Long laspela nait bilong Jisas long stap wantaim ol aposel, em i tokim ol: “Taim mi kirap bek pinis, bai mi go long Galili paslain long yupela.” (Matyu 26:32; 28:7, 10) Olsem na planti disaipel bilong Jisas i go long Galili, tasol ol i no save long samting ol bai mekim long dispela hap.

Pita i tokim 6-pela aposel olsem: “Mi bai go painim pis.” Na olgeta i tok: “Mipela tu bai kam wantaim yu.” (Jon 21:3) Long nait olgeta, ol i no pulim wanpela pis. Taim tulait i bruk, Jisas i wokabaut long nambis, tasol ol i no luksave long em. Jisas i singaut long ol na tok: “Ol pikinini, yupela i gat sampela kaikai?” Ol i tok: “Nogat!” Jisas i tokim ol: “Tromoi umben i go long han sut bilong bot na yupela bai kisim sampela.” (Jon 21:5, 6) Ol i kisim planti pis tru na ol i no inap long pulim umben i go antap long bot.

Jon i tokim Pita: “Em Bikpela tasol!” (Jon 21:7) Kwiktaim Pita i werim siot bilong em, long wanem, em i bin rausim siot taim em i wok long painim pis. Em i kalap i go insait long wara na swim inap 90 mita i go long nambis. Ol narapela aposel i stap yet long bot na pulim umben i kam isi isi, long wanem, umben i pulap long pis.

Taim ol i go kamap long nambis, “ol i lukim wanpela paia na pis i stap antap long paia, na bret tu i stap.” Jisas i tok: “Ol pis nau yupela i kisim, bringim sampela i kam.” Pita i pulim umben i kam antap long nambis, na inap olsem 153 bikpela pis i pulap long umben! Jisas i tokim ol: “Yupela kam kaikai.” Ol disaipel i luksave olsem em Jisas, olsem na no gat wanpela bilong ol i askim em, “Yu husat?” (Jon 21:9-12) Em namba 3 taim bilong Jisas long kamap long ol disaipel taim planti bilong ol i bung.

Jisas i givim bret na pis long olgeta wan wan disaipel. Na ating Jisas i lukluk long ol pis na em i askim Pita olsem: “Saimon, pikinini bilong Jon, yu laikim mi moa winim ol dispela samting, o nogat?” Yu ting Pita i laikim moa wok bisnis bilong kisim pis na em i no laikim tumas wok Jisas i laik bai em i mekim? Pita i tok: “Yes Bikpela, yu save mi laikim yu tumas.” Olsem na Jisas i tokim em: “Givim kaikai long ol pikinini sipsip bilong mi.”—Jon 21:15.

Namba 2 taim gen Jisas i askim Pita: “Saimon, pikinini bilong Jon, yu laikim mi o nogat?” Pita i tingting planti na i tok: “Yes Bikpela, yu save mi laikim yu tumas.” Jisas i bekim wankain tok: “Lukautim ol liklik sipsip bilong mi.”—Jon 21:16.

Namba 3 taim Jisas i askim Pita olsem: “Saimon, pikinini bilong Jon, yu laikim mi tumas o nogat?” Ating Pita i pilim olsem Jisas i gat 2-pela tingting long em, olsem em bai i stap gut long Jisas o nogat. Pita i laik bai Jisas i save olsem em i laikim em tru, na em i tok: “Bikpela, yu save long olgeta samting, na yu save olsem mi laikim yu tumas.” Jisas i kolim gen samting Pita i mas mekim na em i tok: “Givim kaikai long ol liklik sipsip bilong mi.” (Jon 21:17) Yes, ol man i stap olsem ol gopas, ol i mas mekim wok bilong lukautim ol manmeri husat i kam insait long lain bilong God.

Ol man i arestim Jisas na kilim em i dai, long wanem, em i mekim wok God i givim long em. Em i tokim Pita olsem wankain samting bai painim em. Jisas i tok: “Taim yu yangpela, yu yet i save pasim laplap na wokabaut long hap yu laik go long en. Tasol taim yu lapun yu bai putim han i go na narapela man bai pasim laplap long yu na kisim yu i go long hap yu no laik go long en.” Jisas i strongim Pita na i tok: “Wok yet long bihainim mi.”—Jon 21:18, 19.

Pita i lukluk long aposel Jon na em i askim Jisas: “Bikpela, olsem wanem long dispela man?” Wanem samting bai kamap long dispela aposel em Jisas i laikim tumas? Jisas i tok: “Sapos mi laik bai em i stap inap long taim mi kam, olsem wanem dispela em i samting bilong yu?” (Jon 21:21-23) Pita i mas bihainim Jisas na no ken tingting planti long wok em ol narapela i mekim. Maski i olsem, Jisas i kamapim klia olsem Jon bai stap longpela taim moa long graun winim ol narapela aposel, na em bai lukim visen i makim taim we Jisas bai mekim wok King long Kingdom.

Jisas i bin mekim planti wok, olsem na ol man i no inap raitim olgeta stori bilong em long ol skrol.