I te po hopea e ta ˈna mau aposetolo, i parau na Iesu ia ratou e i muri iho i to ˈna tia-faahou-raa, e na mua ˈtu oia ia ratou i te haere i Galilea. (Mataio 26:32; 28:7, 10) Mea rahi o ta ˈna mau pǐpǐ tei haere i Galilea, ia aha râ ratou i ǒ?

I muri aˈe, na ô maira Petero i e ono aposetolo: “Te haere nei au e taiˈa.” Parau atura ratou: “E na muri atoa matou ia oe.” (Ioane 21:3) Aita râ i noaa ta ratou iˈa e ao noa ˈtu. Fa maira Iesu i tatahi, aita râ ratou i ite o ˈna tera. Tuô maira Iesu: “Ta ˈu mau tamarii here, e maa ta outou?” Pahono atura ratou: “Aita!” Na ô maira oia: “A taora i te upeˈa i te pae atau o te poti, e noaa ta outou iˈa.” (Ioane 21:5, 6) Mea rahi roa te iˈa tei noaa mai a ore atu ai i haere ia ratou ia huti mai i te upeˈa.

Parau atura Ioane ia Petero: “O te Fatu!” (Ioane 21:7) Oomo ihora Petero i to ˈna ahu, aita hoi e ahu i nia iho ia ˈna a taiˈa ˈi oia. Ouˈa ihora oia i roto i te miti e au atura e 90 metera i uta. Hôe mǎrû noa maira te tahi atu mau pǐpǐ, a huti atoa mai ai i te upeˈa ua î i te iˈa.

A tapae ai i uta, ite aˈera ratou i “te arahu e ama noa ra e te iˈa i nia iho, e te faraoa.” Na ô maira Iesu: “Afai mai na maa iˈa i noaa mai nei ia outou.” Huti maira Petero i uta i te upeˈa 153 iˈa rarahi to roto. Na ô maira Iesu: “Haere mai e tamaa.” Taiâ aˈera ratou i te ui o vai o ˈna, ua ite hoi ratou e o Iesu. (Ioane 21:9-12) Te toruraa ïa teie to Iesu faraa i ta ˈna mau pǐpǐ.

Horoa ihora Iesu na ratou tataitahi maa faraoa e maa iˈa. A hiˈo ai i tera rahiraa iˈa, ui maira oia: “Simona tamaiti a Ioane, mea here anei na oe ia ˈu hau aˈe i teie mau mea?” Mea au aˈe anei na Petero te ohipa ravaai i te ohipa ta Iesu e hinaaro ia rave oia? Pahono atura Petero: “E, e te Fatu, ua ite oe e mea here na ˈu ia oe.” Na ô maira Iesu: “A faaamu i ta ˈu mau fanauˈa mamoe.”—Ioane 21:15.

Ui faahou maira Iesu: “Simona tamaiti a Ioane, mea here anei na oe ia ˈu?” Pahono haapapu atura Petero tei maere paha: “E, e te Fatu, ua ite oe e mea here na ˈu ia oe.” Na ô faahou maira Iesu: “A aupuru i ta ˈu mau fanauˈa mamoe.”—Ioane 21:16.

Ui maira â Iesu, te toru ïa o te taime: “Simona tamaiti a Ioane, mea here anei na oe ia ˈu?” Manaˈo ihora paha Petero e aita Iesu e tiaturi ra i ta ˈna parau. Na ô roa ˈtura oia: “E te Fatu, ua ite oe i te mau mea atoa. Ua ite oe e mea here na ˈu ia oe.” Haapapu maira â Iesu i ta Petero hopoia: “A faaamu i ta ˈu mau fanauˈa mamoe.” (Ioane 21:17) Ia aupuru hoi te mau taeae aratai i te feia tei haere mai i roto i te aua mamoe a te Atua.

I taamuhia na to Iesu na rima e i haapohehia na oia no te raveraa i te ohipa ta te Atua i tuu mai. Faaite ihora oia e na reira-atoa-hia Petero: “I to apîraa, na oe iho i faaahu noa na ia oe e i haere na oe i te vahi ta oe i hinaaro. Ia ruhiruhia râ oe, e toro oe i to oe na rima e na te tahi ê e faaahu ia oe e e amo ia oe i te vahi eita oe e hinaaro e haere.” Aˈo ihora râ oia ia Petero: “A pee noa mai ia ˈu.”—Ioane 21:18, 19.

I to Petero iteraa i te aposetolo Ioane, ui atura oia: “E te Fatu, e teie taata ïa?” Eaha hoi te tiai mai ra i teie aposetolo mea here roa na Iesu? Pahono maira Iesu: “Ia hinaaro vau ia faaea mai o ˈna e ia hoˈi roa mai au, no te aha ïa oe e haapeapea ˈi?” (Ioane 21:21-23) Ia pee hoi Petero ia Iesu ma te ore e haapeapea no ta te tahi atu e rave. Te parau ra hoi Iesu e e ora maoro atu â Ioane i te tahi atu mau aposetolo, e ite orama oia i to Iesu taeraa mai ei Arii.

Parau mau, mea rahi atu â te ohipa ta Iesu i rave, eita e pau ia papai i roto e rave rahi otaro.