Fa busihu bwahae bwa mafelelezo hanaali ni baapositola, Jesu naababulelezi kuli: “Hase nizusizwe kwa bafu, nikaitangeta ku mina kuya kwa Galilea.” (Mateu 26:32; 28:7, 10) Cwale buñata bwa balutiwa bahae baya kwa Galilea, kono habazibi kuli bayo ezañi kwateñi.

Ka nako yeñwi, Pitrosi ubulelela baapositola ba 6 kuli: “Niya kwa kuyamba.” Kaufelaa bona bamualaba kuli: “Ni luna lwaya ni wena.” (Joani 21:3) Bayambile busihu kaufela kono habasika swala litapi. Hase kupatalala, Jesu uiponahaza fa likamba, kono habazibi kuli ki mañi. Jesu uhuwa kuli: “Banana, kana munani za kuca?” Baalaba kuli: “Haluna!” Jesu ubabulelela kuli: “Munepele kanyandi ku la bulyo la sisepe mi mukafumana.” (Joani 21:5, 6) Baswala litapi zeñata hahulu kuli mane bapalelwa nihaiba kuhohela kanyandi ka bona mwa sisepe.

Joani ubulelela Pitrosi kuli: “Ki Mulena!” (Joani 21:7) Kapili-pili Pitrosi uapala siapalo sahae sa fahalimu sanaasika apala hanaayamba. Utulela mwa liwate ni kutapa ka limita zebato ba ze 90. Babañwi babali mwa sisepe, bamulatelela hanyinyani hanyinyani inze bahoha kanyandi kakatezi litapi.

Habafita fa likamba, “babona mulilo ni litapi fateñi ni sinkwa.” Jesu uli: “Hamutise kwa litapi zemusazo swala.” Pitrosi uhoha kanyandi kakanani litapi zetuna ze 153! Jesu uli:“ Hamutahe, muto kushuka.” Hakuna yanani bundume bwa kumubuza kuli, “Ki wena mañi?” kakuli balemuhile kuli ki Jesu. (Joani 21:9-12) Lo ki lwabulaalu Jesu inze aiponahaza kwa balutiwa inze bali sikwata.

Jesu ufa mañi ni mañi wabona sinkwa ni tapi kuli ace. Kihona cwale atalimela kwa litapi zebasweli, mi ubuza kuli: “Simoni mwanaa Joani, kana unilata kufita ze?” Kana Pitrosi ulata hahulu musebezi wa bundui kufita musebezi wabata Jesu kuli aueze? Pitrosi ualaba kuli: “Kucwalo, Mulena, waziba kuli nakulata.” Ka mukwa ocwalo, Jesu umulaela kuli: “Fepa lingunyana zaka.”—Joani 21:15.

Jesu hape ubuza kuli: “Simoni mwanaa Joani, kana wanilata?” Mwendi ka kukomoka, Pitrosi ualaba kuli: “Kucwalo, Mulena, waziba kuli nakulata.” Jesu ubulela nto yeswana hape, uli: “Lisa lingunyana zaka.”—Joani 21:16.

Jesu ubuza hape lwabulaalu, uli: “Simoni mwanaa Joani, kana wanilata?” Cwale mwendi Pitrosi unahana ka za haiba Jesu ukakanya busepahali bwahae. Pitrosi ubulela ka buikolwiso uli: “Mulena, uziba linto kamukana; waziba kuli nakulata.” Jesu hape ubulela zaswanela kueza Pitrosi, uli: “Fepa lingunyana zaka.” (Joani 21:17) Ka niti, babaokamela mwa puteho baswanela kulisa lingu zetaha mwa mulaka wa Mulimu.

Jesu naatamilwe ni kubulaiwa bakeñisa kueza musebezi wanaa mulaezi Mulimu kuli aeze. Mi cwale upatulula kuli Pitrosi ni yena ukashwa ka nzila yeswana. Jesu uli: “Hane uli mwanana, neuitinisanga ili wena ni kuikela kone ulata. Kono hauka supala, ukaotolola mazoho ahao mi mutu yomuñwi uka kutinisa ni kukuisa kousa lati.” Ka mukwa ocwalo Jesu umulaela kuli: “Uzwelepili kunilatelela.”—Joani 21:18, 19.

Pitrosi ubona muapositola Joani mi ubuza kuli: “Mulena, yo yena bo?” Kukaezahalañi ku muapositola yo, yalatwa hahulu ki Jesu yo? Jesu ualaba kuli: “Haiba nilata kuli aine kufitela nitaha, taba yeo ikubilaeza cwañi?” (Joani 21:21-23) Pitrosi uswanela kulatelela Jesu kusina kubilaezwa ki zebaeza babañwi. Nihakulicwalo, Jesu utalusa kuli Joani yena ukapila kufita baapositola babañwi kaufela mi ukafiwa pono yakutaha kwa Jesu mwa maata a Mubuso.

Kaniti, kunani lika zeñata zanaaezize Jesu zesakwani mwa miputo yemiñata.