Oti e tini na siga nona gole i lomalagi o Jisu, a sovaraki na yalo tabu ena siga ni Penitiko qai vakadinadinataka qori ni sa tiko dina mai lomalagi. E tiko e dua tale na ivakadinadina. Ni bera ni vakaviriki na tisaipeli o Sitiveni ena nona yalodina ni vunau, e kaya: “Au raica ni sa tadola na lomalagi, e tucake tale tu ga na Luve ni tamata ena ligaimatau ni Kalou.”—Cakacaka 7:56.

Ni sa tiko tale mai lomalagi kei Tamana, ena waraka o Jisu na vakayacori ni dua na ivakaro e parofisaitaki ena Vosa ni Kalou. E uqeti vakalou o Tevita me vola: “E tukuna o Jiova vua na noqu turaga [Jisu]: ‘Dabe ena ligaqu imatau me yacova niu biuti ira na kemu meca me itutu ni yavamu.’” Ni sa yaco mai na gauna ya, ena “lewa ena kedra maliwa na [kena] meca.” (Same 110:1, 2) Ia na cava ena cakava tiko o Jisu mai lomalagi me yacova ni lewai ira na kena meca?

A tauyavutaki ena Penitiko 33 G.V. na ivavakoso vaKarisito. Sa tekivu liutaki ira tale ga mai lomalagi o Jisu na nona tisaipeli era lumuti ena yalo tabu. (Kolosa 1:13) E dusimaki ira ena nodra cakacaka vakavunau, vakarautaki ira tale ga ena nodra itavi ena gauna se bera mai. Na itavi cava qori? Era na vakaturi o ira na yalodina me yacova na mate, ra qai veiliutaki vakatui kei Jisu ena Matanitu ni Kalou.

Kena ivakaraitaki, ena dua vei ira na veiliutaki vakatui ena gauna se bera mai o Saula e kilai tale ga ena yacana vakaRoma o Paula. E Jiu o Paula qai dau yalodina ni tokona na Lawa ni Kalou, ia era vakacalai koya na iliuliu ni lotu vakaJiu mani vakadonuya kina nona vakaviriki ena vatu o Sitiveni. E gole sara i Tamasiko o Saula ni “sega ni cegu . . . na vakarerei ira na tisaipeli ni Turaga kei na nona via vakamatei ira sara ga.” E vakaroti koya na Bete Levu o Kaiafa me vesuki ira na tisaipeli i Jisu qai kauti ira yani i Jerusalemi. (Cakacaka 7:58; 9:1) Ia ni cilavi koya e dua na rarama ena ilakolako qori, e bale sara ga ina qele.

E rogo sara mai e dua na domo, ia e sega ni kilai na domo i cei: “I Saula, I Saula, na cava o vakacacani au tiko kina?” E taroga o Saula: “O cei o kemuni, Turaga?” E rogo tale mai na kena isau: “O yau o Jisu o vakacacana tiko.”—Cakacaka 9:4, 5.

E tukuna vei Saula o Jisu me gole i Tamasiko,  ena lai dusimaki e kea ena so tale na ka. Ia e vinakati me tuberi koya e dua ena ilakolako qori ni vakamatabokotaki koya na rarama e cilavi koya vakacakamana. A rairai ena dua tale na raivotu o Jisu vei Ananaiasa, dua vei ira nona tisaipeli e Tamasiko. E vakaraitaka sara vua o Jisu na vanua me lai raici Saula kina. E lomaleqa o Ananaiasa ena ka e tukuni vua qori, ia e vakadeitaka vua o Jisu: “[A]u sa digitaka oti na tagane qo me tukuna na yacaqu ina veimatanitu, vei ira tale ga na tui kei ira na luvei Isireli.” E rai rawa tale o Saula ni tiko voli mai Tamasiko, qai tekivu “vunautaki Jisu ena veivalenilotu, ni o koya qo na Luve ni Kalou.”—Cakacaka 9:15, 20.

E tokoni Paula kei ira na vo ni daukaulotu o Jisu mera tomana kina na cakacaka vakavunau a tekivuna. E vuavuaivinaka nodra cakacaka ni vakalougatataki ira na Kalou. Oti e rauta na 25 na yabaki nona rairai o Jisu vei Paula ena gaunisala i Tamasiko, e vola o Paula ni ‘sa vunautaki na itukutuku vinaka vei ira na kabuli kece e ruku i lomalagi.’—Kolosa 1:23.

E vica na raivotu e vakaraitaka o Jisu ena vica na yabaki e muri vei Joni na yapositolo e daulomana, qai volatukutukutaki qori ena Vakatakila. A raivotutaka gona e keri o Joni nona lesu o Jisu me veiliutaki ena Matanitu ni Kalou. (Joni 21:22) ‘Ena veiuqeti ni yalo tabu e mai tiko kina o Joni ena siga ni Turaga.’ (Vakatakila 1:10) Na gauna cava qori?

E laurai ena kena dikevi vinaka na parofisai vakaivolatabu ni tekivu ena noda gauna qo na “siga ni Turaga.” A yaco ena 1914 na iMatai ni iValu Levu. Era yaco ena sagavulu na yabaki e tarava e levu tale na ivalu, matedewa, leqa ni kakana, uneune, kei na so tale na ivakadinadina e kilai kina ni sa vakayacori ena kena ivakatagedegede levu sara “na ivakatakilakila” e tukuna o Jisu vei ratou nona yapositolo me baleta nona “tiko” kei “na icavacava.” (Maciu 24:3, 7, 8, 14) Sa vunautaki tiko nikua na itukutuku vinaka ni Matanitu ni Kalou, sega ni vanua ga era qali i Roma, ia e veiyasa i vuravura.

E uqeti vakalou o Joni me vakamacalataka na kena ibalebale: “E sa veivakabulai na Kalou! E kaukaua dina ga o koya! Sa tauyavu na nona Matanitu! Sa tekivu lewa na nona Karisito.” (Vakatakila 12:10) Io, e dua dina na matanitu na Matanitu vakalomalagi ni Kalou e dau wewenigusu i Jisu!

Era na marautaka na itukutuku qori na tisaipeli yalodina kece i Jisu. Mera kauaitaka vakabibi na vosa qo i Joni: “O koya gona, moni marau na lomalagi kei kemuni na tiko kina! Drau na rarawa na vuravura kei na wasawasa, ni sa lako sobu vei kemudrau na Tevoro, e cudru vakalevu, ni kila tiko ni sa lekaleka nona gauna.”—Vakatakila 12:12.

Sa sega ni wawa tale tiko o Jisu ena ligaimatau ni Kalou. Sa veiliutaki tiko vakatui, sa voleka tale ga ni vakarusai ira kece na kena meca. (Iperiu 10:12, 13) Ia na ka vakasakiti cava eda na vakarau raica?