Diad samay sampot lan labi a kaiba nen Jesus iray apostol to, imbaga tod sikara: “Sano apaoli ak la, unona ak ed sikayo ya onlad Galilea.” (Mateo 26:32; 28:7, 10) Dakel ed saray patumbok so linma ed Galilea, balet antoy gawaen da diman?

Aminsan, imbaga nen Pedro ed anemira ed saray apostol: “Onla ak a mansigay.” Inmebat iran anem: “Mila kamid sika.” (Juan 21:3) Sanlabin anggapoy nala ra. Nen onliliwawa la, nampanengneng si Jesus diad gilig na dayat, balet agda abidbir. Inkelyaw nen Jesus: “Ananak, walay naakan yo?” Inmebat ira: “Anggapo!” Inkuan tod sikara: “Ipelag yoy iket ed bandad kawanan na baloto tan walay naala yo.” (Juan 21:5, 6) Diad saman et dakdakel a sira so nala ra kanian ngalngali agda la naguyor so iket da.

Inkuan nen Juan ed si Pedro: “Say Katawan iman!” (Juan 21:7) Tampol ya imbalkes nen Pedro so ilalatop a kawes to, ta ag-itan akasulong ed sikato legan a mansisigay. Tinmaboy ed dayat tan linmangoy na manga sanlasus a metro paonlad sakbit. Kalkalnan tinmumbok iramay arum nin walad baloto, ya iguguyor da may iket a napno na sira.

Nen akasakbit la ra, walay anengneng dan “ikakalot a sira tan wala met so tinapay.” Inkuan nen Jesus: “Mangawit kayo dia na pigaran sira a kapkapangerel yo.” Ingguyor nen Pedro so iket a nankargay 153 ya angkakabaleg a sira! Inkuan nen Jesus: “Gali dia, mangalmusal kayo.” Anggapod sikara so nampakpel a mantepet ed sikaton, “Siopa ka?” lapud amta da lan si Jesus iman. (Juan 21:9-12) Mikatlo la ’ya a sikatoy nampanengneng ed saray disipulo to bilang grupo.

Inikdan nen Jesus so kada sakey ed sikara na tinapay tan sira. Insan intepet to, a diad saman et nayarin sankanengneng toy narel dan sira: “Simon ya anak nen Juan, kasin mas inarom ak nen saraya?” Kasin mas importante ed si Pedro so panagsigay nen say kimey ya ipapagawa nen Jesus ed sikato? Inmebat si Pedro: “On, Katawan, amtam a papablien ta ka.” Kanian inkuan nen Jesus ed sikato: “Pakan mo iray korderok.”​—Juan 21:15.

Tinepet lamet nen Jesus: “Simon ya anak nen Juan, kasin inarom ak?” Nayarin mankelaw si Pedro, tan oniay inyebat to: “On, Katawan, amtam a papablien ta ka.” Mipara so imbaga nen Jesus ed sikato: “Pastolan mo iray angkekelag a karnerok.”​—Juan 21:16.

Tinepet nen Jesus ed pitlo: “Simon ya anak nen Juan, kasin papablien mo ak?” Natan et nayarin iisipen nen Pedro no kasin panduaruwaan nen Jesus so katooran to. Pian nakombinse to, oniay inkuan nen Pedro: “Katawan, amtam so amin a bengatla; amtam a papablien ta ka.” Impabitar lamet nen Jesus no antoy kaukolan a gawaen nen Pedro: “Pakan mo iray angkekelag a karnerok.” (Juan 21:17) On, saray manangidaulo et kaukolan a manlingkor ed saramay walad pulok na Dios.

Si Jesus et binalor tan pinatey lapud ginawa toy kimey ya ingganggan na Dios ed sikato. Natan et impaamta to a mipara met so pansumpalan nen Pedro. Inkuan to: “Sanen malangwer ka, isusulong mon bukor so kawes mo tan onaakar kad inerman a labay mo. Balet sano ontatken ka la, iyunat mo iray limam tan kawesan ka na sananey a too tan awiten to kad pasen ya agmo labay.” Ingen, sikatoy pinaseseg nen Jesus: “Mantultuloy kan ontumbok ed siak.”​—Juan 21:18, 19.

Nilingaw nen Pedro si apostol Juan tan tinepet to: “Katawan, sayan too balet ey?” Anto kasi nagawa ed samay apostol ya inar-aro nen Jesus? Inmebat si Jesus: “No linawak a sikatoy mansiansia anggad isabik, akin et pampapagaan mo itan?” (Juan 21:21-23) Kaukolan ya ontumbok si Pedro ed si Jesus ya agto la pampapagaan no antoy gawaen na arum. Balet, siansian impaamta nen Jesus ya mas andukey so bilay nen Juan nen say arum nin apostol tan makanengneng na pasingawey nipaakar ed isabi nen Jesus bilang manuley ed Panarian.

Siempre, amayamay ni ray ginawa nen Jesus, a no isulat ya amin et agnakarga na anggan dakdakel a lukot.