KAPITE 136
ʼI Te Kauvai ʼo Te Tai ʼo Kalilea
-
ʼE HA IA SESU ʼI TE TAI ʼO KALILEA
-
ʼE TONU KE FAFAGA E PETELO PEA MO ʼIHI IA TE FAGA OVI
ʼI tona po fakaʼosi mo ʼana apositolo, neʼe ui fenei e Sesu kia natou: “ ʼI te hili ʼo toku fakatuʼuake, ʼe au muʼamuʼa anai ia koutou ki Kalilea.” (Mateo 26:32; 28:7, 10) Koia, tokolahi ʼi ʼana tisipulo neʼe natou faifagona ki Kalilea, kaʼe kotea koa ʼae neʼe tonu ke natou fai ʼi ai?
Ki muli age, neʼe ui fenei e Petelo ki te ʼu apositolo ʼe toko ono: “ ʼE au alu ʼo gelu.” Neʼe tali fenei age e te toko ono: “ ʼE matou olo mo koe.” (Soane 21:3) ʼI te po katoa ʼaia neʼe mole natou maʼu he meʼa. ʼI te mafoata, neʼe ha ia Sesu ʼi te matatai, kaʼe neʼe mole natou iloʼi ia ia. Neʼe kalaga fenei ia Sesu: “ ʼU fanau, ʼe ʼi ai koa hakotou meʼa kai?” Neʼe natou tali fenei: “Kailoa!” Neʼe ui fenei e Sesu kia natou: “Kotou ʼaʼau te kupega ʼi te faʼahi mataʼu ʼo te vaka pea ʼe kotou maʼu anai ni ika.” (Soane 21:5, 6) Neʼe lahi te ʼu ika ʼae neʼe natou maʼu, ʼo mole feala ai hanatou toho ake te kupega.
Neʼe ui fenei e Soane kia Petelo: “ ʼE ko te ʼAliki!” (Soane 21:7) Neʼe tui atu aipe e Petelo tona kofu tuʼa, ʼae neʼe ina huʼi lolotoga tana gelu. Neʼe fakato ki te tai ʼo kaugā ia meta ʼe 90 ki te matatai. Neʼe mumuli age ia natou ʼae neʼe ʼi te vaka, he neʼe natou toho mamalie age ki te matatai te kupega ʼae kua fonu ko te ika.
ʼI tanatou tau atu ki te matatai, “neʼe natou sisio ki he afi kua mamala kakaha neʼe tunu ai te ʼu ika, pea mo he ʼu foʼi pane.” Neʼe ui fenei e Sesu kia natou: “Kotou ʼaumai ni ika ʼi te ʼu ika ʼaena neʼe hoki kotou maʼu mai.” Neʼe toho ake e Petelo te kupega, ʼae neʼe fonu ko te ʼu ika lalahi ʼe 153. Neʼe ui fenei e Sesu: “Kotou ʼomai ʼo kakai.” Neʼe mole he tahi ia natou neʼe lototoʼa ke ina fehuʼi fenei age kia te ia: “Ko ai ia koe?” koteʼuhi neʼe natou mahino neʼe ko Sesu. (Soane 21:10-12) Neʼe ko te tuʼa tolu ʼaia ʼo te ha ʼa Sesu ki te ʼu tisipulo ʼe tokolahi.
Neʼe foaki e Sesu kia natou takitahi he moʼi pane pea mo he moʼi ika ke natou kai. ʼI tana lagi sioʼi te ʼu ika ʼae neʼe natou maʼu, neʼe ina fai leva ia te fehuʼi ʼaeni: “Simone, foha ʼo Soane, ʼe ke ʼofa koa ia au ʼo lahi age ʼi te ʼu meʼa ʼaeni?” Neʼe maʼuhiga age koa kia Petelo tana gaue tautai ʼi te gaue ʼae neʼe loto e Sesu ke ina fakahoko? Neʼe tali fenei age e Petelo: “ ʼEi ʼAliki, ʼe ke iloʼi ʼe au ʼofa ia koe.” Neʼe kole fenei age e Sesu ki ai: “Fafaga ʼaku akeno.”—Soane 21:15.
Neʼe toe fai e Sesu te fehuʼi ʼaeni: “Simone, foha ʼo Soane, ʼe ke ʼofa koa ia au?” Neʼe lagi mole mahino ia Petelo ki tana fehuʼi ʼaia pea neʼe ina tali fakamalotoloto fenei age: “ ʼEi ʼAliki, ʼe ke iloʼi ʼe au ʼofa ia koe.” Neʼe toe ui fenei e Sesu: “Tauhi ʼaku kiʼi ovi.”—Soane 21:16.
Neʼe fai e Sesu te fehuʼi ʼaeni, neʼe ko tona tuʼa tolu ʼaia: “Simone, foha ʼo Soane, ʼe ke ʼofa koa ia au?” Neʼe lagi manatu leva ia Petelo ʼe lotolotolua ia Sesu ʼo ʼuhiga mo tana nofo agatonu kia te ia. Neʼe toe tali fakamalotoloto fenei age e Petelo: “ ʼAliki, ʼe ke iloʼi lelei ia meʼa fuli, pea ʼe ke iloʼi ʼe au ʼofa ia koe.” Pea neʼe toe fakaha lelei e Sesu te gaue ʼae neʼe tonu ke fai e Petelo, ʼi tana ui fenei: “Fafaga ʼaku kiʼi ovi.” (Soane 21:17) Koia, ko natou ʼae ʼe takitaki ʼi te kokelekasio ʼe tonu ke natou tauhi ia natou ʼae neʼe taki mai ki te faga ovi ʼa te ʼAtua.
Neʼe fakaha leva e Sesu ʼe hoko anai kia Petelo he ʼu aluʼaga ʼe tatau mo ʼae neʼe tau mo ia: Neʼe haʼi pea neʼe matehi he neʼe ina fai te gaue ʼae neʼe fakatotonu age e te ʼAtua ke ina fai. Neʼe ui fenei age e Sesu: “ ʼI tau kei tupulaga, neʼe ke teuteu tokotahi pea mo ke alu ki he faʼahi pe neʼe ke loto ki ai. Kaʼe ka ke matuʼa, ʼe ke faoʼi anai ʼou nima pea ʼe teuteuʼi anai koe e he tahi age ʼo ina ʼave koe ki he faʼahi ʼe mole ke loto ki ai.” Kaʼe neʼe fakalotomalohiʼi fenei e Sesu ia Petelo: “Haga mulimuli mai ia te au.”—Soane 21:18, 19.
Neʼe sioʼi e Petelo ia te apositolo ko Soane, pea neʼe ina fehuʼi fenei: “ ʼAliki, ʼe feafeaʼi ki te tagata ʼaeni?” ʼEi, kotea anai ka hoko ki te apositolo ʼae neʼe ʼofa tafito ki ai ia Sesu? Neʼe tali fenei e Sesu: “Kapau ʼe au loto ke nofo ʼo kaku ki taku haʼu, kotea tona ʼuhiga kia koe?” (Soane 21:21-23) Neʼe tonu ke mulimuli Petelo ia Sesu pea ke mole hoha ʼo ʼuhiga mo te ʼu meʼa ʼae ka fai e ʼihi. Kaʼe neʼe fakaha e Sesu ʼi ʼana palalau, ʼe ko Soane ʼae ka mate fakamuli anai ʼi te ʼu apositolo pea ʼe ha anai kia ia te haʼu ʼa Sesu ʼi tona ʼuhiga Hau ʼo te Puleʼaga ʼo te ʼAtua.
ʼE mahino papau ia, neʼe lahi te tahi age ʼu meʼa neʼe fai e Sesu, kaʼe neʼe mole feala ke tohi fuli ʼi he ʼu tuʼuga takaiga tohi.