Byo papichile moba jikumi kufuma kimye Yesu kyo ayile mwiulu, kwitululwa kwa mupashi wazhila pa Pentekosita kwamwesheshe’mba Yesu uji mwiulu. Kabiji kwajinga ne kishiino kikwabo kyamwesheshe’mba ukabwela. Mwana wa bwanga aye Setepena saka bakyangye kumwasa mabwe na mambo a kusapwila mu bukishinka, waambile’mba: “Talai! Namona jiulu jashinkuka ne Mwana muntu waimana ku kuboko kwa kilujo kya Lesa.”—Byubilo 7:56.

Yesu byo ajinga ku kuboko kwa kilujo kya Lesa wapembelejilenga mukambizho kufuma kwi Shanji waambijilwe jimo mu Mambo a Lesa. Na lutangijilo lwa mupashi, Davida wanembele’mba: “Yehoba waambijile Nkambo yami [Yesu] amba: ‘Ikala ku kuboko kwami kwa kilujo poso nkalule balwanyi bobe ke jitebe ja kunyantapo maulu obe.’” Kimye kya kupembelela byo kyapwile, wayile na “kushinda balwanyi [banji].” (Salamo 110:1, 2) Pano ñanyi kintu Yesu kyo aubilenga mwiulu kimye kyo apembelejilenga kushinda balwanyi banji?

Pa Pentekosita mu 33 C.E., kipwilo kya bena Kilishitu kyalengelwe. Yesu saka aji mwiulu watendekele kulama baana banji ba bwanga bashingwa mupashi. (Kolose 1:13) Wibatangijilenga mu mwingilo wabo wa kusapwila ne kwibanengezha bya kwingila mwingilo wabo kulutwe. Ñanyi mwingilo yenkao? Aba batwajijila kwikala ba kishinka kufika ne ku lufu ne kusangulwa bakekala bamfumu pamo ne Yesu mu Bufumu.

Muntu umo ukekala mfumu wajinga Saulo wayukanyikwa na jizhina ja kina Loma ja kuba’mba Paulo. Saulo wajinga Muyudea wajinga na mukoyo pa Mizhilo ya Lesa, pano bino, bantangi ba bupopweshi bwa Bayudea bamutwajile mungi kya kuba waswishishe’mba Setepena bamwase mabwe. Kabiji “byo akibazhingijile baana ba bwanga ba Nkambo ne kwibapingila amba ebepaye,” Saulo wayile ku Damasakasa. Bamuswishishe kwi Ñanga Mwine Mukatampe aye Kaifasa kuba’mba akakwate baana ba bwanga ba kwa Yesu ne kwibaleta ku Yelusalema. (Byubilo 7:58; 9:1) Nangwa byonkabyo, Saulo byo ajinga mu jishinda, ponkapotu kyeya kufuma mwiulu kyamusamijile kabiji waponene panshi.

Jiwi jabujile kuyukanyikwa ko jafumine jaumvwanyikile na kumwita’mba: “Saulo, Saulo, mambo ka o ubena kummanyikila?” Saulo waipwizhe’mba: “Nanchi yenu bañanyi, Nkambo?” Aye wakumbwile’mba: “Amiwa yami Yesu ye ubena kumanyika.”—Byubilo 9:4, 5.

Yesu waambijile Saulo kutwela mu Damasakasa  ne kupembelela kumubuula bya kuba, bino bamutangijilengatu pa kuya mu muzhi mambo kyeya kyamupofwile meso. Kabiji Yesu wamwekele mu kimwesho kwi Ananyasa, mwananji wa bwanga waikalanga mu Damasakasa. Yesu watumine Ananyasa kuya kwi Saulo na kumubuula bya kuba. Ananyasa wachiine kuba kino, bino Yesu wamubuujile’mba: “Uno muntu ye ye nasala kuba’mba akashimune jizhina jami ku bisaka bya bantu ne ku bamfumu ne ku bena Isalela.” Saulo watatwile kumona, kabiji monkamwa mu Damasakasa, “watendekele kusapwila mu mashinagoga pe Yesu amba uno ye Mwana Lesa.”—Byubilo 9:15, 20.

Na mambo a bukwasho bwa kwa Yesu, Paulo ne bakwabo basapwishi baingijile bingi bulongo mwingilo wa kusapwila watendekele Yesu. Lesa wibapesheshe kabiji mu mwingilo wabo mwafumine bintu byawama bingi. Pa myaka 25 yapichilepo kufuma kimye Yesu kyo amwekele kwi Paulo mu jishinda jaya ku Damasakasa, Paulo wanembele’mba mambo awama ‘asapwilwa ku bilengwa byonse biji pano panshi.’—Kolose 1:23.

Byo papichile myaka yavula, Yesu wamwesheshe bimwesho byavula ku mutumwa wanji ye atemenwe aye Yoano. Abino bimwesho byanembwa mu buku wa mu Baibolo wa Lumwekesho. Na mambo a kumona bino bimwesho, ko kuba’mba Yoano waikeleko kufika ne kimye kyo amwene Yesu na kubwela saka aji Mfumu. (Yoano 21:22) ‘Na mambo a mupashi wazhila Yoano waishile mu juba ja Nkambo.’ (Lumwekesho 1:10) Ñanyi juba jo aambilengapo?

Bishinka byo tufunda bungauzhi bwa mu Baibolo bimwesha’mba “juba ja Nkambo” jatendekele mu kino kimye kyetu. Mu mwaka wa 1914, kwaikele nkondo itelwa’mba Nkondo Itanshi ya Ntanda Yonse. Kabiji kufumatu mu uno mwaka, kwaikala makondo avula bingi, myalo, bipowe bya nzala, bitentanshi, ne biyukilotu bikwabo bimwesha’mba kufika kwa “kiyukilo” Yesu kyo abuujile batumwa banji kya “kwikalapo” kwanji ne “mpelo ya buno bwikalo.” (Mateo 24:3, 7, 8, 14) Kusapwila mambo awama a Bufumu kubena kubiwa mu ntanda yonse kechi mu byalotu byo balamanga ku bena Loma ne.

Yoano watangijilwe na mupashi kwamba kino byo kilumbulula. Waambile’mba: “Pano Lesa wetu waleta lupulukilo ku bantu, bulume bwanji bwasoloka kabiji Bufumu bwanji bwaikajikwa ne Kilishitu wanji watendeka kwingijisha luusa lwanji.” (Lumwekesho 12:10) Kya kine Bufumu bwa Lesa buji mwiulu Yesu bo asapwijilengapo, bubena kulama.

Ano ke mambo awama bingi ku baana ba bwanga ba kwa Yesu ba kishinka. Balanguluka pa byambo byaambile Yoano bya kuba’mba: “Onkao mambo, sekelai anweba meulu ne anweba mwikalamo! Malwa kwi anweba ntanda ne kalunga ka mema, mambo Diabola waikila ko muji, saka azhingila bingi, mambo wayuka’mba washalatu na kakimye kacheche.”—Lumwekesho 12:12.

Onkao mambo, Yesu kechi wakikala ku kuboko kwa kilujo kwa Shanji na kupembelela ne. Aluno ke Mfumu ubena kulama kabiji katatakatu akavizhe balwanyi banji bonse. (Bahebelu 10:12, 13) Pano ñanyi bintu byawama biji kulutwe byo tubena kutengela?