកបានធ្វើកិច្ចការដែលព្រះបានបង្គាប់លោកឲ្យធ្វើ។ ឥឡូវនេះ លោកបង្ហាញថាពេត្រុសក៏នឹងជួបប្រទះស្ថានភាពស្រដៀងនេះដែរ។ លោកមានប្រសាសន៍ថា៖ «កាលដែលអ្នកនៅក្មេង អ្នកធ្លាប់ស្លៀកពាក់ខ្លួនឯង ហើយដើរទៅកន្លែងណាដែលអ្នកចង់ទៅ។ ប៉ុន្តែពេលដែលអ្នកចាស់ទៅ អ្នកនឹងលាដៃទៅ ហើយបុរសម្នាក់ទៀតនឹងស្លៀកពាក់ឲ្យអ្នក រួចនាំអ្នកទៅកន្លែងដែលអ្នកមិនចង់ទៅទេ»។ ប៉ុន្តែ លោកយេស៊ូក៏បានដាស់តឿនគាត់ថា៖ «ចូរបន្តកាន់តាមខ្ញុំ»។—យ៉ូហាន ២១:១៨, ១៩
ពេលនោះ ពេត្រុសក្រឡេកទៅឃើញសាវ័កយ៉ូហាន ដូច្នេះគាត់សួរលោកយេស៊ូថា៖ «លោកម្ចាស់ ចុះបុរសនេះវិញ?»។ ពេត្រុសចង់ដឹងថា តើសាវ័កសំណព្វចិត្តរបស់លោកយេស៊ូនឹងមានអនាគតបែបណា? លោកយេស៊ូឆ្លើយថា៖ «ប្រសិនបើខ្ញុំមានបំណងប្រាថ្នាឲ្យគាត់នៅរហូតដល់ខ្ញុំមក តើនោះទាក់ទងអ្វីនឹងអ្នក?»។ (យ៉ូហាន ២១:២១-២៣) ដូច្នេះ ពេត្រុសត្រូវកាន់តាមលោកយេស៊ូដោយមិនចាំបាច់បារម្ភថាអ្នកឯទៀតធ្វើអ្វីនោះទេ។ ទោះជាយ៉ាងណាក្ដី លោកយេស៊ូបញ្ជាក់ថាយ៉ូហាននឹងរស់នៅយូរជាងសាវ័កឯទៀត ហើយគាត់នឹងឃើញក្នុងគំនិតនូវការត្រឡប់មករបស់លោកយេស៊ូដែលជាអ្នកគ្រប់គ្រងក្នុងរាជាណាចក្រ។
តាមពិត មានកិច្ចការជាច្រើនដែលលោកយេស៊ូបានធ្វើ សូម្បីតែរមូរច្រើនយ៉ាងណាក៏មិនអាចកត់ទុកកិច្ចការទាំងនោះអស់ដែរ។