Sepuluh hari pengudah Jesus niki ke serega, iya meri kuasa kudus ngagai bala murid iya lebuh hari Pentikos. Tu nunjukka Jesus amat udah ba serega. Tang bisi bukti bukai ti nunjukka Jesus udah ba serega. Sebedau Stepen mati ketegal iya dituku ngena batu laban nginjil enggau tetap ati, iya madahka: “Peda kita, . . . aku meda langit tebuka sereta Anak Mensia bediri ba sepiak kanan Petara.”—Surat Kereja Rasul 7:56.

Ba serega, Jesus patut nganti siti iring ari Apai iya, baka ke udah ditulis dalam Bup Kudus. Dibaruh iring kuasa kudus, David nulis: ‘Ku Jehovah bejaku ngagai tuan aku [Jesus], “Duduk ditu muak ari kanan Aku datai ke Aku udah ngaga munsuh nuan nyadika pelasar kaki nuan.’” Lebuh timpuh alai Jesus nganti udah abis, iya deka ‘merintah bala munsuh [iya].’ (Masmur 110:1, 2) Tang sebedau Jesus ngalahka bala munsuh iya, nama deka digaga iya ba serega lebuh iya nganti iring Apai iya?

Ba hari Pentikos taun 33 M., raban gempuru Kristian berengkah ditumbuhka. Ari serega, Jesus berengkah merintah murid iya ke dipilih kuasa kudus. (Kolosi 1:13) Iya ngiring sida ba pengawa nginjil sereta nyikap sida ke pengawa ke deka dikereja sida. Nama pengawa nya? Sida ke setia nyentukka mati deka diangkatka idup baru, lalu nyadi raja merintah enggau Jesus ba Perintah Petara.

Siku ari orang ke deka nyadi raja lalu merintah enggau Jesus, iya nya Saul. Iya suah agi dikumbai Paul, nitihka nama iya dalam jaku Rome. Iya siku orang Judah ke amat ransing nitihka Adat Petara, tang iya ditesatka tuai pengarap Judah nyentukka iya sanggup nyukung pengawa munuh Stepen. Pengudah nya, Saul ngagai Damaskus laban iya “balat pedis ati ngagai bala murid Tuan Jesus, lalu keran amat deka munuh sida.” Iya nerima kuasa ari imam besai Kaiapas nangkap murid Jesus lalu mai sida ngagai Jerusalem. (Surat Kereja Rasul 7:58; 9:1) Taja pia, lebuh Saul ba rantau jalai, bisi penampak ari langit manchar ngelingi iya lalu iya rebah ke tanah.

Maya nya, bisi nyawa ari serega ngangauka iya: “Saul, Saul, nama kebuah nuan merinsaka aku?” Saul lalu nanya: “Sapa nuan, Tuan?” Udah nya nyawa nya nyaut: “Aku Jesus, orang ke diperinsaka nuan.”—Surat Kereja Rasul 9:4, 5.

 Jesus ngasuh Saul ngagai Damaskus lalu nganti iring ke bukai ba dia. Tang iya begunaka orang ngiring iya kin laban penampak nya udah ngasuh iya buta. Ba maya ti sama, Jesus ngayanka diri ngagai Ananias nengah siti genera. Ananias siku murid Jesus ke diau ba Damaskus. Jesus ngasuh Ananias ngiga Paul ba siti endur. Taja pan Ananias berasai takut deka ngereja nya, tang Jesus madah ngagai iya: “Aku udah milih lelaki tu kena nusui nama aku ngagai bala raja, bansa Israel, enggau bansa bukai.” Udah nya, Ananias nulung Saul ngambika iya ulih meda baru. Lalu ba Damaskus, Saul “ngerembaika berita pasal Jesus nya Anak Petara.”—Surat Kereja Rasul 9:15, 20.

Enggau sukung ari Jesus, Paul enggau bala penginjil ke bukai neruska pengawa nginjil ari Jesus. Lalu Petara udah merekatka pengawa sida sereta nulung sida mujur. Kira-kira 25 taun pengudah utai ke nyadi ba rantau jalai ngagai Damaskus, Paul nulis Berita Manah udah “ditusui ngagai semua utai ke udah ditempa ba baruh langit.”—Kolosi 1:23.

Beberapa taun udah nya, Jesus meri mayuh genera ngagai John, rasul ke dikerinduka iya. Semua nya ditulis ba bup Pemandang. Nengah beberapa iti genera tu, John baka ke meda penatai Jesus lebuh iya nyadi Raja ba Perintah Petara. (John 21:22) “Kuasa kudus mai [John] ngagai hari Tuan.” (Pemandang 1:10) Tang kemaya hari Tuan deka datai?

Jaku benabi Bup Kudus nunjukka “hari Tuan” berengkah ari taun 1914. Ba taun nya, Perang Dunya I nyadi. Kenyau ari maya nya, perang, penyakit, lapar pungkang, gempa bumi, sereta utai bukai majak nyadi. Semua utai ke nyadi tu ngamatka “tanda” ti diberi Jesus ngagai bala rasul iya, ke bekaul enggau maya Jesus “pulai baru” sereta “pengujung” dunya tu. (Matthew 24:3, 7, 8, 14) Pia mega, Berita Manah pasal Perintah Petara udah ditusui ba serata dunya, ukai semina ba endur ke dibaruh perintah Rome aja.

Dibaruh iring kuasa kudus, John nulis reti utai ke nyadi nya: “Petara kitai udah nyelamatka mensia. Kuasa Iya udah dipandangka. Perintah Iya udah ditumbuhka lalu Kristus Iya udah bekuasa.” (Pemandang 12:10) Nya alai, Perintah Petara ba serega ke ditusui Jesus nya endang amat bisi!

Tu tentu ngasuh semua murid Jesus ti setia amat gaga ati. Nyadi jaku John tentu besai reti ke sida, ku iya: “Nya alai, gaga ati meh serega enggau kita ke diau ba serega. Tang, tulah meh dunya enggau tasik laban Sitan udah nurun ngagai kita. Iya balat amat ringat laban iya nemu timpuh iya mimit aja agi tinggal.”—Pemandang 12:12.

Nya alai, Jesus enda agi nganti ba sepiak kanan Apai iya. Diatu iya benung merintah nyadi Raja, lalu enda lama da agi iya deka ngemunaska bala munsuh iya. (Hebrew 10:12, 13) Udah nya, nama berekat ke nganti kitai?