Teʼ tu tsʼook áakʼab tu máansaj Jesús yéetel u apostoloʼoboʼ, tu yaʼalajtiʼob: «Ken tsʼoʼokok in líiʼsaʼaleʼ yaan in bin Galilea táanil tiʼ teʼex» (Mateo 26:32; 28:7, 10). Beoraaʼ yaʼab tiʼ u disipuloʼob tsʼoʼok u binoʼobiʼ, baʼaleʼ ¿baʼax ken u beetoʼobiʼ?

Teʼ kʼiinoʼob jeʼeloʼ, Pedroeʼ tu yaʼalaj tiʼ seis apostoloʼob: «Nikaʼaj chuk kay». Le seis apostoloʼoboʼ tu yaʼaloʼob: «Jeʼel k-bin xan ta wéeteleʼ» (Juan 21:3). Baʼaleʼ tuláakal le áakʼaboʼ maʼ tu chukoʼob mix juntúul kayiʼ. Le táan taal u sáastaloʼ, Jesuseʼ tu chíikbesuba tiʼob tu jáal le jaʼoʼ, chéen baʼaleʼ le disipuloʼoboʼ maʼ tu kʼaj óoltoʼob wa Jesusiʼ, letiʼeʼ tu yaʼalajtiʼob: «Mejen paalaleʼex, ¿máasaʼ minaʼan mix baʼal a jaanteʼex?». Letiʼobeʼ tu núukoʼob: «¡Minaʼan!». Letiʼeʼ tu yaʼalajtiʼob: «Jáaychʼint u redil a chuk kayeʼex tu x-noʼoj le barcooʼ, utiaʼal ka chuuknakeʼex» (Juan 21:5, 6). Ka tu chukoʼob yaʼabkach kayoʼob, maʼatan tak u páajtal u jóoʼsik u redoʼob.

Juan yéetel Pedroeʼ tu yaʼaloʼob: «¡Letiʼe Yuumtsiloʼ!» (Juan 21:7). Ka tu yuʼubaj Pedroeʼ tu takaj u nookʼ, tumen óoliʼ x-maʼ nookʼil kaʼach yanil le táan u chuk kayoʼoboʼ. Ka tu píikchʼintuba ichil le kʼáaʼnáaboʼ ka tu nadartaj kex cien metros utiaʼal u kʼuchul tu yiknal. Le u maasiloʼoboʼ ka joʼopʼ u taal u jíiltikoʼob le red chuup yéetel kayoʼoboʼ.

Ka kʼuchoʼob jáal le jaʼoʼ, tu yiloʼobeʼ «yaan chúuk tʼabaʼaniʼ, yéetel tsʼaʼan kayoʼob tu yóokʼol, bey xan waaj». Jesuseʼ tu yaʼalajtiʼob: «Taaseʼex wa jaytúul tiʼ le kayoʼob táant a chukikeʼexoʼ». Pedroeʼ ka joʼopʼ u jíiltik le redoʼ, yaan 153 nukuch kayoʼob ichil. Jesuseʼ tu yaʼalajtiʼob: «Koʼoteneʼex ukʼul». Mix juntúul tiʼ letiʼob taakchaj u kʼáatiktiʼ, «¿máaxechiʼ?», tumen u yojloʼob Jesús (Juan 21:10-12). Lelaʼ letiʼe u yóoxtéen úuchik u yeʼeskuba tiʼ u disipuloʼob junmúuchʼ yaniloʼoboʼ.

Jesuseʼ tu tsʼáaj waaj tiʼ cada juntúul yéetel kay utiaʼal ka u jaantoʼob. Ka tsʼoʼokeʼ, maʼ xaaneʼ le táan u paktik le kayoʼoboʼ tu yaʼalaj: «Simón u paal Juan, ¿maas wa a yaabiltmen tiʼ le baʼaloʼobaʼ?». ¿Maas wa uts tu yich Pedro u chukik kay ke u beetik le meyaj u kʼáat Jesús ka u beetoʼ? Letiʼeʼ tu núukaj tiʼ Jesús: «Beyoʼ Yuumtsil, techeʼ a wojel in yaabiltmech». Jesús túuneʼ tu yaʼalajtiʼ: «Tséent in walakʼ tamanoʼob» (Juan 21:15).

Jesuseʼ tu kaʼa kʼáatajtiʼ: «Simón u paal Juan, ¿a yaabiltmen wa?». Maʼ xaaneʼ jakʼaʼan u yóol ka tu núukajtiʼ: «Beyoʼ Yuumtsil, techeʼ a wojel in yaabiltmech». Jesús túuneʼ tu kaʼa aʼalajtiʼ: «Kanáant in mejen alakʼ tamanoʼob» (Juan 21:16).

Jesuseʼ tu kʼáatajtiʼ tu yóoxtéen: «Simón u paal Juan, ¿a yaabiltmen wa?». Beoraaʼ maʼ xaaneʼ Pedroeʼ joʼopʼ u tuklik wa maʼ tu creertik Jesús wa jach u yaabiltmaj. Ka tu núukajtiʼ tu jaajil u yóol: «Yuumtsil, techeʼ tuláakal baʼal a wojel; techeʼ jach a wojel in yaabiltmech». Jesuseʼ tu kaʼa aʼalajtiʼ le baʼax unaj u beetkoʼ: «Tséent in mejen alakʼ tamanoʼob» (Juan 21:17). Le máaxoʼob ku tsʼáaikubaʼob táanileʼ, unaj u líiʼskoʼob u yóol u maasil u tamanoʼob Dios.

Jesuseʼ kʼaxaʼabi yéetel kíimsaʼab úuchik u beetik le baʼax túuxtaʼab u beet tumen Diosoʼ. Beoraaʼ ku yaʼalik tiʼ Pedro yaan u beetik xan junpʼéel meyaj beyoʼ. Tu yaʼalajtiʼ: «Kaʼach maas táankelmecheʼ, ta juunal ka takik a nookʼ yéetel ka bin jeʼel tuʼuxak a kʼáateʼ. Baʼaleʼ ken chʼíijkecheʼ yaan a tichʼik a kʼaboʼob yéetel yaanal máax kun takiktech a nookʼ, yéetel yaan u kuchkech utiaʼal u bisech tuʼux maʼ a kʼáatiʼ». Baʼaleʼ Jesuseʼ tu yaʼalaj: «Maʼ u xuʼulul a taal tin paach» (Juan 21:18, 19).

Pedroeʼ tu paktaj apóstol Juaneʼ ka tu kʼáataj tiʼ Jesús: «Yuumtsil, ¿kux túun lelaʼ, baʼax ken u beete?». Jach beyoʼ, ¿baʼax ken u beet le apóstol jach yaabiltaʼan tumen Jesusoʼ? Letiʼeʼ tu núukajtiʼ: «Wa in kʼáat ka pʼáatak tak ken suunakeneʼ, techeʼ  ¿baʼax yanech a wiliʼ?» (Juan 21:21-23). Pedroeʼ unaj u seguer u tsaypachtik Jesús kex jeʼel baʼalak ka u beet u maasileʼ. Kex beyoʼ, Jesuseʼ tu yaʼaleʼ Juaneʼ letiʼ kun tsʼok kíimil tiʼ u maasil apostoloʼoboʼ yéetel yaan u tsʼaʼabal u yil bix kun taal Cristo yéetel u páajtalil u Reino Dios.

Baʼaleʼ yaan uláakʼ baʼaxoʼob tu beetaj Jesús maʼ tsʼíibtaʼaboʼobiʼ.