Sampulu ari dungkon tarangkat Jesus tu banua ginjang, dilehon ibana do tondi parbadia tu angka siseanna di ari Pentakosta. On patuduhon nunga di surgo Jesus. Asing ni i, tingki naeng didangguri si Stepanus, didok ibana do, “Huida do bungka langit i jala jongjong do Anak ni jolma i di siamun ni Debata.”​—Ulaon ni Apostel 7:56.

Nunga di banua ginjang Jesus rap dohot Amana. Dipaima ibana do parenta sian Debata songon naung disurirangkon di buku Psalmen. Didok do disi, “Nunga didok Jahowa mandok Tuhanku [Jesus]: Hundul ma Ho tu siamunhon, paima hubahen angka musum sidegedegean ni patmu.” Di tingki i, ‘mangarajai ma ibana di tongatonga ni musuna’. (Psalmen 110:1, 2) Alai andorang so ditaluhon Jesus musuna, aha do na diulahon ibana di surgo?

Di perayaan Pentakosta taon 33 M ma jongjong huria Kristen. Diurupi Jesus ma sian surgo angka siseanna na dipillit marhite tondi parbadia. (Kolosse 1:13) Diurupi ma nasida asa denggan marbarita jala rade mangulahon ulaon ni nasida di ari na naeng ro. Ulaon aha? Molo dioloi nasida Debata sahat tu na mate, dipahehe ma nasida laho mamarenta dohot Jesus di Harajaon i.

Sahalak sian sisean ni Jesus, i ma si Saulus na jotjot digoari si Paulus di bahasa Rom. Halak Jahudi do ibana jala holong do rohana tu Patik ni Debata. Alai tingki so gabe sisean, diihuthon ibana do na diajarhon pamimpin agama Jahudi. Jala las do rohana tingki didangguri si Stepanus. Laho do ibana tu Damaskus, diancam ibana do “angka sisean ni Tuan jala sai marsitutu do ibana naeng mambunu nasida”. Diloas Sintua ni Malim Kayapas do ibana manangkup angka sisean ni Jesus jala mamboan nasida tu Jerusalem. (Ulaon ni Apostel 7:58; 9:1) Alai tingki di pardalanan ibana, tompu ma ro sinondang sian langit tu humaliangna jala dabu ma ibana tu tano.

Dung i dibege ma soara na mandok, “Saulus, Saulus, boasa dibahen ho na hansit tu ahu?” Didok si Saulus ma, “Ise do ho Tuan?” Didok  soara i ma, “Jesus do ahu, na pinaporsuk-porsukmi.”​—Ulaon ni Apostel 9:4, 5.

Disuru Jesus ma asa laho si Saulus tu Damaskus jala disi ma ibana paimahon. Alai ingkon ditogu-togu do ibana tu Damaskus, ala gabe mapitung do ibana dibahen sinondang i. Di inganan na asing, mandapot parnidaan ma si Ananias sisean ni Jesus na tading di Damaskus. Di parnidaan i, disuru Jesus ma si Ananias mangalului si Saulus. Mulana ndang olo si Ananias. Alai didok Jesus ma tu ibana, “Laho ma ho! Ai nunga hupillit ibana mamboan goarhu tu angka bangso, tu angka raja dohot tu halak Israel.” Dung marnida muse si Saulus, dibaritahon ibana ma di Damaskus na “Anak ni Debata do Jesus i”.​—Ulaon ni Apostel 9:15, 20.

Diurupi Jesus do si Paulus dohot angka sisean na asing asa tongtong marbarita. Dipasu-pasu Debata do na diulahon nasida. Hira-hira 25 taon dung dipataridahon Jesus dirina tu si Paulus, didok ibana do nunga dibaritahon barita na uli “tu sude tompaan na di tano on”.​—Kolosse 1:23.

Martaon-taon dungkon i, dilehon Jesus ma parnidaan tu apostel Johannes na dihaholongi ibana. Disurat ma parnidaan i di buku Pangungkapon. Di parnidaan i diida si Johannes do ro Jesus di Harajaonna. Boi ma didok, mangolu do apostel Johannes “sahat tu na ro” Jesus. (Johannes 21:22) “Marhite panogu-noguon ni tondi parbadia, diboan ma [si Johannes] tu ari ni Tuan i.” (Pangungkapon 1:10) Andigan do i?

Molo dipareso surirang taringot “ari ni Tuan i”, taboto ma i masa taon 1914. Masa ma di tingki i Porang Dunia I. Mulai sian i, godang ma masa di liat portibi on porang, haraparon, sahit, gempa bumi, dohot angka na asing. On ma angka “tanda” na dipaboa Jesus tu angka apostelna tingki paboahon taringot ‘harorona’ dohot taringot “panutup ni jaman on”. (Mateus 24:3, 7, 8, 14) Asing ni i, dibaritahon do barita na uli taringot Harajaon ni Debata di liat portibi on, ndang holan di luat na dirajai Rom.

Dipaboa si Johannes ma lapatanna molo nunga masa songon i, “Nunga ro haluaon sian Debata tu jolma. Nunga dipatuduhon huasona, nunga dipajongjong Harajaonna jala nunga marhuaso Kristusna.” (Pangungkapon 12:10) Tangkas ma nunga mamarenta Harajaon ni Debata di surgo. On ma na dibaritahon Jesus najolo.

Las ma roha ni angka sisean ni Jesus mambege i. Diingot nasida ma hata ni si Johannes na mandok, “Marlas ni roha ma ho ale banua ginjang dohot sude hamu na maringanan disi! Alai marjea ma tano i dohot laut i! Ai nunga turun Sibolis i tu ho, jala muruk situtu do ibana, ai nunga diboto ibana otik nama tingkina.”​—Pangungkapon 12:12.

Alani i, ndang holan na maima-ima be Jesus di siamun ni Debata. Ai nunga mamarenta ibana gabe raja. Jala laho ditaluhon ibana nama angka musuna. (Heber 10:12, 13) Aha ma laba ni i tu hita?