I tena toe po mo te kau apositolo, ne fai atu a Iesu ki a latou: “Kae kafai ko toetu aka au, ka mua atu au i a koutou ki Kalilaia.” (Mataio 26:32; 28:7, 10) Tela la, ne fai nei ne ana soko e tokouke a te malaga tenā, kae ne a mea e ‵tau o fai ne latou i Kalilaia?

I te taimi e tasi, ne fai atu a Petelu ki apositolo e tokoono: “Au ka fano o faiika.” Kae ne tali atu katoa a te tokoono: “A matou e olo atu i a koe.” (Ioane 21:3) I te po kātoa, ne seki ai eiloa ne olotou ika ne maua. I te taimi ne kamata ei o maina mai, ne nofo atu a Iesu i te matafaga, kae ne seki iloa ne latou me ko oi tenā. Ne kalaga atu a Iesu: “Aku tama, e isi ne otou meakai?” Ne tali atu latou: “E seai!” Ne fai atu a Iesu ki a latou: “‵Pei ifo te tili i te feitu fakaatamai o te poti kae ka maua ne koutou ne ika i ei.” (Ioane 21:5, 6) Ne maua ei ne latou a ika e uke telā ko se mafai ne latou o ‵futi ki luga te lotou tili.

“Ko te Aliki tenei!” ne fai atu a Ioane ki a Petelu. (Ioane 21:7) Ne pei fakavave ne Petelu tena gatu mai tua, telā ne seki pei ne ia i te taimi ne faiika ei a ia. Ne eva ifo a ia ki te tai kae ‵kau atu ki uta i se selau iata te ‵mao. Ne tau‵tali malielie atu a nisi tino i te vaka, kae ‵futi aka a te tili telā ko ‵fonu eiloa i ika.

I te okoatuga ki uta, ne lavea ne latou “a te afi malala mo ika e tafola i luga i ei mo falaoa.” Ne fai atu a Iesu: “Aumai ne ika mai otou ika konā ne maua.” Ne ‵futi aka ne Petelu te tili, telā ne ‵tu i ei a ika ‵lasi e 153! “‵Mai o ‵kai,” ne fai atu a Iesu. E seai eiloa se tino e lava tena loto malosi o fesili atu, “Ko oi koe?” ona ko te mea ko iloa ne latou me ko Iesu tenā. (Ioane 21:10-12) Tenei eiloa te tolu o taimi ne fakasae atu ei a ia ki te kau soko e pelā me se potukau.

Ne tuku atu ei ne Iesu ki a latou taki tokotasi a falaoa mo ika ke ‵kai latou. Oti aka, mai te kilokilo atu ki te uke o ika ne maua, ne fesili atu a ia: “Simona te tama a Ioane, e a, e sili atu tou alofa ki a au i lō mea konei?” E mata, ne sili atu te fiafia o Petelu ki te pisinisi faiika i lō te galuega ne manako a Iesu ke fai ne ia? Ne tali atu a Petelu: “Ao, e te Aliki, e iloa ne koe i a au e alofa malosi ki a koe.” Telā ne fakamalosi atu ei a Iesu ki a ia: “Fagai aku tamā mamoe.”—Ioane 21:15.

Ne toe fesili atu a Iesu: “Simona te tama a Ioane, a koe e alofa mai ki a au?” Kāti ne tai fanoanoa a Petelu, kae ne tali atu eiloa a ia mo te fiafia: “Ao, e te Aliki, e iloa ne koe i a au e alofa malosi ki a koe.” Ne tali atu eiloa a Iesu i se auala tai ‵pau: “Tausi aku tamā mamoe.”—Ioane 21:16.

Ne fesili atu a Iesu i te tolu o taimi: “Simona te tama a Ioane, a koe e alofa mai ki a au?” Nei la, kāti ko mafaufau a Petelu me ko Iesu e fakalotolotolua ki tena alofa tumau io me ikai. Ne fai atu ei a Petelu i se auala telā e faka‵mafa atu ei te manatu tenā: “Te Aliki, e iloa ne koe a mea katoa; e iloa ne koe i a au e alofa malosi ki a koe.” Ne toe fai atu ei ne Iesu a mea e ‵tau o fai ne Petelu: “Fagai aku tamā mamoe.” (Ioane 21:17) Ao, e ‵tau mo latou kolā e fai ne latou te takitakiga o tavini atu ki tino kolā e olo atu ki te lulu mamoe a te Atua.

Ne saisai kae tamate a Iesu ona ko te mea ne fai ne ia a te galuega telā ne fakatonu mai ne te Atua ke fai ne ia. Nei la, ko fakaasi atu ne ia me ka penā foki a mea ka iku atu ki a Petelu. Ne fai atu a Iesu: “Kae koi tamaliki koe, e fakapei eiloa ne koe ou gatu kae fano sāle ki so se koga e manako koe ki ei. Kae kafai ko toeaina koe ka ‵fola atu ou lima kae ka fakapei ou gatu ne se isi tagata kae ka ‵taki atu koe ki te koga telā e se manako koe ki ei.” Kae ne fakamalosi atu ei a Iesu ki a ia: “Tautali mai faeloa i a au.”—Ioane 21:18, 19.

Ne lavea ne Petelu a te apositolo ko Ioane kae fesili atu: “Te Aliki, kae pefea a te tagata tenei?” Ao, se a te mea ka tupu i aso mai mua ki te apositolo telā e alofa malosi ki ei a Iesu? Ne tali atu a Iesu: “Kafai ko toku loto ke tumau a ia ke oko ki te taimi e toe foki mai ei au, se a tau fekau i ei? Tautali mai fua koe i a au.” (Ioane 21:21-23) Ne ‵tau o tautali atu a Petelu ki a Iesu e aunoa mo te manavase e uiga ki mea e fai ne nisi tino. Kae ne fakaasi atu faeloa ne Iesu me ka ola leva atu a Ioane i lō nisi apositolo kae ka maua foki ne ia se fakaasiga o te ‵toe foki mai o Iesu i te malosi o te Malo.

E tonu, e isi aka foki ne mea e ‵tau o fai ne Iesu, kolā e uke atu i mea e mafai o tusi i pelugā tusi e uke.