Manaraq presochachkaptinkum Jesusqa apostolninkunaman nirqaña: “Kawsariramuspaymi qamkunamanta puntataraq Galileaman risaq”, nispa (Mateo 26:32; 28:7, 10). Chaymi qatiqninkuna Galilea lawman rirqaku. ¿Imapaq?

Chaypim suqta apostolkunaman Pedro nirqa: “Risaqyá challwa hapiq”, nispa. Paykunañataqmi Pedrowan pasarqaku (Juan 21:3). Ichaqa lamar quchapi tukuy tuta kaspankupas manam huk challwallatapas hapirqakuchu. Achikyaqtañataqmi lamar quchapa patanpi Jesus rikuriykuptin mana riqsirqakuchu. Chaypim Jesus kallpawan nirqa: “Churillaykuna, manam imapas mikunaykichikpaq kanchu, ¿aw?”, nispa. ¡Manam! niptinkum Jesusñataq nirqa: “Botepa alliq lawninman mallata wischuychik hinaspaqa tarinkichikmi”, nispa (Juan 21:5, 6). Chaymi mallata wischuykuspanku hurquyta manaña atirqakuchu challwa huntaruptin.

Chayllam Juanqa Pedrota nirqa: “¡Payqa señormi!”, nispa (Juan 21:7). Hinaptinmi Pedroqa hawan pachanta hinakuykuspan yakuman pawaykurqa, hinaspam karumantaraq nadeaspan lamar quchapa patanman chayarurqa. Wakinñataqmi qipanta allillamanta rirqaku challwayuq mallata chutastin.

Lamar quchapa patanpiñataqmi sansapi rikururqaku challwata hinaspa tantata. Jesusñataqmi paykunata nirqa: “Chayllaraq hapimusqaykichik challwakunamanta wakinta apamuychik”, nispa. Chaymi Pedroqa mallata aysarurqa, chaypiqa karqa 153 challwakunam. Jesusñataqmi nirqa: “Hamuspayá mikuykuychik”, nispa. Jesus kasqanta yachasqankuraykum mana tapurqakuchu “¿pitaq kanki?” nispaqa (Juan 21:9-12). Chaykamaqa kimsa kutikamañam Jesusqa paykunaman rikuriykurqa.

Jesusqa challwatawan tantata llapankuman quykuspanmi Pedrota nirqa: “Juanpa churin Simon, ¿kaykunamanta mastachu kuyawanki?”, nispa. Yaqachusmi chaynataqa nirqa mallapi kaq challwakunata qawarispan. Jesusqa yachaytam munarqa Pedroqa ima ruwayta astawan kuyasqanmanta. Pedroñataqmi nirqa: “Señor, qamqa yachankim kuyasqaytaqa”, nispa. Jesusqa nirqataqmi: “Chitachaykunatayá michiy”, nispa (Juan 21:15).

Yapamantam Jesusqa Pedrota nirqa: “¿Kuyawankichu?”, nispa. Kaqmanta chayna nisqanwanchá Pedroqa hukmanyarurqa, ichaqa mana iskayrayaspanmi nirqa: “Arí señor, qamqa yachankim kuyasqaytaqa”, nispa. Jesusñataqmi nirqa: “Ovejachaykunatayá michiy”, nispa (Juan 21:16).

Jesusqa huktawanmi tapurqa: “Juanpa churin Simon, ¿kuyawankichu?”, nispa. Chayna kimsakama tapusqanwanqa kuyasqanmanta Jesus iskayrayasqantachusmi Pedroqa piensarqa, chaymi kaynataña nirqa: “Señor, qamqa tukuy imatam yachanki, qamqa yachankipunim kuyasqaytaqa”, nispa. Jesusñataqmi huktawan nirqa: “Ovejachaykunatayá michiy”, nispa (Juan 21:17). Chayqa iñiqkunapi punta apaqkuna Diospa ovejachankunata yanapanankutam qawachin.

Jesustaqa Diosta kasukusqanraykum presocharuspanku wañurachirqaku. Chaymi Pedroman willarqa paytapas chaynata ruwanankumanta, nirqam: “Mozoraq kaspaykiqa kikikim pachakurqanki hinaspam maymi munasqaykikunapi purirqanki, machuyaruptikim ichaqa makikita haywariptiki hukña pachachisunki hinaspam mana munasqayki lawkunaman pusasunki”, nispa. Nirqataqmi: “Hinallayá qatiway”, nispa (Juan 21:18, 19).

Chaymantam Pedroqa Jesusta tapurqa kuyasqan apostolnin Juanta ima pasananmanta. Jesusñataqmi nirqa: “Hamunaykama hinalla kananta  munaptiyqa, ¿imataq qamtaqa qukusunki?”, nispa (Juan 21:21-23). Chaynata nispanpas Jesusqa willarqam Juanqa wakin apostolkunamanta aswan unaytaraq kawsananmanta hinaspa Jesus kamachiqña kasqanta musquyninpi hina rikunanmantapas. Pedroqa Jesustam hinalla qatinan karqa hukkunata qawananmantaqa.

Jesuspa ruwasqankunamanta llapanta qillqaptinkuqa manachá imapas haypanmanchu karqa.