Mumi klɔuklɔu ɔ nɛ Yesu kɛ pue kaseli ɔmɛ a nɔ benɛ e ho hiɔwe ya a we ligbi nyɔngma se ngɛ Pentekoste ligbi ɔ nɔ ɔ ji odase nɛ tsɔɔ kaa Yesu ngɛ hiɔwe niinɛ. Pee se ɔ, kaseli ɔmɛ ma ná odase kpa ko hu nɛ tsɔɔ kaa Yesu ngɛ hiɔwe. Loko a maa fiaa kaselɔ Stefano tɛ nɛ a gbe lɛ ngɛ anɔkuale yemi nɛ e kɛ ye Yesu he odase ɔ he ɔ, e de ke: “Nyɛɛ hyɛ, i na hiɔwe nya nɛ bli nɛ Nɔmlɔ Bi ɔ daa si ngɛ Mawu hiɔ nɔ.”​​—Bɔfo Ɔmɛ A Ní Tsumi 7:56.

Be mi nɛ Yesu ngɛ e Tsɛ ɔ ngɔ ngɛ hiɔwe ɔ, e maa ya nɔ maa mlɛ kɛ ya si be nɛ e Tsɛ ɔ ma de lɛ ní pɔtɛɛ komɛ kaa bɔ nɛ a ngma ngɛ Mawu Munyu ɔ mi ɔ. Mumi ɔ ba David nɔ nɛ e ngma ke: ‘Yehowa de ye Nyɔmtsɛ ɔ [Yesu] ke, “Hii si ngɛ ye hiɔ nɔ kɛ yaa si be nɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa nɔ.”’ Ke be nɛ e kɛ maa mlɛ ɔ ba nyagbe ɔ, e maa ‘ye e he nyɛli ɔmɛ a nɔ.’ (La 110:1, 2) Se loko Yesu maa ye e he nyɛli ɔmɛ a nɔ ɔ, mɛni e maa pee ngɛ zugba a nɔ?

A to Kristofohi asafo ɔ sisi ngɛ jeha 33 ngɛ Pentekoste ligbi ɔ nɔ. Kɛ je jamɛ a be ɔ, Yesu bɔni kaseli nɛ a ngɔ mumi klɔuklɔu ɔ kɛ pɔ mɛ nu ɔ a nɔ yemi. (Kolose Bi 1:13) E ye bua mɛ ngɛ fiɛɛmi ní tsumi ɔ mi, nɛ e dla mɛ kɛ ha ní tsumi kpa ko nɛ a ma tsu hwɔɔ se. Mɛni ji jamɛ a ní tsumi ɔ? Kaseli ɔmɛ a kpɛti nihi nɛ a maa ye anɔkuale kɛ ya si a gbenɔ mi ɔ, a ma tle mɛ si nɛ a ma ya piɛɛ Yesu he ngɛ hiɔwe ngɛ Matsɛ Yemi ɔ mi kɛ ye matsɛ.

Nɔ ko nɛ e pee nɔ hyɛmi nɔ́ kpakpa nɛ e maa piɛɛ Yesu he kɛ ye matsɛ ji Saulo, nɛ a le lɛ wawɛɛ kɛ e Roma biɛ nɛ ji Paulo ɔ. Yuda no ji lɛ, nɛ jinɛ e hɛ dɔɔ ngɛ Mawu Mlaa a nɔ yemi he, se jami nya dali ɔmɛ tsɔɔ we lɛ blɔ kpakpa, nɛ be ko po ɔ, e ha nɛ a gbe Stefano. E ‘wa Nyɔmtsɛ ɔ se nyɛɛli ɔmɛ a yi mi; nɛ e wo a he gbeye kaa e ma pue a muɔ si.’ E ya ngɔ womi ngɛ Osɔfo nɔkɔtɔma pe kulaa Kayafa dɛ, konɛ e ya nuu Yesu kaseli ɔmɛ ngɛ Damasko kɛ ba Yerusalem. (Bɔfo Ɔmɛ A Ní Tsumi 7:58; 9:1) Se benɛ Saulo ngɛ blɔ nɔ kɛ yaa a, la ko nɛ nya wa saminya kpɛ kɛ bɔle lɛ, nɛ e nɔ si.

Kɛkɛ nɛ gbi ko nɛ e li he nɛ e je de ke: ‘Saulo, Saulo, mɛ ni he je o ngɛ mi yi mi wae ɔ?’ Saulo he nɔ ke: “Nyɔmtsɛ, mo mɛnɔ?” Gbi ɔ de lɛ ke: “Imi ji  Yesu, nɔ nɛ o ngɛ lɛ yi mi wae ɔ nɛ!”​​—Bɔfo Ɔmɛ A Ní Tsumi 9:4, 5.

Yesu de Saulo ke e ya Damasko nɛ e ya mlɛ ngɛ lejɛ ɔ kɛ ya si be nɛ a maa tsɔɔ lɛ nɔ́ nɛ e pee. Se jamɛ a be ɔ mi ɔ, nɔ ko lɛ kpaka lɛ kɛ ya ejakaa la nɛ kpɛ pue e nɔ ɔ ha nɛ e hɛngmɛ yu. Pee se ɔ, Yesu je e he kpo ngɛ nina mi kɛ tsɔɔ kaselɔ ko nɛ a tsɛɛ lɛ Anania nɛ e ngɛ Damasko ɔ. Yesu tsɔɔ lɛ he nɛ e maa na Saulo ngɛ. Jinɛ Anania sume kaa e maa ya, se Yesu de lɛ ke: “Nɔ nɛ ɔ, imi nɛ i hla lɛ nɛ e sɔmɔ mi, nɛ e ya fiɛɛ ye he sane ha ma je li, matsɛmɛ, kɛ Israel ma a tsuo.” Saulo hɛngmɛ bli ngɛ Damasko, nɛ ‘e bɔni fiɛɛmi jamɛ a be ɔ nɔuu ke Yesu ji Mawu Bi ɔ nɛ.’​​—Bɔfo Ɔmɛ A Ní Tsumi 9:15, 20.

Ngɛ Yesu yemi kɛ buami nya a, Paulo kɛ kaseli kpa amɛ tsa fiɛɛmi ní tsumi nɛ Yesu je sisi ɔ nɔ. Mawu jɔɔ a fiɛɛmi ní tsumi ɔ nɔ nɛ e wo yiblii babauu. Maa pee jeha 25 se kɛ je benɛ Yesu je e he kpo kɛ tsɔɔ Paulo ngɛ Damasko blɔ ɔ nɔ ɔ, e ngma kaa ‘a fiɛɛ sane kpakpa a kɛ tsɔɔ bɔ níhi tsuo ngɛ je ɔ mi.’​​—Kolose Bi 1:23.

Jeha komɛ a se ɔ, Yesu ha nɛ bɔfo Yohane nɛ e suɔ lɛ wawɛɛ ɔ na nina komɛ, nɛ lɛ tsuo ngɛ Baiblo ɔ mi ngɛ Kpojemi womi ɔ mi. Kɛ gu nina nɛ ɔmɛ a nɔ ɔ, Yohane hi si nɛ e na Yesu nɛ e kpale ba kaa matsɛ. (Yohane 21:22) ‘Kɛ gu mumi ɔ nɔ ɔ, [Yohane] na Nyɔmtsɛ ɔ ligbi ɔ.’ (Kpojemi 1:10) Mɛni be nɛ Nyɔmtsɛ ɔ ligbi ɔ je sisi?

Baiblo gbamihi tsɔɔ kaa “Nyɔmtsɛ ɔ ligbi ɔ” je sisi ngɛ wa be nɛ ɔ mi. Kekleekle Je Mi Ta a fɛ ngɛ jeha 1914 mi. Kɛ je jamɛ a be ɔ mi kɛ ma nɛ ɔ, ta hwumi, gbenɔ hiɔ, hwɔ, zugba mimiɛmi, kɛ ní kpahi ngɛ nɔ yae ngɛ je ɔ mi tsuo. Enɛ ɔ he ɔ, “okadi” nɛ Yesu tsɔɔ e kaseli ɔmɛ kaa lɔ ɔmɛ lɛ maa tsɔɔ e ‘bami be’ kɛ je nɛ ɔ “nyagbe ɔ” ngɛ mi bae. (Mateo 24:3, 7, 8, 14) Amlɔ nɛ ɔ, pi Roma Nɔ Yemi ɔ mi pɛ nɛ a ngɛ Matsɛ Yemi ɔ he sane kpakpa a fiɛɛe ngɛ, mohu ɔ, a ngɛ fiɛɛe ngɛ je ɔ mi he tsuaa he.

Kɛ gu mumi klɔuklɔu ɔ nɔ ɔ, Yohane ngma ke: “Jehanɛ ɔ lɛɛ yi wami hemi ba! Jehanɛ ɔ lɛɛ Mawu maa ngɔ e he wami kpetekpleenyɛ ɔ kɛ ye matsɛ! Jehanɛ ɔ lɛɛ e Kristo he wami ɔ je kpo.” (Kpojemi 12:10) Niinɛ, Mawu Matsɛ Yemi ɔ nɛ ngɛ hiɔwe, nɛ Yesu ba fiɛɛ ɔ, ngɛ nɔ yee nitsɛnitsɛ!

Enɛ ɔ ji bua jɔmi sane kɛ ha Yesu se nyɛɛli anɔkualetsɛmɛ tsuo. A ma nyɛ ma he Yohane munyu nɛ ɔ maa ye. E de ke: “Lɔ ɔ he ɔ, nyɛ nihi tsuo nɛ nyɛ ngɛ hiɔwe ɔ, nyɛ bua nɛ jɔ! Se je ɔ, kɛ wo, nyɛɛ lɛɛ musu tloo nyɛ! Abosiami kple si kɛ ba nyɛ ngɔ. E mi mi fu wawɛɛ, ejakaa e le kaa be bɔɔ kɛkɛ nɛ piɛ ha lɛ.”​​—Kpojemi 12:12.

Amlɔ nɛ ɔ, pi nɛ Yesu ngɛ mlɛe ngɛ e Tsɛ ɔ hiɔ nɔ, mohu ɔ, e ngɛ Matsɛ yee, nɛ e be kɛe nɛ e ma kpata e he nyɛli tsuo a hɛ mi. (Hebri Bi 10:12, 13) Ngɛ enɛ ɔ se ɔ, mɛni ní kpakpahi nɛ Matsɛ Yesu maa pee ha wɔ?