Halikumbi lyamakumishilo nachingoloshi shimbu kanda Yesu afwenga, alwezele vaposetolo jenyi ngwenyi: “Omu nangukalinga hivanangusangula lyehi, nangukatetekela kuya kuNgalileya.” (Mateu 26:32; 28:7, 10) Shikaho, vaka-kumukavangiza vavavulu vakatukile nakuya kuchihela kana. Uno navakalinga ika kuNgalileya?

Lwola lumwe, Petulu alwezele vakwavo vaposetolo 6 ngwenyi: “Ami nguli nakuya nakuta vaishi.” Kaha vosena 6 vamukumbulwile ngwavo: “Nayetu natuya nayove.” (Yowano 21:3) Oloze ufuku wosena vapindasanyine, kavakwachile ishi numba umweko. Omu kwalingile hinakuya nakucha, Yesu emanyine kungenge, oloze vakiko kavamwijivileko. Yesu atambakanyine ngwenyi: “Enu vana vami, muliko navyakulya vimwe tahi?” Vakiko vamukumbulwile ngwavo: “Nduma.” Yesu avalwezele ngwenyi: “Fuchilenu lyoji kusali yawato kuchilyo, kaha namujiha vaishi.” (Yowano 21:5, 6) Ngocho vakwachile vaishi vavavulu, kaha kavahashile nakukokela lyoji kutundako.

Yowano alwezele Petulu ngwenyi: “Uze hiMwata!” (Yowano 21:7) Ngocho Petulu avwalile washiwashi uvwalo wenyi wahelu uze kavwalile omu apwile nakuta vaishiko. Kaha alimbilile hakalungalwiji, ahalile kafwe jimita 90 nakuheta kungenge yakalungalwiji. Oloze vakwavo vamukavangijile nawato chikoki chikoki oku vali nakukoka lyoji lize lyazalile navaishi.

Omu vahetele kungenge yakalungalwiji vamwene “kakahya, vanahakeho vaishi nambolo.” Yesu ambile ngwenyi: “Nehenuko vaishi vamwe ava munajihi oholili.” Petulu akokele lyoji lize lyapwile navaishi vavanene 153. Kaha Yesu ambile ngwenyi: “Twayenu mulyaule.” Naumwe wauchi ahamukile kumwihula ngwenyi, “Ove yove iya?” Mwomwo vatachikijile ngwavo apwile Yesu. (Yowano 21:10-12) Aka kakiko kapwile kamuchitatu kusoloka kulizavu lyatumbaji twenyi.

Yesu ahanyine kambaji hikambaji ishi nambolo mangana valyenga. Atalile havaishi vaze vakwachile, kaha ambile ngwenyi: “Ove Shimona mwanaYowano, kutala wanguzanga kuhambakana ava tahi?” Uno Petulu azangile chikuma mulimo wakuta vaishi kuhambakana mulimo uze asakile Yesu kumuhana tahi? Petulu akumbulwile ngwenyi: “Eyo ove Mwata, ove watachikiza ngwove ngwakuzanga.” Ngocho Yesu amulwezele ngwenyi: “Lisanga mikoko jami vavandende.”—Yowano 21:15.

Yesu ahulishile cheka ngwenyi: “Ove Shimona mwanaYowano, kutala wanguzanga tahi?” Pamo Petulu alikomokelele, oloze amukumbulwile kanawa ngwenyi: “Eyo ove Mwata, ove watachikiza ngwove ngwakuzanga.” Yesu amulwezele cheka ngwenyi: “Funganga mikoko jami vavandende.”—Yowano 21:16.

Yesu amuhulishile cheka kamuchitatu ngwenyi: “Ove Shimona mwanaYowano, kutala wanguzanga tahi?” Oloze Petulu pamo ashinganyekele ngwenyi Yesu apwile nakuhuhwasana kulonga chenyi. Petulu ahanjikile hatoma ngwenyi: “Ove Mwata, ove watachikiza vyuma vyosena. Ove watachikiza ngwove, ngwakuzanga.” Yesu ahanjikile cheka vyuma atelele kulinga Petulu, ambile ngwenyi: “Lisanga mikoko jami vavandende.” (Yowano 21:17) Chikupu vene, vaze vanakutwaminyina vakwavo vatela kuzachila mikoko vaze vali nakwiza mulimba lyaKalunga.

Yesu vamukashile nakumujiha mwomwo azachile mulimo uze amutumine Kalunga. Kaha asolwele jino ngwenyi naPetulu mwakalinga vene ngocho. Yesu ambile ngwenyi: “Omu wapwilenga ukanyike, walivwikilenga ove ivene, watambwojokelenga kweshokwo wasakilenga. Oloze omu naukashinakajiwa, naukolola mavoko ove, kaha mutu weka ikiye mwakakuvwika nakukutwala kuze kawasakileko.” Chipwe ngocho Yesu amulwezele ngwenyi: “Ngukavangizenga lika.”—Yowano 21:18, 19.

Petulu amwene kaposetolo Yowano nakumuhulisa ngwenyi: “Ove Mwata, nyi ou nawa ngachilihi?” Eyo, vyuma muka vyakulutwe apwile nakutalilila kaposetolo uze vazangile chikuma kuli Yesu? Yesu ambile ngwenyi: “Kachi nge ngunasake ngwami atwamenga palanga nomu nangukeza, kaha ukalu wove uli halihi?” (Yowano 21:21-23) Petulu atelele kukavangiza Yesu chakuzeneka kulizakamina vyuma navalinga vakwavo. Chipwe ngocho, Yesu asolwele nge Yowano mwakayoya myaka yayivulu kuhambakana vaposetolo vakwavo, kaha nawa mwakamona chakumwenesa kutalisa kukwiza chaYesu muWangana.

Tuyokutuyoku nawa, Yesu alingile vyuma vyavivulu vize kavasonekele mumikanda yayivulu yakuvungako.