Kɛ Zezi ɔli ɲanmiɛn su m’ɔ dili cɛn ba blu’n, Ɲanmiɛn fɛli i wawɛ’n mannin Zezi i sɔnnzɔnfuɛ mun Pantekɔtu cɛn’n nun. I sɔ’n kleli kɛ Zezi w’a ɔ ɲanmiɛn su sakpa. Sanngɛ sa kun ekun kleli sɔ wie. Yɛle kɛ, kwlaa naan b’a finfin Zezi i sɔnnzɔnfuɛ Etiɛnin i yɔbuɛ Ɲanmiɛn ndɛ m’ɔ kannin’n ti’n, ɔ seli kɛ: “An nian! N wun kɛ ɲanmiɛn su lɔ’n w’a tike. Yɛ Sran wa’n jin Ɲanmiɛn i sa fama su.”​—Sa Nga Be Yoli’n 7:56.

Kɛ Zezi ɔli i Si’n i wun lɔ ɲanmiɛn su lɔ’n, ɔ minndɛli kɛ ndɛ kun m’ɔ o Ɲanmiɛn Ndɛ’n nun’n, ɔ kpɛn su. I nun mɔ Zezi o asiɛ’n su wa’n, ɔ boli i su ndɛ kun mɔ Ɲanmiɛn maan Davidi klɛli’n su. Ɔ seli kɛ: “Zoova seli min Min [Zezi] kɛ: ‘Tran ase min sa fama su lele maan n fa ɔ kpɔfuɛ mun n sie ɔ ja bo.’” Kɛ blɛ ng’ɔ fata kɛ Zezi minndɛ’n ko wie’n, ɔ́ wá ‘tíɛ i kpɔfuɛ’m be su.’ (Matie 22:44; Jue Mun 110:1, 2) ?Sanngɛ lele naan blɛ nga Zezi núnnún i kpɔfuɛ mun’n w’a ju’n, ngue yɛ ɔ́ yó i ɲanmiɛn su lɔ-ɔ?

Afuɛ 33 nun Pantekɔtu’n nun’n, Ɲanmiɛn fali Zezi i sɔnnzɔnfuɛ mun kacili i nvle. Kɛ ɔ fɛ i lɛ’n, Zezi boli i sɔnnzɔnfuɛ sɔ mɔ Ɲanmiɛn wawɛ’n wo be su’n be sielɛ bo. (Kolɔsufuɛ Mun 1:13) Ɔ kleli be wafa ng’ɔ fata kɛ be bo jasin’n. Asa ekun’n, ɔ kleli be junman nga bé wá dí’n. ?Junman sɔ’n yɛle benin? Yɛle kɛ be nin Zezi bé wá dí famiɛn. Sanngɛ saan be nga be su Ɲanmiɛn nanwlɛ su lele be wu’n yɛ bé cɛ́n be naan b’a kwla di junman sɔ’n niɔn.

Be nga be nin Zezi bé wá dí famiɛn’n be nun kun yɛle Sɔlu. I Rɔmun dunman yɛle Pɔlu. Ɔ ti Zuifu, yɛ ɔ tu i klun nanti Ɲanmiɛn i Mmla’n su. Sanngɛ like nga Zuifu’m be Ɲanmiɛn sulɛ wafa’m be su kpɛn’m be kleli i’n ti’n kɛ be kunnin Etiɛnin’n, ɔ yoli i fɛ. I sin’n, Sɔlu m’ɔ ‘wla e Min’n i sɔnnzɔnfuɛ’m be srɛ, kpɛkun ɔ kun be’n,’ ɔ ɔli Damasi. Kaifu m’ɔ ti Ɲanmiɛn ɲrun jranfuɛ dan’n mɛnnin i atin naan ɔ ko tra be, naan ɔ fa be bla Zerizalɛmun. (Sa Nga Be Yoli’n 7:58; 9:1) Kɛ ɔ fali atin’n m’ɔ́ kɔ́ Damasi’n, ɲanmiɛn’n kpajali piaa guɛli i su naan w’a fin ase.

Kpɛkun ɔ tili sran kun nɛn ɲanmiɛn su lɔ. Sran sɔ’n seli i kɛ: “?Sɔlu, Sɔlu, ngue ti yɛ a kle min yalɛ-ɔ?” Sɔlu usali kɛ: “?Nannan, wan yɛle wɔ?” Sran’n tɛli Sɔlu su kɛ: “Min Zezi-ɔ. Min yɛ a kle min yalɛ’n niɔn.”​—Sa Nga Be Yoli’n 9:4, 5.

Zezi seli Sɔlu kɛ ɔ wɔ Damasi naan bé wá klé i like ng’ɔ fata kɛ ɔ yo’n. Sɔlu jasoli. Sanngɛ ɲanmiɛn m’ɔ kpɛjɛli i su piaa’n ti’n, w’a wunman ase kun. Ɔ maan  be trɛli i sa’n, naan b’a fɛ i b’a ɔ Damasi. I sin’n, aolia nun’n, Zezi fiteli i sɔnnzɔnfuɛ kun m’ɔ o Damasi lɔ’n, i ɲrun. Be flɛ i Ananiasi. Zezi kleli i lika ng’ɔ fata kɛ ɔ wɔ naan w’a wun Sɔlu’n. Ananiasi i klun titili i. Sanngɛ Zezi guɛli i awlɛn su nzue. Ɔ seli i kɛ: “N kpali bian sɔ’n kɛ ɔ bo min dunman kle be nga be timan Zuifu’n nin famiɛn mun, ɔ nin Izraɛlifuɛ mun.” Yɛ Ananiasi ɔli-ɔ. Ɔ ko yoli maan Sɔlu i ɲinma’n tikeli. I sin’n, Sɔlu “ɔli Zuifu’m be Ɲanmiɛn sulɛ sua’m be nun ko kannin Zezi i ndɛ. Ɔ seli kɛ Zezi ti Ɲanmiɛn i Wa.” Ɔ boli i sɔ yolɛ bo Damasi lɛ bɔbɔ.​—Sa Nga Be Yoli’n 9:15, 20.

Zezi suannin Pɔlu nin jasin bofuɛ onga’m be bo. Ɔ maan be kwla dili junman nga Zezi boli i bo’n. Ɲanmiɛn yrali junman sɔ’n su klanman. I sɔ’n ti’n, ɔ bali nvlɛ. Yɛle kɛ, kɛ Zezi fiteli Pɔlu i ɲrun Damasi atin’n su lɔ mɔ afuɛ ablaɔn-nin-nnun (25) sinnin’n, Pɔlu seli kɛ be “boli jasin sɔ’n lika kwlaa nun ɲanmiɛn’n bo wa.”​—Kolɔsufuɛ Mun 1:23.

Kɛ afuɛ kpanngban sinnin’n, Zezi yoli maan akoto Zan wunnin ninnge wie mun aolia nun. Ɔ kannin ninnge sɔ’m be ndɛ Biblu’n nun fluwa ng’ɔ suan Sa Nglo Yilɛ’n i nun. Ninnge nga Zan wunnin be aolia nun’n ti’n, ɔ wunnin kɛ Zezi o lɛ naan ɔ ti Famiɛn. Ɔ ti kɛ nn Zan w’a tran nguan nun lele Zezi w’a bo i famiɛn dilɛ’n i bo sa. (Zan 21:22) Zan seli kɛ: “Ɲanmiɛn wawɛ’n i fanngan nun’n, be fa min ɔli e Min’n i cɛn’n nun.” (Sa Nglo Yilɛ 1:10) ?Blɛ benin nun yɛ cɛn sɔ’n bó i bo-ɔ?

Ɲanmiɛn Ndɛ’n kle kɛ afuɛ 1914 nun yɛ “e Min’n i cɛn’n” boli i bo-ɔ. Afuɛ sɔ’n nun yɛ mɛn wunmuan’n nun alɛ dan klikli’n boli i bo-ɔ. Kɛ ɔ fɛ i lɛ’n, alɛ’n nin ɲrɛnnɛn’n nin awe’n nin asiɛ kejelɛ’n, ɔ nin ninnge tɛtɛ wie mun ekun be wa sɔnnin kpa trali laa’n. Ninnge kwlaa sɔ’m be o “nzɔliɛ” nga Zezi kɛnnin i ndɛ kleli i akoto mun m’ɔ kle kɛ ‘ɔ o lɛ’ naan “mɛn’n i awieliɛ blɛ’n” w’a ju’n, be nun wie. (Matie 24:3, 7, 8, 14) Andɛ’n, nán Rɔmun nvle’n nun’n ngunmin yɛ be bo Ɲanmiɛn Famiɛn dilɛ’n i jasin fɛ’n niɔn, sanngɛ be bo i asiɛ wunmuan’n su.

Aolia nun’n, Ɲanmiɛn tuli sa sɔ’m be bo kleli Zan. Ɔ seli kɛ: “Siɛn’n, e Ɲanmiɛn’n ti’n sran’m b’a ɲan be ti. W’a yi i tinmin’n i nglo. Yɛ w’a taka i Famiɛn diwlɛ’n, kpɛkun i Klisi’n w’a bo sran’m be sielɛ bo.” (Sa Nglo Yilɛ 12:10) I sɔ’n kle weiin kɛ ɲanmiɛn su lɔ famiɛn diwlɛ nga Zezi kɛnnin i ndɛ’n wo lɛ sakpa. Yɛ Zezi w’a bo famiɛn dilɛ bo!

Nanwlɛ, ɔ fata kɛ Zezi i sɔnnzɔnfuɛ’m be kwlaa be klun jɔ. Maan ndɛ nga Zan kannin’n yo be cinnjin. Ɔ seli kɛ: “I sɔ’n ti’n, ɲanmiɛn su lɔ’n nin amun mɔ amun tran lɔ’n, maan amun klun jɔ! Sanngɛ asiɛ’n nin jenvie’n, amun yako. Afin Suɛn tɔnfuɛ’n w’a to amun lɔ. Yɛ w’a fa ya dan kpa afin ɔ si kɛ i blɛ’n w’a sɔnman kun.”​—Sa Nglo Yilɛ 12:12.

Ɔ maan dɔ nga su’n, Zezi timan Ɲanmiɛn i fama su minndɛman kun. Afin w’a bo famiɛn dilɛ bo, yɛ ɔ cɛ kan’n, ɔ́ núnnún i kpɔfuɛ’m be kwlakwla. (Ebre Mun 10:12, 13) ?Yɛ ninnge ɲɛnmɛn benin mun yɛ bé wá jú e ɲrun lɔ-ɔ?