Na nugbo tọn, gbigbọ wiwe he yin kinkọnjẹgbonu to azán Pẹntikọsti tọn gbè, yèdọ azán ao to whenue Jesu hẹji yì aga godo, dohia hezeheze dọ ewọ ko tin to olọn mẹ. Podọ kunnudenu devo he do enẹ hia gbẹ́ pò to nukọn ja. Ojlẹ kleun de whẹpo devi Stefani do yin zannu dlan do, na e yí nugbonọ-yinyin do dekunnu wutu, e dawhá dọmọ: “Mì pọ́n! Yẹn mọ olọn hùndonuvo bọ Visunnu gbẹtọ tọn ṣite to adusilọ Jiwheyẹwhe tọn mẹ.”—Owalọ lẹ 7:56.

Todin he Jesu ko yì Otọ́ etọn dè to olọn mẹ, e na nọtepọn gbedide tangan de he yin didọdai to Ohó Jiwheyẹwhe tọn mẹ. Davidi wlan to gbọdo glọ dọmọ: “Jehovah dọna Oklunọ ṣie [Jesu] dọmọ: ‘Sinai to adusilọ ṣie mẹ kaka yẹn nado yí kẹntọ towe lẹ do basi tokloafọligbe afọ towe lẹ tọn.’” To whenue ojlẹ teninọ tọn lọ na wá vivọnu, ewọ na “yì bo to awhàngba to kẹntọ [etọn] lẹ ṣẹnṣẹn.” (Psalm 110:1, 2) Ṣigba, etẹwẹ Jesu na to wiwà sọn olọn mẹ dile e na to tepọn ojlẹ he mẹ e na yinuwa sọta kẹntọ etọn lẹ?

To Pẹntikọsti 33 W.M., agun Klistiani tọn yin didoai. Jesu jẹ gandu ji sọn olọn mẹ do devi etọn he yin dide gbọn gbigbọ dali lẹ ji. (Kọlọsinu lẹ 1:13) E deanana yé to yẹwhehodidọ yetọn mẹ bo hẹn yé pegan na azọngban he yé na hẹndi to sọgodo. Azọngban tẹwẹ? Mẹhe do yede hia di nugbonọ kakajẹ okú lẹ na yin finfọnsọnku bo na sẹ̀n taidi ahọlu hatọ lẹ hẹ Jesu to Ahọluduta lọ mẹ.

Apajlẹ jọnun mẹhe na yin ahọlu to sọgodo de tọn wẹ Saulu, he yin yinyọnẹn ganji gbọn yinkọ Lomu tọn etọn Paulu dali. Ewọ yin Ju he ko yin zohunhunnọ na Osẹ́n Jiwheyẹwhe tọn na ojlẹ dindẹn, amọ́ sinsẹ̀ngán Ju lẹ hẹn ẹn buali sọmọ bọ ewọ tlẹ kẹalọyi dọ Stefani ni yin zannu dlan do. Enẹgodo, Saulu dedo Damasku, na e “gbẹ́ pò to gbigbọ budonamẹ tọn po mẹhuhu tọn po gbọ sọta devi Oklunọ tọn lẹ” wutu. Yẹwhenọ Daho Kaifa wẹ na ẹn gbè nado wle devi Jesu tọn lẹ bo plan yé lẹkọwa Jelusalẹm. (Owalọ lẹ 7:58; 9:1) Ṣigba, dile Saulu to aliji, hinhọ́n daho de họ́n lẹdo e bọ e jai do kọmẹ.

Ogbè mẹhe yè ma to mimọ de tọn dawhá dọmọ: “Saulu, Saulu, naegbọn hiẹ do to homẹkẹndo mi?” Saulu kanse dọmọ: “Hiẹ mẹnu wẹ,  Oklunọ?” Mẹlọ gblọn dọmọ: “Yẹn Jesu wẹ, mẹhe hiẹ to homẹkẹndo.”—Owalọ lẹ 9:4, 5.

Jesu dọna Saulu nado yì Damasku bo nọtepọn anademẹ devo lẹ, amọ́ mẹdevo wẹ dona plan ẹn yì tòdaho lọ mẹ, na hinhọ́n jiawu lọ ko và nukun na ẹn wutu. To numimọ devo mẹ, Jesu sọawuhia Ananias he yin dopo to devi he nọ nọ̀ Damasku lẹ mẹ. Jesu dọna Ananias nado yì ofi tangan de nado dín Saulu mọ. Ananias whleawu nado yì, ṣigba Jesu na ẹn jide dọmọ: “Núzinzan dide de wẹ dawe ehe yin na mi nado hẹn oyín ṣie yì akọta lẹ, ahọlu lẹ po ovi Islaeli tọn lẹ po dè.” Nukun Saulu tọn lẹ hùn bọ to Damasku, “e jẹ yẹwhehodọ ji gando Jesu go . . . dọ Visunnu Jiwheyẹwhe tọn wẹ Ewọ.”—Owalọ lẹ 9:15, 20.

Po godonọnamẹ Jesu tọn po, Paulu po wẹndagbe-jlatọ devo lẹ po wà azọ́n yẹwhehodidọ tọn he Jesu bẹjẹeji lọ. Jiwheyẹwhe dona yé bọ yé tindo kọdetọn dagbe to aliho ayidego tọn de mẹ. To nudi owhe 25 to whenue Jesu sọawuhia Paulu to ali Damasku tọn ji godo, Paulu wlan dọ wẹndagbe lọ ko yin “didọna nudida he to olọn glọ lẹpo.”—Kọlọsinu lẹ 1:23.

To owhe lẹ godo, Jesu do numimọ debọdo-dego lẹ he tin to owe Biblu tọn he nọ yin Osọhia mẹ hia apọsteli vivẹ́ etọn Johanu. Gbọn numimọ ehelẹ dali, Johanu nọgbẹ̀ dẹn nugbonugbo nado mọ kọlilẹwa Jesu tọn to huhlọn Ahọluduta tọn mẹ. (Johanu 21:22) “To gbọdo glọ, [Johanu] wá tin to azán Oklunọ tọn gbè.” (Osọhia 1:10) Whetẹnu wẹ azán enẹ na wá?

Dọdai Biblu tọn lẹ pinplọn po sọwhiwhe po dohia dọ ojlẹ mítọn mẹ wẹ “azán Oklunọ tọn” bẹjẹeji te. To 1914, awhàn he wá yin yinyọnẹn taidi Wẹkẹ-Whàn I gbajẹgbonu. Podọ to owhe susu lẹ gblamẹ sọn whenẹnu, awhàn, azọ̀nylankan lẹ, huvẹ po aigba sisọsisọ lẹ po fọ́n bo to susudeji, gọna kunnudenu he gbloada devo lẹ he do hẹndi “ohia” he Jesu na apọsteli etọn lẹ gando “tintin tofi” etọn po “opodo lọ” po go hia. (Matiu 24:3, 7, 8, 14) To alọnu din, e ma yin lẹdo Ahọluigba Lomu tọn kẹdẹ mẹ wẹ yẹwheho wẹndagbe Ahọluduta lọ tọn to yinyin didọ te gba, ṣigba lẹdo aihọn pé wẹ.

Johanu yin gbigbọdo nado dọ nuhe onú enẹlẹ zẹẹmẹdo dọmọ: “Todin, whlẹngán, huhlọn po ahọluduta Jiwheyẹwhe mítọn tọn po ko wá aimẹ gọna aṣẹpipa Klisti etọn tọn.” (Osọhia 12:10) Mọwẹ, Ahọluduta Jiwheyẹwhe tọn he Jesu lá gbọn filẹpo lọ ko yin didoai!

Owẹ̀n jiawu de wẹ enẹ yin na devi nugbonọ Jesu tọn lẹpo. Yé sọgan hẹn nuhe Johanu dọ lẹ do ayiha mẹ dọmọ: “Na ehe wutu, mì jaya, mì olọn lẹ po mì mẹhe nọ nọ̀ e mẹ lẹ po! Dindọn na aigba podọ na ohù, na Lẹgba ko jẹte wá mì dè, po homẹgble daho po, na e yọnẹn dọ whenu gli de wẹ emi tindo wutu.”—Osọhia 12:12.

Gbọnmọ dali, Jesu masọ to aisinsin to adusilọ Otọ́ etọn tọn mẹ bo to tenọpọn gbedide etọn ba. Ewọ ko to gandu taidi Ahọlu, podọ to madẹnmẹ e na và kẹntọ etọn lẹpo sudo. (Heblu lẹ 10:12, 13) To whelọnu lo, nujijọ jiawu tẹlẹ wẹ to nukọn ja?