Tebwina te bong imwini waeraken Iesu nako karawa, ao e a kaotaki iai koauan ae e a boni mena i karawa ni kabwaroan te taamnei ae raoiroi ni Bentekota. Ao e nangi manga kaoti ngkai kakoauaan naba anne. E taku te tia rimwin Iesu ae Tetebano imwain raoi karebanaana ibukini kakaonimakina n uarongorongo: “Akea bwa I nora karawa bwa e uki ao Natin te aomata ae tei i angaatain te Atua.”​—Mwakuri 7:56.

Ni menan Iesu ma Tamana i karawa, ao e a kona ni kariariaa iai te tua ae okoro are e a kaman taekinaki n ana Taeka te Atua. E korea ae kangai Tawita ni kairana n te taamnei ae raoiroi: “E taekina ae kangai Iehova nakon au Uea [Iesu]: ‘Tekateka i angaataiu ni karokoa tiau ni kaakiia akana kairiribai nakoim, bwa nneni katokaani waem.’” Ngke e a toki te tai ni kariaria ao e a nako n “totokanikai i buakoia akana kairiribai [nakoina].” (Taian Areru 110:1, 2) Ma tera ae e na karaoia Iesu mai karawa ngkai e a kariariaa te tai are e nang waaki iai ni kaaitaraia akana kairiribai nakoina?

Ni Bentekota 33 C.E. ao e a tei te ekaretia ni Kristian. E a moana iai ana kairiri Iesu mai karawa, ke n tautaeka i aoia taan rimwina aika kabiraki n te taamnei. (I-Korote 1:13) E kairiia n aia uarongorongo ao ni katauraoiia nakoni mwiokoaia n te tai ae imwaia. Tera mwiokoaia? Te koraki ake a kakoauaaki bwa a kakaonimaki ni karokoa mateia, a na boni kautaki ao a na beku bwa raon Iesu n uea n te Tautaeka n Uea.

Te katoto ae rianako ibukin temanna ae e na riki bwa te uea n te tai ae e na roko, bon Tauro ae ataaki riki n arana n Rom ae Bauro. Bon te I-Iutaia teuaei are e a maan n ingainga nanona n ana Tua te Atua, ma e rangi ni kairaraangaki irouia mataniwin te Aro n Iutaia, ngaia are e a boni kariaia iai karebanaan Tetebano. E mwananga naba Tauro nako Tamateko ni “kakamaakuia taan rimwin te Uea ao e korakora nanona ni kan tiringia.” E anga te kariaia ni mwanangan teuaei te Ibonga ae Rietata ae Kaiaba bwa e na katikiia taan rimwin Iesu ao ni kaokiia nako Ierutarem. (Mwakuri 7:58; 9:1) Ma ngke e tabe ni mwananga Tauro ao e a otabwaniniaki naba n te oota ae takiakia ao e a bwaka i aontano.

E wewete te bwanaa man te tabo ae aki kona n noraki ao e kangai: “Tauro, Tauro, e aera ngkai ko bwainikirinai?” E titiraki Tauro ni kangai: “Te Uea, antai ngkoe?” E taku te kaeka: “Bon Iesu ngai ae ko bwainikirinai.”​—Mwakuri 9:4, 5.

E tuangaki Tauro iroun Iesu bwa e na rin i Tamateko ao n tataningai kaetieti riki tabeua, ma e riai ni kairaki nakon te kaawa ibukina bwa e a mataki n te oota man te kakai. N te miitara are teuana ao e kaoti Iesu nakon Anania, ae te tia rimwina naba temanna ae maeka i Tamateko. E tuangaki Anania iroun Iesu bwa e na nakon te tabo teuana bwa e na kakaaea Tauro iai. E maaku Anania ni karaoa anne, ma e karaua nanona Iesu ni kangai: “Bon au bwai ni mwakuri ae rineaki teuaei, ae e na kaotiota arau nakoia natannaomata, ao ueea, ao tibun Iteraera.” E a okira arona Tauro ni matairiki ao e a “taekina Iesu [i Tamateko] bwa boni ngaia Natin te Atua.”​—Mwakuri 9:15, 20.

I aan ana boutoka Iesu ao e a waakina te mwakuri n uarongorongo Bauro ma tabeman riki taan tataekina te euangkerio, are e moani waakina karaoana Iesu. E kakabwaiaia te Atua n aia mwakuri ae rangi n uaana. Tao 25 te ririki imwini kaotin Iesu nakoni Bauro n te kawai nako Tamateko, ao e a koreia Bauro bwa e a tia n “tataekinaki n taabo nako aika i aani karawa” te rongorongo ae raoiroi.​—I-Korote 1:23.

N ririki ake imwina riki, ao e a anga Iesu nakon te abotoro are tangiraki irouna ae Ioane, taiani miitara aika rereitaki aika mena ni bokin te Baibara ae Te Kaotioti. Rinanoni miitara aikai ao kaanga e a maiu Ioane n nora okin Iesu ni mwaakan ana Tautaeka n Uea. (Ioane 21:22) ‘E kaonaki n te taamnei ae raoiroi Ioane ao e a roko kaanga n ana bong te Uea.’ (Te Kaotioti 1:10) E na riki anne n ningai?

E oti ni kamatebwaian raoi taetae ni burabeti aika n te Baibara bwa “ana bong te Uea” e moanaki n taai aikai. N 1914 ao e a boo iai te bae ataaki bwa te Moani Buaka Are Kabutaa Aonnaba. Ao ririki aika rangi ni bati imwin anne a namataki n taiani buaka, aoraki aika kamamate ao mwaeiei, ao bwaai tabeua riki aika kakoauaa bwa e a tabe ni kakoroaki bukin te ‘kanikina’ are e anga Iesu nakoia ana abotoro ibukin ‘okina ma tikuna’ ao ‘te toki.’ (Mataio 24:3, 7, 8, 14) E a tia ngkai ni waaki tataekinan te rongorongo ae raoiroi ibukin te Tautaeka n Uea, tiaki tii n te aono are e tautaekanna Rom ma ni katobibia te aonnaba.

E kairaki Ioane rinanon te taamnei bwa e na kabwarabwaraa ae nanonaki n aei: “E a roko ngkai te kamaiu mairoun Atuara ma mwaakana ao ana Tautaeka n Uea, ao mwaakan ana Kristo.” (Te Kaotioti 12:10) Eng, bon te bwai ae koaua ana Tautaeka n Uea te Atua i karawa, are e a tia n rangi ni butanako tataekinana iroun Iesu!

Anne bon te rongorongo ae kakukurei nakoia taan rimwin Iesu aika kakaonimaki ni kabane. A kona ni kaaki i nanoia ana taeka Ioane aikai: “Mangaia ae kam na kimwareirei n aei, ngkami aika taiani karawa ao ngkami aika kam maeka iai! E na reke kain aon te aba ma marawa, ibukina bwa e a tia n ruo te Riaboro nakoimi, ao e a korakora unna ngkai e ataia bwa e a kimototo ana tai.”​—Te Kaotioti 12:12.

Mangaia are e a aki ngkai tekateka Iesu i angaatain Tamana ao n tataninga. Ma e a kairiri bwa te Uea, ao n te tai ae waekoa ao e nang kamaunaia ni kabane akana kairiribai nakoina. (Ebera 10:12, 13) Baikara bwaai aika kaingainga aika mena imwaira?