Ilyo papitile inshiku 10 ukutula apo Yesu abwelelemo ku muulu, umupashi wa mushilo uo apongolwelele abasambi bakwe pa Pentekoste, walelangilila ukuti cine cine aali ku muulu. Kwali na cimbi icali no kucitika ku kutulanga ukuti Yesu aali ku muulu. Ilyo umusambi Stefani bashilamupoola amabwe no kufwa pa mulandu wa kuti aleshimikila pali Yesu, atile: “Moneni! Ndemona umuulu nawisuka no Mwana wa muntu naiminina ku kwa kulyo kwa kwa Lesa.”—Imilimo 7:56.

Ilyo Yesu ali na Wishi ku muulu, ali no kulolela icintu cimo icali no kucitika ico Icebo ca kwa Lesa calandapo. Umupashi wa mushilo walengele Davidi ukulanda ukuti: “Yehova aeba Shikulu [Yesu] ati: ‘Ikala ku kwa kulyo kwandi mpaka nkalenge abalwani bobe ukuba nga kapuna ka kunyantapo amakasa yobe.’” Ilyo inshita ya kulolela yapwile, Yesu aile ‘alecimfya mu kati ka balwani bakwe.’ (Amalumbo 110:1, 2) Nomba finshi Yesu aali no kulacita ku muulu ilyo alelolela inshita iya kucimfya abalwani bakwe?

Icilonganino ca Bena Kristu catendeke pa Pentekoste ya mu 33 C.E. Yesu alitendeka ukuteka mu muulu, pa basambi bakwe abasubwa. (Abena Kolose 1:13) Alibasambilishe bwino ifya kushimikila imbila nsuma kabili alibapekanishishe bwino umulimo baali no kubomba ku nshita ya ku ntanshi. Mulimo nshi baali no kubomba? Bonse abaali no kutwalilila aba citetekelo ukufika ne mfwa baali no kubuuka kabili baali no kuteka na Yesu, mu Bufumu bwakwe.

Umo uwali no kuba imfumu mu Bufumu ni Sauli, uo abena Roma baishibe ukuti Paulo. Paulo aali mu Yuda uwatemenwe sana Amafunde ya kwa Lesa, lelo bashimapepo ba baYuda balimubepeele ica kuti alisuminisheko na ku kupoola Stefani amabwe. Sauli uo pali ilya nshita “aletiinya abasambi ba kwa Shikulu” aile ku Damaseke. Shimapepo Mukalamba, Kayafa, aebele Sauli ukwikata abasambi ba kwa Yesu no kubabweseshamo ku Yerusalemu. (Imilimo 7:58; 9:1) Nomba ilyo Sauli aleya, ulubuuto ukufuma ku muulu lwalibyatile no kumushinguluka, e lyo awa pa nshi.

Kwaumfwike ishiwi ilyatile: “Sauli, Sauli, ninshi ulencushisha?” Sauli na o atile: “Ni mwe  bani, mwe Shikulu?” Na o ayaswike ati: “Nine Yesu, uo ulecusha.”—Imilimo 9:4, 5.

Yesu aebele Sauli ukuya ku Damaseke no kulolela fimbi ifyo aali no kucita, lelo aile ku musumba umbi pantu ulubuuto ulwafumine ku muulu lwalimupofwishe. Mu cimonwa cimbi, Yesu amoneke kuli Anania, umusambi wakwe umbi uwaleikala ku Damaseke. Yesu amwebele ukufwaya ukwali Sauli mulya mwine mu Damaseke. Anania alitiinine, lelo Yesu amwebele ati: “Uyu muntu cipe ico nasala ku kutwala ishina lyandi ku bena fyalo na ku shamfumu na ku bana ba kwa Israele.” Sauli alitendeke ukumona na kabili, kabili ilyo aali mu Damaseke ‘atendeke ukushimikila pali Yesu, ukuti Mwana wa kwa Lesa.’—Imilimo 9:15, 20.

Yesu alyafwile Paulo na basambi bambi ukushimikila imbila nsuma iyo Yesu ashimikiileko. Lesa alibapaalile pantu balishimikile bwino sana. Ilyo papitile imyaka 25 ukutula apo Yesu alandiile nankwe mu musebo wa kuya ku Damaseke, Paulo alembele ukuti imbila nsuma ‘yalibililwe ku cibumbwa conse ica mwi samba lya muulu.’—Abena Kolose 1:23.

Mu myaka yakonkelepo, Yesu alengele Yohane, umutumwa uo atemenwe sana, ukumona ifimonwa ifyalekanalekana, ifyalembwa mu Baibolo, mwi buuku lya Ukusokolola. Muli ifi ifimonwa, Yohane alimwene uko Yesu atendeke ukuteka. (Yohane 21:22) Yohane atile: “Ilyo napokelele umupashi wa mushilo naishileba mu bushiku bwa kwa Shikulu.” (Ukusokolola 1:10) Ni lilali ubushiku bwa kwa Shikulu bwali no kutendeka?

Amasesemo ya mu Baibolo yalanga ukuti “ubushiku bwa kwa Shikulu” bwatendeke mu nshiku shesu. Mu 1914, kwali Inkondo ya Calo iya Kubalilapo. Ukutula pali ilya nshita, pa calo palaba inkondo, utuyofi, insala, ifinkukuma e lyo na fimbi ‘ifya kwishibilako’ ifyo Yesu aebele abatumwa bakwe ukuti e fikalanga ukutila ‘e po ali’ no kuti tuleikala mu nshita ya “mpela.” (Mateo 24:3, 7, 8, 14) Pali ino nshita, imbila nsuma iya Bufumu ilashimikilwa mu calo conse.

Umupashi wa mushilo walyafwile Yohane ukwishiba ifyali no kukonkapo. Atile: “Nomba fyaisa ipusukilo na maka no bufumu bwa kwa Lesa wesu na maka ya kwa Kristu.” (Ukusokolola 12:10) Ubufumu bwa kwa Lesa ubwabela ku muulu, ubo Yesu alelandapo sana, bwa cine cine!

Ili lyashi ilisuma sana ku basambi ba kwa Yesu bonse aba cishinka. Balicetekela amashiwi ayo Yohane alembele ayatila: “E ico, sansamukeni, mwe myulu na mwe baikalamo! Nomba cabipila imwe mwe sonde na bemba, pantu Satana Kaseebanya naikila pali imwe, ali ne cipyu icikalamba, pa kwishiba ukuti ali fye ne nshita inono.”—Ukusokolola 12:12.

Yesu talolela ukuti Wishi akamupeele Ubufumu, pantu pali ino nshita, ni Mfumu, kabili nomba line ali no konaula abalwani bakwe. (AbaHebere 10:12, 13) Kanshi kwaliba amapaalo ayasuma ayo tulelolela.