Zuŵa lakumaliya la umoyu waku Yesu pacharu chapasi, wangukambiya akutumika ŵaki kuti: “Asani ndaziyuskika, ndazamudanjiyapu kuluta ku Galileya yimwi mwechendafikeku.” (Mateyu 26:32; 28:7, 10) Yesu wati wayuskika, akusambira ŵaki anandi anguluta ku Galileya. Kumbi yiwu angamuchitanji ku Galileya?

Nyengu yinyaki, Peturo wangukambiya akutumika anyaki 6 kuti: “Ndiluta kuchibaya somba.” Yiwu angumuka kuti: “Nasi tilutengi nawi.” (Yohane 21:3) Kweni usiku wenuwu yiwu anguwe ŵaka. Kuchicha, Yesu wanguma mumphepeti mwa nyanja, kweni akusambira ŵaki angumuziŵa cha. Pavuli paki, Yesu wangudaniriza kuti: “Mwaŵana yimwi, kumbi mwe ndi chakurya chechosi kuti tiryi?” Yiwu angumuka kuti: “Awa!” Yesu wanguŵakambiya kuti: “Ponyani mukwawu winu kumaryi kwa boti ndipu mubayengi somba.” (Yohane 21:5, 6) Yiwu anguchita nadi vo Yesu wanguŵakambiya, ndipu angubaya somba zinandi ukongwa mwakuti angutondeka kuguza mukwawu wawu.

Pavuli paki, Yohane wangukambiya Peturo kuti: “Mbambuya!” (Yohane 21:7) Peturo wati wavwa venivi, mwaliŵiliŵi wanguvwala laya laki lakubwalu lo wanguzuwa wachiluta m’maji kuti wakabayi somba. Iyu wangundwikiya m’maji ndi kwamba kusambira. Wangusambira mtundu wa mamita pafufupi 90 kuchifika kumtunda. Kweni akusambira anyaki amulondonga kamanakamana muvuli. Yiwu angukwera boti ndipu aguzanga mukwawu wo unguzaza somba.

Akusambira ŵenaŵa ŵati afika kumtunda, anguwona “chiŵandi kweniso motu wa maka ndipu pamotu wo angulalikapu somba.” Yesu wangukamba kuti: “Zani ndi zinyaki mwa somba zo mwabaya sonu.” Peturo wanguguza mukwawu wo unguzaza somba zikuluzikulu zakukwana 153. Yesu wanguŵakambiya kuti: “Zani muziryi chakurya chamlenji.” Palivi wakusambira yo wanguchita chiganga kumufumba kuti, “Ndimwi ayani?” chifukwa anguziŵa kuti ndi Yesu. (Yohane 21:9-12) Yaka kenga kachitatu kuti Yesu wawoneke kwa akusambira ŵaki ŵe gulu.

Yesu wangupaska weyosi chiŵandi ndi somba kuti waryi. Pavuli paki, wangufumba kuti: “Simoni mwana waku Yohane, kumbi utindiyanja kuluska izi?” Iyu wachifumba fumbu lenili, watenere kuti walereskanga somba. Kumbi Peturo wayanjanga ukongwa ulovi kuluska ntchitu yo Yesu wakhumbanga kuti iyu wagwiri? Pakumuka fumbu lo Yesu wangumufumba, Peturo wangukamba kuti: “Hinya Ambuya, namwi muziŵa kuti nditikuyanjani ukongwa.” Mwaviyo, Yesu wangumukambiya kuti: “Liska ŵana ambereri ŵangu.”—Yohane 21:15.

Pavuli paki, Yesu wangufumba so kachiŵi kuti: “Simoni mwana waku Yohane, kumbi utindiyanja?” Peturo watenere kuti wanguzizwa ukongwa, kweni wangumuka mwachiganga kuti: “Hinya Ambuya, namwi muziŵa kuti nditikuyanjani ukongwa.” Yesu wangukamba vo wangumuka pakwamba. Iyu wanguti: “Liska ŵana ambereri ŵangu.”—Yohane 21:16.

Yesu wangumufumba so kachitatu kuti: “Simoni mwana waku Yohane, kumbi utindiyanja ukongwa?” Panyaki Peturo wangwamba kuŵanaŵana kuti Yesu watimugomezga cha, ndipu wangumuka mwanthazi kuti: “Ambuya, muziŵa vinthu vosi ndipu muziŵa kuti nditikuyanjani ukongwa.” Yesu wangukamba so ntchitu yo Peturo wakhumbikanga kuchita. Iyu wanguti: “Liska ŵana ambereri ŵangu.” (Yohane 21:17) Ivi vilongo kuti wo alongozga m’gulu laku Yehova akhumbika kuphwere ŵanthu wo Chiuta wakuŵaguziya mukhola laki.

Yesu wangumangika kweniso kubayika chifukwa chakugwira ntchitu yo Chiuta wangumupaska. Vo Yesu wangukamba pavuli paki, vingulongo kuti Peturo nayu watingi wakumanengi ndi vo vinguchitikiya iyu. Yesu wangukamba kuti: “Po wenga mnyamata, wavwalanga wija ndipu walutanga ko wakhumbanga. Kweni asani wakota, wazamutambasuwa manja ngaku, munthu munyaki wazakukuvwalika ndipu wazamuluta nawi ko uleka kukhumba.” Chinanga kuti watingi wakumanengi ndi venivi, Yesu wangumuchiska kuti: “Lutirizga kundilondo.”—Yohane 21:18, 19.

Pavuli paki, Peturo wangulereska Yohane ndipu wangufumba Yesu kuti: “Ambuya, nanga munthu uyu?” Pakufumba fumbu lenili , Peturo wakhumbanga kuziŵa vo vatingi vizichitikiyengi wakutumika yo Yesu wamuyanjanga ukongwa. Yesu wangumuka kuti: “Asani ndingakhumba kuti waje ndi umoyu mpaka po ndiziyengi, yiwi vitikukwaska wuli?” (Yohane 21:21-23) Yesu wang’anamuwanga kuti Peturo wakhumbikanga waka kumulondo, kwambula kuŵanaŵaniya vo anyaki achitanga. Kweni vo Yesu wangukamba vingulongo so kuti Yohane watingi wajengi ndi umoyu utali kuphara akutumika anyaki ndipu watingi wawonengi chiwona chakukwaskana ndi Yesu wachiyamba kulamuliya mu Ufumu waki.

Yesu wanguchita vinthu vinandi ukongwa ndipu vinthu venivi, vatingi vikwanengi cha kuvilemba mumipukutu.