Jesusan alajjpacharu makatjjatapat tunka urunak qhepatjja, Pentecostés urunwa espíritu santo katoqapjjäna. Ukaw Jesusajj cheqpachapuni alajjpachankjjatap uñachtʼayäna. Ukampis janiw ukak paskänti, Esteban discipulor taqe chuyma yatiyatapat qalamp kʼupjasa janïr jiwayapkäna ukhajja, jupajj akham sänwa: “¡Uñtapjjam! Alajjpach jistʼartat uñjta, jaqen Yoqaparus Diosan kupëjjapar saytʼatwa uñjarakta” sasa (Hechos 7:56).

Jesusajj alajjpachan Awkipampïskäna ukhajja, kunatï Diosan Arupan qellqatäki uka arunakan phoqasiñap suyañapänwa. David chachajj akham sasaw Diosan amuytʼayatäsajj qellqäna: “[Jehová] Tatitojj [Jesús] Reyejjarojj sänwa: ‘Kupëjjajjar qontʼasim, [enemigonakamar] takjjatayañajjkama’ sasa”. Uka suyañ tiempo pasatatjja, Jesusajj enemigonakapar juzgañatakiw mistuñapäna (Salmo 110:1, 2). Ukampis enemigonakap contra janïra saytʼkasajja, ¿kunsa Jesusajj luräna?

Cristiano congregacionajj Pentecostés 33 maranwa uttʼayasïna. Jesusajj alajjpachatwa espíritu santompi ajllitanakapar apnaqaña, jan ukajj gobiernañ qalltjjäna (Colosenses 1:13). Jupanakjjarojj Jehová Diosan Arupat yatiyañanwa pʼeqtʼäna, kuntï jutïrin lurapjjañapäkäna ukatakiw wakichtʼarakïna. ¿Kunsa jupanakajj jutïrin lurapjjañapäna? Diosat jan jitheqtas jiwapkäna ukanakajja, jaktayatäsajj Reinonwa Jesusamp chika apnaqapjjañapäna.

Jesusamp chika reyjam apnaqerinakat maynejj Saulo sutiniwa. Jupajj Pablo sutimpiw jukʼamp uñtʼatäna, ukajj romano sutiwa. Jupajj judío jaqënwa, walja tiemporakiw Diosan Leyip taqe chuyma phoqäna, ukampis judío religionan pʼeqtʼirinakapan yatichäwinakapamp pantjatänwa, ukatwa Estebanar qalampi kʼupjañajj walikiw säna. Jupajj ‘Tatitun discipulonakapar tʼaqesiyaña jiwayañwa munäna’. Ukatwa Caifás jachʼa jilïr sacerdoten ukar sarasajj Damasco markan utjkäna uka Jesusan discipulonakapar katuntañ mayïna, ukhamat jupanakarojj Jerusalenar apañataki (Hechos 7:58; 9:1). Ukampis thak sarkipanjja, akatjamatwa mä qhanajj jupjjar wal qhantʼanïna, jupajj oraqeruw jaqosïna.

 Ukatjja mä aruw akham säna: “¿Saulo, Saulo, kunatsa jan waltʼayañatak nayar arknaqesta?” sasa. Saulojj sarakïnwa: “¿Tata, jumajj khitïtasa?” sasa. “Nayajj Jesusätwa, nayaruw jumajj jan waltʼayañatak arknaqaskistajja” sasaw uka arojj jaysarakïna (Hechos 9:4, 5).

Jesusan mayitaparjamajja, Pablojj Damascoruw mantañapäna, ukhamat kun lurañapas jupan wakisi uk yatiyapjjañapataki. Jupasti mä akatjamat uñstir qhanampi chʼamaktʼatajj janiw uñj-jjänti, maynin irpatarakiw uka markar saräna. Yaqha visionanjja, Jesusajj Ananiasaruw uñstäna, jupajj Damasco markan jakiri mä discipulönwa. Juparuw Jesusajj Saulor jikjjataniñapatak mä cheqar khitäna. Ananiasajj sarañ ajjsarayasïnwa, ukampis Jesusajj akham sänwa: “Jupasti nayatakejj mä ajllit vasowa, ukhamat yaqha markanakaru reyinakaru ukhamarak Israel markaru sutij apañapataki” sasa. Saulojj uñj-jjänwa, Damasco markanwa “Jesusat yatiyañ qalltäna, jupajj Diosan Yoqapawa sasaw yatiyäna” (Hechos 9:15, 20).

Jesusaw Diosan arunakap yatiyañ qalltäna. Ukhamasti Jesusan yanaptʼapampejja Pablompi mayni yatiyirinakampejj yatiyasipkakïnwa. Diosasti jupanakarojj bendisiskakïnwa. Jesusajj Pablor thakin uñstkäna ukhatjja niya 25 maranakaw pasjjäna, ukapachaw apóstol Pablojj “suma yatiyäwinakajj oraqpachanwa yatiyasjje” sasin qellqäna (Colosenses 1:23).

Walja maranak qhepatjja, Jesusajj walja visionanakwa munat Juan apostoloparojj uñjayäna, taqe ukanakajj Apocalipsis libron qellqatawa. Uka visionanakanjja Juanajj Jesusaruw Reyjam jutaskir uñjäna, ukhamasti qhepakamaw jakpachäna (Juan 21:22). ‘Espíritu santow Juanarojj Tatitun urupar irpäna’ (Apocalipsis 1:10). ¿Kunapachas ‘Tatitun urupajj’ qalltäna?

Biblian profecianakap wali amuyumpi yatjjatasajja, ‘Tatitun urupajj’ 1914 maranwa qalltäna. Uka maraw Primera Guerra Mundialajj qalltäna. Ukjjar jutïr maranakanjja, jukʼampiw guerranakasa, usunakasa, manqʼat pistʼañanakasa, terremotonakas utjawayi. Taqe ukanakaw ‘kuna señaltï’ Jesusajj apostolonakapar ‘kuttʼaniñapata’ ukhamarak ‘akapachan tukusiñapampit’ parlkäna ukajj phoqasiskatap uñachtʼayi (Mateo 24:3, 7, 8, 14). Jichhürunakanjja Reinot suma yatiyäwinakajj janiw Roma markanak yatiyaskiti, jan ukasti oraqpachanwa yatiyasiski.

Apóstol Juanajj akham sasaw uka toqet espíritu santon yanaptʼatajj qellqäna: “Diosasajj jaqenakaruw salvi, jupan jachʼa chʼamapaw uñjasiraki. Reinopajj apnaqañwa qalltjje, Cristopas munañanëjjarakiwa” sasa (Apocalipsis 12:10). Ukhamasti alajjpachankir Diosan Reinopajj apnaqjjewa, Jesusajj aka oraqenkkasajj uka toqetwa parlirïna.

Ukajja Jesusat jan jitheqtir discipulonakapatakejj suma yatiyäwiwa. Jupanakajj Juan apostoljamarakiw akham sapjjaspa: “Alajjpachanakasa ukan jakirinakasa ¡kusisipjjam! Oraqesa lamar qotasa ¡ay kunakïkani! Diablojj jukʼa tiemponikïtap yatisajja wali colerataw jumanakan ukarojj saraqani” sasa (Apocalipsis 12:12).

Jesusajja janiw alajjpachankir Awkipan kupëjjapan qontʼat suykiti. Jan ukasti jupajj Reyjamaw apnaqaski, niyarakiw enemigonakapar tʼunjani (Hebreos 10:12, 13). Ukhamajj ¿kunanakas jutïrin paspachäni?