Yezu wakambila bapostolo mu dilolo diende dia ndekelu ne: “Meme mumane kujudibua, nennudianjidile mu Galela.” (Matayi 26:32; 28:7, 10) Nunku bayidi bende ba bungi badi benza luendu alu, kadi ntshinyi tshivuabu ne bua kuenza mu Galela?

Tshikondo kampanda, Petelo udi wambila bapostolo basambombo ne: “Ndi nya kuloba.” Bonso basambombo bakamuambila ne: “Tuyaya nebe.” (Yone 21:3) Butuku bujima kabavua bakuate mushipa nansha umue to. Padi butuku buenda butshia, Yezu udi umueneka ku muelelu wa mâyi, kadi kabavua bamanye ne: uvua nganyi to. Yezu udi ubabikila ne: “Bana, nudi ne tshintu tshia kudia anyi?” Bakandamuna ne: “Tòo!” Yezu kubambila ne: “Elayi kapamba ku dia balume dia buatu, nenupete ndambu.” (Yone 21:5, 6) Nunku bakakuata mishipa mipite bungi, kupangilabu too ne mua kukoka kapamba kabu.

Yone udi wambila Petelo ne: “M’Mukalenge!” (Yone 21:7) Ke Petelo kuvualaye bilamba biende bia pa mutu, bivuaye kayi muvuale pavuaye uloba. Wakadiela mu mbuu ne kowelaye ntanta wa metre matue ku 90 kuyaye too ne ku muelelu wa mâyi. Bayidi bakuabu bavua mu buatu bavua benda balonda bitekete bitekete, benda bakoka kapamba kavua kuwule ne mishipa.

Pakafikabu ku muelelu wa mâyi “bakamona kapia ka makala ne mishipa mitekapu ne diampa.” Yezu wakamba ne: “Luayi ne ndambu wa mishipa inudi bafume ku dikuata mpindieu.” Petelo wakapulumuna kapamba kavua ne mishipa minene 153. Yezu wakamba ne: “Luayi nudie.” Muntu nansha umue wa kudibu kavua mupete dikima dia kuebeja ne: “Wewe udi nganyi?” to, bualu bavua bajingulule ne: uvua Yezu. (Yone 21:10-12) Eu mmusangu muisatu udiye umuenekela bayidi bende mu tshisumbu.

Yezu wakapesha yonso wa kudibu diampa ne mishipa bua kudiabu. Pashishe wakatangila mishipa ivuabu bakuate, ke kuebejaye ne: “Simona muana wa Yone, udi munnange kupita ebi anyi?” Petelo uvuaku munange bikole mudimu wa kuloba kupita mudimu uvua Yezu musue bua enze anyi? Petelo wakandamuna ne: “Eyowa, Mukalenge, udi mumanye ne: ndi mukunange bikole.” Nunku Yezu wakamuambila ne: “Udiishe bana banyi ba mikoko.”​—Yone 21:15.

Yezu wakebeja kabidi ne: “Simona muana wa Yone, udi munnange anyi?” Petelo wakandamuna ne muoyo mujima ne: “Eyowa, Mukalenge, udi mumanye ne: ndi mukunange bikole.” Yezu wakamupesha diandamuna dimue dimue adi ne: “Ulame mikoko yanyi mikese.”​—Yone 21:16.

Yezu wakebeja musangu muisatu ne: “Simona muana wa Yone, udi munnange bikole anyi?” Mpindieu Petelo udi mua kuikala udiebeja bikala Yezu wela lulamatu luende mpata. Petelo wakamba ne dishindika dionso ne: “Mukalenge, wewe udi mumanye malu onso; udi mumanye ne: ndi mukunange bikole.” Yezu udi uleja kabidi tshidi Petelo ne bua kuenza wamba ne: “Udiishe mikoko yanyi mikese.” (Yone 21:17) Eyowa bana betu badi balombola badi ne bua kulongesha bantu badi babuela mu tshisumbu tshia mikoko ya Nzambi.

Bavua basuike Yezu ne bamushipe bualu uvua muenze mudimu uvua Nzambi mumutume bua kuenza. Mpindieu udi uleja ne: nebenzele Petelo bia muomumue. Yezu udi wamba ne: “Pautshivua muana, uvua uvuala bilamba nkayebe, uya kuonso kuuvua musue. Kadi paudi ukulakaja, newolole bianza biebe ne muntu mukuabu neakuvuadike bilamba, neaye nebe kuudi kuyi musue.” Yezu wakamuambila kabidi ne: “Tungunuka ne kundonda.”​—Yone 21:18, 19.

Petelo udi umona mupostolo Yone, ne udi webeja ne: “Mukalenge, kadi bua muntu eu?” Eyowa, ntshinyi tshivua tshindile mupostolo uvua Yezu munange bikole eu? Yezu wakandamuna ne: “Bingikala musue bua ashale too ne pangalua, mbualu buebe anyi?” (Yone 21:21-23) Petelo uvua ujinga kulonda Yezu kayi uditatshisha bua tshivua bakuabu benza to. Kadi Yezu udi uleja ne: Yone neikale ne muoyo panyima pa lufu lua bapostolo ne neamone mu tshikena kumona Yezu ulua mu bukokeshi bua Bukalenge.

Bushuwa, kuvua malu makuabu a bungi avua Yezu muenze adibu kabayi bafunde mu mivungu to.