Mu kyolwa kyaye kya nfudilo na batumibwa, Yesu bebalungwile shi: “Pankasanguka, neenubadidiila mu Ngalileya.” (Mateo 26:32; 28:7, 10) Binobino bebungi ba ku balongi baye abayile lwalwa lwendo, kadi abadi na kya nkakita kinyi mu Ngalileya?

Ungi musango, Mpyeele balungwile basamombo ba ku batumibwa shi: “Neende mu kuloba.” Boso basamoombo nkumwalula shi: “Atwende noobe.” (Yowano 21:3) Bufuku boso bushima, tababadi bakwate kantu su nkamune. Ku nkyelo, Yesu bebamwenekyela ku kyèse, kadi tababadi bamutundule nya. Yesu bebele musaase shi: “Balumyena, tanwi na ndambo ya mishipa su?” Abo nkumwalula shi: “Nya.” Yesu nkwi balungula shi: “Elaayi bukondja ku lupese lwa mboko ilume ya bwato, anukwata.” (Yowano 21:5, 6) P’abo kukita byabaya abakwatshile mishipa ibungi, abo nkukutwa bya kukaka bukondja ku kyèse.

Yowano balungwile Mpyeele shi: “Nyi Mwanaana.” (Yowano 21:7) Musango umune, Mpyeele banyine kilamba kya panundu kibakatwishe pabadi alobo. Beyelele mu kalunga, aye nkuyowa kipindji kifikye ku metre 90 na ku kyèse. Bangi abalondele bipelabipela mu bwato na kukaka bukondya buule na mishipa.

Pababafikile ku kyèse, abamwene “kaalo ka makala, pababadi balongye mishipa na mikate.” Yesu nkwibalungula shi: ‘Byaabya fikayi na ndambo ya mishipa ibanukwata.’ Mpyeele batushile mishipa mu bukondya mubadi mishipa 150 ikata! Yesu bambile shi: “Fikaayi nudye.” Takwi su ngumune banyingile eshimba bwa kwipusha shi: “Nnoobe’nyi?” mwanda abadi bashingule shi badi Yesu. (Yowano 21:10-12) Uno ubadi musango wa kasatu n’aye kumwenekyela balongi pabadi mu kisaka.

Yesu bapeele ooso a kwabadi mikate na mishipa bwa kudya. Akupu, abimweneka shi batadile mishipa aye nkwipusha shi: “Simone mwana aa Yowano, we munfule kukila bino su?” Mpyeele badi mulamate ku busunga bwaye bwa mishipa kukila mudimo ubakimbanga kumupa Yesu su? Mpyeele balulwile shi: “Oolo, Mwanaana owuku’shi nee mukufule.” Ngi Yesu nkumutuma shi: “Diisha bana ba mikooko yande.”—Yowano 21:15.

Yesu bamwipwishe dingi shi: “Simone mwana a Yowano we munfule su?” Pangi na kwialashena, Mpyeele balulwile na kushinkamisha shi: “Oolo Mwanaana, ouku shi nee mukufule.” Yesu bamupeele lwalulo lwi mumune shi: “Lama mikooko yande.”—Yowano 21:16

Musango wa kasatu, Yesu bamwipwishe shi: “Simone, mwana aa Yowano we munfule su?” Binobino Mpyeele bamwene shi pangi Yesu e na mpaka bwa lulamato lwaye. Mpyeele nkumulungula na kushinkamisha shi: “Mwanaana, obe ouku bintu byooso, ouku kalolo shi nee mukufule.” Akupu Yesu balesheshe dingi kilombene Mpyeele kukita akula shi: “Diisha mikooko yande.” (Yowano 21:17) Eyendo, abitungu baba bakwete kukunkusha, bafubile mikooko ayitwele mu kikutu ky’Efile Mukulu.

Abadi bakupile Yesu na kumwipaa mwanda bakitshine mufubo ubamutumine Efile Mukulu bwa kulombasha. Binobino alesha shi Mpyeela badya kupetekyelwa na byamumune. Nyi bwakinyi Yesu bambile shi: “Paboodi mukinga boodi wanya mukoba wobe, wendanga kuboodi’okyebe. Pooyikala toodi mununu, woola maasa, byaabya ungi muntu ngi akwanya mukoba oobe, ende noobe kooshii mukyebe.” Yesu nkumulungula shi: Tungunuka na ‘kundonda.’—Yowano 21:18, 19.

Mpyeele bamwene mutumibwa Yowano aye nkwipusha Yesu shi: “Aye naamu, Mwanaana, a nkinyi akikamumwekyela?” Sunga shi kinyi kibadya kufikila mutumibwa badi mufudibwe na Yesu bikata? Yesu balulwile shi: “Su naakumiina’shi ashaale na muwa nyaa naa p’ankalukiila, wobe ngunyi?” (Yowano 21:21-23) Mpyeele badi na kya kulonda Yesu kushi kwikalakasha bwa bangi. Anka, Yesu balesha shi Yowano akayisha kukila bangi batumibwa, akupu abakamupa kimonwa kya Yesu kwafiki mu ntumbo ya Bufumu.

Byabya, kwi bingi bintu bibakitshine Yesu kukila bibungi bifundjibwe mu mifungofungo.