Dis zour apre ki Zezi ti mont dan lesyel, bann disip ti ganny lespri sen zour Lapannkot. Sa ti montre ki Zezi i dan lesyel. I annan lezot keksoz ki arive ki montre ki sa i vre. Zis avan disip Etyenn ti ganny saboule amor akoz son fidelite, i ti dir: “Gete! Mon vwar lesyel ouver e Garson zonm lo kote drwat Bondye.”​—Akt 7:56.

Pandan ki Zezi ti avek son Papa dan lesyel, i ti pou esper en lord spesifik ki ti’n ganny predir dan Parol Bondye. David ti ganny enspire pour ekri: “[“Zeova,” NWT] ti dir avek mon senyer lerwa [Zezi]: Asiz lo mon kote drwat, ziska ki mon met ou bann lennmi anba ou lipye.” Ler sa letan ki Zezi ti bezwen espere ti pou’n fini, i ti pou “domin lo [son] bann lennmi.” (Psonm 110:1, 2, nou ki’n met an italik.) Me ki Zezi ti pou fer dan lesyel anmezir ki i pe esper sa letan pour pran aksyon kont son bann lennmi?

Kongregasyon Kretyen ti vin an egzistans Lapannkot lannen 33. Dan lesyel, Zezi ti konmans diriz oubyen renny lo bann disip ki’n ganny swazir avek lespri sen. (Kolosyen 1:13) I ti gid zot dan sa travay predikasyon e prepar zot pour zot rol a lavenir. Ki rol sa? Bann ki reste fidel ziska lanmor ti pou ganny resisite pli tar e servi konman bann lerwa ansanm avek Zezi dan Rwayonm Bondye.

Sol i en bon legzanp enn sa bann dimoun ki ti pou vin lerwa ansanm avek Kris a lavenir. Laplipar dimoun i konn li konman Pol dapre son non Romen. I ti en Zwif ki ti vreman devoue pour Lalwa Bondye. Me i ti’n telman ganny anbete par bann sef relizye Zwif ki i ti menm dakor ki Etyenn i ganny saboule avek ros. Apre sa, Sol ti al lo semen Damas akoz i ti “ankor ankoler avek bann disip Senyer.” Granpret Kaif ti donn li lotorizasyon pour tyonbo bann disip Zezi e anmenn zot Zerizalenm. (Akt 7:58; 9:1) Me ler Sol ti lo semen, en gro lalimyer ti klere toultour li e i ti tonm ater.

I ti tann en lavwa ki i pa ti konnen kot i sorti  dir: “Sol, Sol, akoz ou pe persekit mwan?” Sol ti demande: “Lekel ou Senyer?” I ti ganny sa larepons: “Mwan menm Zezi ki ou pe persekite.”​—Akt 9:4, 5.

Zezi ti demann Sol pour al Damas e esper plis lenstriksyon laba, me dimoun ti bezwen atrap son lanmen pour anmenn li dan sa lavil akoz sa lalimyer ti’n fer li vin aveg. Dan en lot vizyon, Zezi ti aparet avek Ananyas, enn son disip ki ti reste Damas. Zezi ti demann Ananyas pour al vwar Sol e i ti dir li kot i reste. Ananyas ti en pe per pour fer sa, me Zezi ti asir li: “Mon’n swazir sa zonm pour rann temwannyaz lo mon non avek bann nasyon, bann lerwa ek pep Izrael.” Sol ti revwar kler e laba Damas “i ti konmans anonse . . . ki Zezi i Garson Bondye.”​—Akt 9:15, 20.

Gras a led Zezi, Pol ek lezot predikater ti kontiny sa travay predikasyon ki Zezi ti’n konmanse. Bondye ti beni zot e zot ti ganny bann bon rezilta. Apepre 25 an apre ki Zezi ti’n aparet avek Pol lo semen Damas, Pol ti ekri ki sa bon nouvel ti’n ganny “anonse avek dimoun partou lo later.”​—Kolosyen 1:23.

Plizyer lannen pli tar, Zezi ti donn sa zapot ki i kontan e ki ti ankor vivan, setadir Zan, plizyer vizyon ki’n ganny rikorde dan liv Revelasyon dan Labib. Atraver sa bann vizyon, dan en sans, Zan ti vwar Zezi pe retournen e dirize dan Rwayonm. (Zan 21:22) “Gras a lespri sen, [Zan] ti vwar bann keksoz ki ti pou arive pandan zour Senyer.” (Revelasyon 1:10) Kan sa ti pou arive?

Ler nou etidye bann profesi dan Labib, nou vwar ki “zour Senyer” in konmans dan nou letan. An 1914, sa ki nou apel Premye Lager Mondyal konmela ti deklare. Deplis, depi 1914, nou’n vwar plis lager, maladi, tranblemandter ek lezot levidans dan lemonn antye ki montre ki sa “siny” ki Zezi i la konman Lerwa pe akonpli e ki nou pe viv dan letan “lafen sa lemonn”. (Matye 24:3, 7, 8, 14) Konmela sa bon nouvel Rwayonm pe ganny prese partou dan lemonn, pa zis dan Lanpir Romen.

Zan ti ganny enspire pour dekrir ki sa i vedir: “Aprezan Bondye in sov limanite, son pouvwar in ganny revele, son Rwayonm in konmans dirize e son Kris in ganny lotorite.” (Revelasyon 12:10) Wi, sa Rwayonm Bondye dan lesyel ki Zezi ti koz lo la ler i ti lo later i reel!

Sa i en bon nouvel pour tou bann disip fidel Zezi. Zot kapab pran aker parol Zan ki ti dir: “Pour sa rezon, lesyel ek zot ki reste dan lesyel, zot devret dan lazwa! Maler pour later ek lanmer parski Dyab in desann kot zot avek en gran lakoler, parski i konnen i reste li zis en ptigin letan.”​—Revelasyon 12:12.

Alor, Zezi nepli pe asiz lo kote drwat son Papa pe espere. I pe dirize konman Lerwa e byento i pou detri tou son bann lennmi. (Ebre 10:12, 13) Pa i vo lapenn kontinyen esper sa bann keksoz ekstraordiner?