Jôm li dilo i mbus le Yésu a nke i ngii, baôma ba nkôhna mbuu mpubi u u nkwés bo nkaa le Yésu a yé ngii. Jam lipe li li bé lama yis bo le Yésu a yé ngii li bé njel. Ndék ngéda ilole ba ñôm nnigil Stéfanô ngok inyu hémle yé, a nkal le: “Nuna-ki! Me yé i tehe ngii i nyibla, ni Man mut a téé i woo walôm u Nyambe.”​—Minson mi baôma 7:56.

Mu kiki Yésu a bé i ngii lôñni Isañ, a bé lama bem i oda i bi tina ikété Bitilna. Ni njel mbuu mpubi, David a bi tila le: “Yéhôva a nkal Nwet wem [Yésu] le: ‘Yén woo wem walôm, letee me yilha babala boñ kéhne makôô moñ.’” I mbus le ngéda i bi mal, a bé lama ‘ke énél ngembe baoo bé.’ (Tjémbi 110:1, 2) Iloole ngéda i nkola inyu lo i tjé baoo bé, kii Yésu a bé lama boñ i ngii?

I Ngwa Pentékôt i nwii 33 N.Y., likoda li bikristen li bi tééba. Nyoo i ngii, Yésu a bi bôdôl ane minhook nwé mi bikristen. (Kôlôsé 1:13) A bi éga bo i nson u ñañ nlam, a kôôba ki bo inyu nson u tôbôtôbô ba bé lama boñ nyoo i ngii. Umbe nson? I bet ba bé lama téñbe ikepam i nyemb, ba bé lama tuge inyu ane ni Yésu i ngii ibale ba téñbe ikepam i nyemb.

Saulô, nu a nlôôha nyiba ni jôl jé li Lôk Rôma le Paul, a yé loñge ndémbél i bôt ba yé ipôla bikiñe bi. Ndémbél yé i nhélés bés. A bé man Lôk Yuda, nu a bééna makénd ngandak inyu Mbén Djob, ndi baéga bibase ba Lôk Yuda ba bi lôôha yumus nye, a yoñ ki ngaba i nol Stéfanô. Mu kii a bé “pélék ni hiun ni manola ikolba banigil ba Nwet,” a kee i Damaskô. Prisi keñi le Kaifa, i bi ti nye kunde i gwel banigil ba Yésu, ni i kena bo i Yérusalem. (Minson mi baôma 7:58; 9:1) Ndi ngéda Saulô a bé njel, mapubi ma ma bé lôôha bai, ma bi kéña nye, a kwo.

Kiñ i lôlak i ngii i kal nye le: “A Saulô, a Saulô, inyuki u ntééñga me?” Ni Saulô a bat le: “U yé njee, a Nwet?” Ni kiñ i timbhe le: “Men me yé Yésu, nu u yé i tééñga.”​—Minson mi baôma 9:4, 5.

Yésu a bi kal Saulô le a kee i Damaskô, a  bem maéba, ndi lakii mapubi ma bi kwés nye ndim, bôt ba bé lama kena nye mu tison i. Ikété yiinda ipe, Yésu a bi pémél Anania, wada ikété banigil bé nu a bé niñ i Damaskô. Yésu a kal Anania le a kee ngim homa i koba Saulô. Anania a bé kon woñi, ndi Yésu a bi ti nye makénd, a kal nye le: “I mut nunu a yé kiki ébél me mal pohol inyu añal jôl jem i biloñ bipe, i bisu bi bikiñe lôñni bon ba Israel.” I mbus le Saulô a bi témb a bôdôl tehna, ha i tison i Damaskô, ‘a bi bôdôl téé likalô inyu Yésu . . . a kalak le a yé Man Nyambe.’​—Minson mi baôma 9:15, 20.

Ni mahôla ma Yésu, Paul ni baañal bape ba bi ke ni bisu i añal ñañ nlam, nson Yésu a bi bôdôl. Djob a bi sayap bo iloo héga. I mbus 25 nwii le Yésu a bi pémél nye i njel Damaskô, Paul a bi tila le ñañ nlam u bi añlana “bihégél gwobisôna hana nkoñ isi.”​—Kôlôsé 1:23.

Ngandak nwii i mbus ngéda, Yésu a bi ti Yôhanes, ñôma nu a bé gwés ngandak, biyiinda di nléba ikété kaat Masoola. Ni njel biyiinda bi, i bé wengoñle Yôhanes a bi niñ ipam ngéda Yésu a yoñ Ane. (Yôhanes 21:22) ‘Ni ngui i mbuu mpubi, [Yôhanes] a bi léba le a yé i hilo hi Nwet.’ (Masoola 1:10) Hilo hi hi ga ba kekii?

Njôôñ yigil i Bibel i ñunda le “hilo hi Nwet” hi bi bôdôl i nwii 1914. I nwii u, Gwét bi Ntôla bi bisu bi bi bôô. Ibôdôl ha, nkoñ isi u bi kahal bana ngandak gwét, makon, nyemb ni nyeñg disi. I likala likeñi, i mam ma ni mape ki ma nyônôs “yimbne” Yésu a bi ti baôma bé inyu unda le “a yé ha” ni le “mamélél” ma hiai hini ma nlo. (Matéô 24:3, 7, 8, 14) I len ini, nson u ñañ nlam u Ane u ñañlana ndik bé i mabôga ma nkoñ u Rôma, ndi i nkoñ isi wonsôna.

Ni njel mbuu mpubi, Yôhanes a bi ti ndoñi i mam ma, a bi kal le: “Nano tohi i mal lo, ni lipémba, ni Ane i Nyambe wés, ni énél i Kristô wé.” (Masoola 12:10) Ni maliga, Ane Djob i Yésu a bi añal ni makénd momasôna, i yé ntiik!

Hala a yé loñge nwin inyu bañga banigil i Yésu yosôna. Ba nla tééda bibañga bi Yôhanes bini le: “Inyu hala nyen kona maséé, a ngii ni bé ba ni nyééne nyoo! Ngoo ni hisi lôñni tuye, inyule Nsohop a nsôs i bééni, a ban-ga hiun hikeñi, a yik le a gwé ndik ndék ngéda.”​—Masoola 12:12.

Nano, Yésu a ta ha bé bem i woo walôm u Isañ. A mbôdôl ane, ndék ngéda a ga tjé baoo bé bobasôna. (Lôk Héber 10:12, 13) Mambe mam malam ma mbem bés?