Hefuku dakukumishaku namelela hadiñayi nawapostolu indi, Yesu wayilejeli nindi: “Ilaña neyi anansañuli dehi, nakayañahu dehi kuÑaliliya.” (Matewu 26:32; 28:7, 10) Atumbanji twindi amavulu anayi kwenoku, ilaña chumanyi chikwilawu kwenoku?

Mpinji yimu, Petulu naleji apostolu 6 nindi: “Ami nayi nakukwata inshi.” Ejima 6 anamwakuli nawu: “Ninetu tunakuya neyi.” (Yowanu 21:3) Wufuku wejima, anakañanyi kukwata nikakwocha. Chikunakuya nakucha, Yesu namwekani kuchikumu, ilaña wena anamwiluki wanyi. Yesu nayibidiki nindi: “Enu anyana, mudihu nayakuda yidi yejima?” Anamwakuli nawu: “Inehi!” Yesu nayileji nindi: “Lalumwinenu kaleñi kukabadi kawatu kakuchidiilu nawa mukukwata inshi.” (Yowanu 21:5, 6) Anakwati inshi jajivulu nankashi, anakukañanya nikukoka kaleñi.

Petulu anamuleji kudi Yowanu nawu: “Mwanta diyi!” (Yowanu 21:7) Hohenohu, Petulu nanoni chakuvwala chindi chavwalayi hakukwata inshi. Nadumbili hakaluñalwiji nawa naweli nakushika kuchikumu hadi mamita 90. Amakwawu anamulondeli chovu-chovu iku anakukoka kaleñi.

Chinashikiwu kuchikumu, anamoni “kesi kamakala hadi inshi nimankendi.” Yesu nayileji nindi: “Letenuhu inshi jimunakwati.” Petulu nakoki kaleñi, mudi inshi yamaneni 153. Yesu nayileji nindi: “Twayenu mudawuli.” Kwosi niwumu wunahamuki nakumwihula nawu, “Yeyinyi?” muloña aneluki nawu Yesu diyi. (Yowanu 21:10-12) Aka dikamuchisatu kanamwekaniyi kudi atumbanji twindi neyi izanvu.

Yesu nayinki wejima wawu dikendi niinshi kulonda adii. Kuhiñahu, hadaha iku nakutala hamulumba wanshi wunakwatiwu, namwihuli nindi: “Shimona mwana kaYowanu, komana wankeña kubadika iyi?” Komana Petulu nashi muchima kumudimu wakukwata inshi kubadika mudimu wunakukeñayi Yesu nindi azateña? Petulu namwakuli nindi: “Eña Mwanta, weluka neyi nakukeña.” Dichi Yesu namuleji nindi: “Diishaña anyikoku ami anyanya.”—Yowanu 21:15.

Cheñi, Yesu namwihuli nindi: “Shimona mwana kaYowanu, komana wankeña?” Hadaha iku naneñi Petulu namwakuli nindi: “Eña Mwanta, weluka neyi nakukeña.” Yesu namwakuli cheñi chochimu nindi: “Biñaña anyikoku ami anyanya.”—Yowanu 21:16.

Ipampa damuchisatu, Yesu namwihuli nindi: “Shimona mwana kaYowanu, komana wankeña?” Petulu watela nakutoñojoka nindi Yesu hadaha nakumujinoka neyi washinshika. Petulu namwakuli nachineñi nindi: “Mwanta, weluka yuma yejima; weluka neyi nakukeña.” Cheñi, Yesu namuleji Petulu chuma chatela kwilayi nindi: “Diishaña anyikoku ami anyanya.” (Yowanu 21:17) Eña, antu anakulombola atela kukalakelaña anyikoku analetiyi Nzambi.

Yesu amukasili nawa amujahili muloña wazatileña mudimu wamwinkeliwu kudi Nzambi nawu azati. Dichi namwekeshi nindi Petulu niyena dichikamumwekena. Yesu namuleji nindi: “Hiwachidiña kansi, wadiña nakudivwika eyi aweni nikuya kwejima kuwakeñeleña kuya. Ilaña chiwakashinakaja, wakwololaña makasa eyi nawa muntu wacheñi wakakuvwikaña nikukutwala kwejima kuwunabuli kukeña.” Hela chochu, Yesu namukoleshi nindi: “Twalekakuhu kunlondela.”—Yowanu 21:18, 19.

Petulu namumoni kapostolu Yowanu nawa namwihuli nindi: “Mwanta, indi iwu muntu nakukeñadi?” Eña, indi chumanyi chikamumwekena kumbidi kapostolu akeñawu kudi Yesu? Yesu nakuli nindi: “Neyi nakeñi nami atwalekihu kushakama nichinakenza, indi eyi wunakwakamenadi?” (Yowanu 21:21-23) Petulu watela kumulondelaña Yesu chakadi kwakama chikwilawu antu amakwawu. Hela chochu, Yesu nakumwekesha nindi Yowanu wukatwalekahu kuhanda kubadika apostolu amakwawu nawa wakamona chimwenu chakwinza kwaYesu nañovu muWanta.

Kudi yuma yayivulu yakoñeliyi Yesu, yikukañanya kushikila hanyivuñilu yayivulu.