Ha ultimo nga gab-i nga kaupod ni Jesus an mga apostol, ginsidngan niya hira: “Kabanhaw ko, mag-uuna ako ha iyo ngadto ha Galilea.” (Mateo 26:32; 28:7, 10) Damu han iya mga sumurunod an kumadto ha Galilea, pero mag-aano hira didto?

Ha usa ka higayon, ginsidngan ni Pedro an unom nga apostol: “Mangingisda ako.” Binaton hira: “Maupod kami ha imo.” (Juan 21:3) Ha bug-os nga gab-i, waray hira nadakop. Han tikaaga na, nagpakita hi Jesus ha baybayon, pero waray hira pakakilala ha iya. Gintawag niya hira: “Mga anak, may pagkaon ba kamo?” Binaton hira: “Waray!” Nagsiring hiya: “Itunod an pukot ha too nga dapit han baluto ngan makakadakop kamo.” (Juan 21:5, 6) Damu gud an ira nadakop salit waray na ngani hira pakakaalsa han pukot.

Hi Juan nagsiring kan Pedro: “An Ginoo ito!” (Juan 21:7) Iginsul-ot dayon ni Pedro an iya pantungbaw nga panapton nga waray niya isul-ot samtang nangingisda. Linukso hiya ha dagat ngan linangoy hin mga 100 ka metros ngadto ha baybayon. Hinay-hinay nga sinunod ha iya an iba nga nakadto ha baluto samtang gindadanas an pukot nga puno hin isda.

Paghaw-as nira ha baybayon, nakita nira nga may “isda nga iginsusugba ha baga ngan may tinapay.” Nagsiring hi Jesus: “Pagdara ngadi hin mga isda nga iyo pa la nadakop.” Gindanas ni Pedro an pukot nga may 153 nga dagku nga isda! Hi Jesus nagsiring: “Kadi, pamahaw na kamo.” Waray bisan usa ha ira an nagpakiana kon hin-o hiya kay maaram hira nga hiya hi Jesus. (Juan 21:10-12) Ini an iya ikatulo nga pagpakita ha iya mga disipulo sugad nga grupo.

Gintagan ni Jesus hin isda ngan tinapay an tagsa ha ira. Katapos, posible nga samtang ginkikita an damu nga isda, hiya nagsiring: “Simon nga anak ni Juan, hinigugma mo ba ako labaw pa hini?” Mas importante ba kan Pedro an negosyo nga pangisda kay han buruhaton nga iginpapabuhat ha iya ni Jesus? Binaton hiya: “Oo Ginoo, maaram ka nga hinigugma ko ikaw.” Salit gin-aghat hiya ni Jesus: “Pakaona an akon nati nga mga karnero.”—Juan 21:15.

Nagpakiana utro hi Jesus: “Simon nga anak ni Juan, hinigugma mo ba ako?” Posible nga nahipapausa hi Pedro, pero sinsero nga binaton hiya: “Oo Ginoo, maaram ka nga hinigugma ko ikaw.” Puropariho la an ginsiring ni Jesus: “Atamana an akon gudtiay nga karnero.”—Juan 21:16.

Ha ikatulo nga higayon, hi Jesus nagpakiana: “Simon nga anak ni Juan, hinigugma mo ba ako?” Yana bangin nahunahuna ni Pedro nga nagruruhaduha hi Jesus han iya pagkamaunungon salit marig-on nga binaton hiya: “Ginoo, maaram ka han ngatanan; maaram ka nga hinigugma ko ikaw.” Makausa pa ginpabug-atan ni Jesus an sadang buhaton ni Pedro: “Pakaona an akon gudtiay nga karnero.” (Juan 21:17) Oo, kinahanglan mangnoan han mga nangunguna an mga karnero nga aada ha toril han Dios.

Gin-aresto ngan ginpatay hi Jesus tungod kay gintuman niya an buruhaton nga iginsugo ha iya han Dios. Ginsumatan ni Jesus hi Pedro nga ito liwat an mahitatabo ha iya. Hi Jesus nagsiring: “Han burobata ka pa, nakakalugaring ka pagbado ngan napakadto ka kon diin mo karuyag. Pero kon lagas ka na, uunaton mo an imo mga kamot ngan iba an magbabado ha imo ngan magdadara ha imo ngadto ha diri mo karuyag.” Bisan pa hito gin-aghat hiya ni Jesus: “Padayon nga sunod ha akon.”—Juan 21:18, 19.

Nakita ni Pedro hi apostol Juan ngan nagpakiana hiya kan Jesus: “Ginoo, ano an bubuhaton hini nga tawo?” Oo, ano an tidaraon hini nga apostol nga pinalangga gud ni Jesus? Binaton hi Jesus: “Kon karuyag ko nga magpadayon hiya tubtob ha akon pagkanhi, kay ano nga mababaraka ka hito?” (Juan 21:21-23) Kinahanglan sumunod hi Pedro kan Jesus ngan diri mabaraka mahitungod ha bubuhaton han iba. Pero iginpapasabot ni Jesus nga hi Juan an kataposan nga mamamatay ha iya mga apostol ngan tatagan han bisyon han pag-abot ni Jesus sugad nga magmarando han Ginhadian.

Syempre, may iba pa nga butang nga ginhimo hi Jesus, nga diri maigo bisan ha damu nga linukot nga basahon.