Sangapulo nga aldaw kalpasan nga immuli ni Jesus idiay langit, ti pannakaibukbok ti nasantuan nga espiritu idi aldaw ti Pentecostes ti mangpaneknek nga addan ni Jesus idiay langit. Dumteng pay ti kanayonan a pammaneknek. Sakbay la unay a naubor ti adalan a ni Esteban gapu iti matalek a panangsaksina, kinunana: “Adtoy! Makitak ti langlangit a nalukatan ken ti Anak ti tao nga agtaktakder iti makannawan ti Dios.”—Aramid 7:56.

Idi adda ni Jesus idiay langit a kadua ni Amana, urayenna ti bilin a naipadto iti Sao ti Dios. Napaltiingan ni David a mangisurat: “Imbaga ni Jehova iti Apok [ni Jesus]: ‘Agtugawka iti makannawanko agingga nga ikabilko dagiti kabusormo a pagbatayan dagiti sakam.’” No maturposen ti panagurayna, mapanen ‘iti tengnga dagiti kabusorna ket parmekenna ida.’ (Salmo 110:1, 2) Ngem ania ti aramiden ni Jesus idiay langit bayat nga ur-urayenna ti panangparmekna kadagiti kabusorna?

Idi Pentecostes 33 C.E., nabuangay ti kongregasion Kristiano. Manipud langit, nangrugin nga agturay ni Jesus kadagiti napulotan iti espiritu nga adalanna. (Colosas 1:13) Inwanwanna ida iti panangasabada ken insaganana ida iti akemda iti masanguanan. Ania nga akem? Mapagungarto dagiti agmatalek agingga iti ipapatay ket agserbida a kadua ni Jesus nga agari iti Pagarian.

Ti naisangsangayan a pagarigan ti maysa nga agarinto iti masanguanan ket ni Saulo, a pagaammo iti Romano a naganna a Pablo. Maysa a Judio a naregta iti Linteg ti Dios, ngem inallilaw dagiti Judio a lider ti relihion ta immanamong pay a maubor ni Esteban. Napan idiay Damasco ni Saulo a “mangyes-esngaw pay laeng iti pamutbuteng ken panangpapatay a maibusor kadagiti adalan ti Apo.” Inikkan ti nangato a padi a ni Caifas iti autoridad a mangaresto kadagiti adalan ni Jesus sa ipanna ida idiay Jerusalem. (Aramid 7:58; 9:1) Nupay kasta, idi agdaldaliasat ni Saulo, adda nagsilnag a lawag iti aglawlawna ket natumba.

Pagammuan ta adda timek a nangngegna: “Saulo, Saulo, apay nga idaddadanesnak?” Dinamag ni Saulo: “Siasinoka, Apo?” Insungbatna: “Siak ni Jesus, nga idaddadanesmo.”—Aramid 9:4, 5.

Imbaga ni Jesus ken Saulo a sumrek idiay Damasco ken aguray iti bilin, ngem masapul a makibin  a mapan iti siudad ta nabulsek gapu iti lawag. Iti sabali a sirmata, nagparang ni Jesus ken Ananias, a maysa kadagiti adalanna nga agnanaed idiay Damasco. Imbaga ni Jesus ken Ananias a mapan iti maysa a lugar tapno birokenna ni Saulo. Mabuteng ni Ananias a mapan, ngem impanamnama ni Jesus kenkuana: “Daytoy a tao ket napili a basehas maipaay kaniak tapno ipanna ti naganko kadagiti nasion kasta met iti ar-ari ken iti annak ti Israel.” Nagsubli ti panagkita ni Saulo, ket idiay Damasco “rinugianna nga ikasaba ni Jesus, a Daytoy ti Anak ti Dios.”—Aramid 9:15, 20.

Babaen iti tulong ni Jesus, ni Pablo ken ti dadduma nga ebanghelisador intultuloyda ti inrugi ni Jesus a panangasaba. Binendisionan ida ti Dios ket nakabalballigida. Agarup 25 a tawen kalpasan a nagparang ni Jesus kenkuana iti dalan a mapan idiay Damasco, insurat ni Pablo a ti naimbag a damag ‘naikaskasaban iti isuamin a parsua nga adda iti baba ti langit.’—Colosas 1:23.

Adu a tawen kalpasanna, nangted ni Jesus iti dungdungnguenna nga apostol a ni Juan iti agsasaruno a sirmata, a mabasa iti Apocalipsis a libro ti Biblia. Babaen kadagitoy a sirmata, arigna nagbiag ni Juan tapno makitana ti panagsubli ni Jesus nga agari iti Pagarian. (Juan 21:22) ‘Babaen iti paltiing, adda idi ni Juan iti aldaw ti Apo.’ (Apocalipsis 1:10) Kaano a mapasamak dayta?

Ipakita ti panagadal kadagiti padto ti Biblia a ti “aldaw ti Apo” ket nangrugi iti kaaldawantayo. Idi 1914, bimtak ti pagaammo a Gubat Sangalubongan I. Pinulpullo a tawen kalpasanna, immadu dagiti gubat, sakit, bisin, ginggined, ken dadduma pay a pammaneknek a matungtungpalen “ti pagilasinan” nga inted ni Jesus kadagiti apostolna maipapan iti ‘kaaddana’ ken “ti panungpalan.” (Mateo 24:3, 7, 8, 14) Maar-aramiden ti pannakaikasaba ti naimbag a damag ti Pagarian, saan laeng nga iti masakupan ti Imperio ti Roma, no di ket iti intero a lubong.

Napaltiingan ni apostol Juan a mangiladawan no ania ti kaipapanan daytoy: “Ita napasamaken ti pannakaisalakan ken ti pannakabalin ken ti pagarian ti Diostayo ken ti autoridad ni Kristona.” (Apocalipsis 12:10) Wen, ti Pagarian ti Dios idiay langit, a nasaknap nga inwaragawag ni Jesus, ket talaga nga agpaypayso!

Dayta ket naimbag a damag para iti amin a matalek nga adalan ni Jesus. Mabalin nga ipapusoda dagiti sasao ni Juan: ‘Gapu itoy agragsakkayo, dakayo a langlangit ken dakayo nga agnaed kadakuada! Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti tiempona.’—Apocalipsis 12:12.

No kasta, saanen a nakatugaw ni Jesus nga agur-uray iti makannawan ni Amana. Agturturayen kas Ari, ken dandanin pukawenna ti amin a kabusorna. (Hebreo 10:12, 13) Ania ngarud a makaparagsak a paspasamak ti namnamaentayo?