Mu ohiyu awe wookuchula vamoha ni arummwa, Yesu aahaaleela: ‘Nto kavinyà mokhwani, kinarwa koholelani o Galileya.’ (Mateu 26:32; 28:7, 10) Vano oomuchara we ancipale annapaka mukwaha yoowo, nto tiheeni anaphwanelaaya opaka o Kalileya?

Mu elukuluku, Petro onnaaleela arummwa athanu nammoha: “Kinaya ototha ihopa.” Arummwa athanu nammoha oothene annaakhula: “Hiyotho nnamotxhara.” (Yohani 21:3) Ohiyu woothene, awo haphanre echu. Ohaalaka osavo, Yesu onnaaphiyerya o eniya, koma awo hanamusuwela taani muchu ene. Yesu onnawiichana moovuwa: “Anamiravo mokhalano etxhu yolya?” Awo annaakhula: “Hoye!” Yesu onnaaleela: “Reyani milapa mono wolopwana wa mwatxeya ni munamphara ihopa.” (Yohani 21:5, 6) Awo annaphara ihopa sawaaca ophiyerya ehinawerya oteexa milapa saya.

Yohani onnamuleela Petro: “Ti Apwiya!” (Yohani 21:7) Mwawaakuveya, Petro onnawara malaya awe, yaawo aarunleiye vaava aatotheiye. Owo onnacuphela mu eniya nave onneekha meeturu makhumi mathanu ni makhumi masese ayaaka oseresere. Akina ari mmwaaceyani annamuchara vakhaani vakhaani, eteenxe mulapa osaren’ye ihopa.

Vaava anaphiyaaya oseresere, annoona “makhala a moro wosiwevo ihopa ni iphau.” Yesu onnaloca: “Muruhe sa ihopa mphanranyu.” Petro onnapurula mulapa, orimo ihopa itokweene sawaakhwana nsana ni makhumi mathanu ni ihopa raru! Yesu onnaloca “Rwani, mulye!” Haavovo mmoha a yaawo olimpe murima wi omukoha, “We wani?” woona wi oothene aasuwela wi ti Yesu. (Yohani 21:10-12) Ela ekwaha awe yaneeraru waaphiyerya amuhuserya ntoko nikhuuru.

Yesu onnamvaha mmoha ti mmoha a yaawo ehopa ni ephaawu wi elye. Voocharela, akhweya awehaka ihopa iphariwe, Yesu onnakoha: “Simoni, mwana a Yohani,onnakikhwela miyo [opwaha iha]?” Apwanne Petro otikitheren’ye mu nakoso awe a ototha ihopa opwaha muteko yoowo Yesu onachuneiye wi owo apake? Petro onnaakhula: “À. Pwiya, Weyano wosuwela wi kinnokhwela.” Mwawiihiiha Yesu onnamuceenyerya owo: “Okukhuleke iputxeputxhe saka.”—Yohani 21:15.

Yesu onnamukoha Petro wanaawiili: “Simoni, mwana a Yohani, onnakikhwela miyo?” Akhweya mootikhiniheya, Petro onnaakhula ni murima woothene: “À, Pwiya. Weyano wòsuwela wi kinnokhwela.” Nlelo Yesu hatoronke naakhulo nawe: “Okukhuleke iputxeputxhe saka.”—Yohani 21:16.

Mu ekwaha yaneeraru, Yesu onnamukoha Petro: “Simoni, mwana a Yohani, onnakikhwela miyo?” Vano akhweya Petro onniikoha waakhanle wi Yesu onnakhwa minikwa ororomeleya wawe. Petro onnaakhula acicimiheryaka: “Pwiya, weyano wòsuwela sothene, wòsuwela wi kinnokhwela.” Mwawuuluulela Yesu onnavuwiha yeeyo Petro onaphwaneleiye opaka: “Okukhuleke iputxeputxhe saka.” (Yohani 21:17) Chiryene, yaale arino ohoolela mmulokoni anaphwanela waarumeela yaale avolonwe mu nikhola na ipucepuche sa Muluku.

Yesu aahimakiwa ni wiiphiwa nthowa nawi aapaka muteko yoowo Muluku aamurummeiye opaka. Vano Yesu onooniherya wi Petro onahaala okhalano muteko woolikana. Yesu onnaloca: “Waryawe mmiravo wàwara mekhà, nave wètxa wakhwelawewo. Wuluvalà, onarwa wokola mata, oni onan’warihiwa ti mutxhu mukina, ni oni onamukerihiwa ohinakhwelawewo.” Yesu onnamuceenyerya owo: “Okitxhare!”—Yohani 21:18, 19.

Petro onnanweha murummwa Yohani nave onnakoha: “Pwiya, nka ola?” Aai,omwaahiyu taani murummwa yoowo, Yesu onamusiveleiye onaweheryeiye? Yesu onnaakhula: “Miyo kakhwelà wi owo akhale mpaka orwa waka, ononanvo?”  (Yohani 21:21-23) Petro onaphwanela omuchara Yesu ahoovaka yeeyo akina anapakaaya. Nlelo, Yesu onnooniherya wi Yohani onahaala okhala mukumi arummwa akina emanle okhwa nave onahaala ovahiwa eneneeryo ya orwa wa Yesu mu ikuru sa Omwene.

Mweeparipari, sookhalavo ichu ikina seiyo Yesu opankeiye, opwaha seiho saahaala orepiwa mu aliivuru ancipale.