Yesu ke mwende mūlu ke padi mafuku dikumi, ino mushipiditu ujila wapungululwa mu difuku dya Pentekosa ubaleta bukamoni amba udi bine mūlu. Kadi kudi bukwabo bukīya kumeso. Kumeso kwa mwanā bwanga Shitevani kwaswa mabwe mwanda wa kupāna kwaādi upāna na kikōkeji bukamoni, wānenene amba: “Talai! Namone madiulu ashituka ne Mwanā muntu wimene ku kuboko kwa lundyo kwa Leza.”—Bilongwa 7:56.

Yesu pādi na Shandi mūlu, unenwe kwilaija kintu kimo kyalāilwe mu Kinenwa kya Leza. Davida wāsonekele ku bukomo bwa mushipiditu amba: “Yehova wasapwidile Mfumwami [Yesu] amba: ‘Shikata ku kuboko kwami kwa lundyo enka ne byontūla balwana nobe ke kitūlo kya maulu obe.’” Shi kitatyi kya kwilaija kibapu, ufwaninwe kunekenya “mu bukata mwa balwana [nandi].” (Ñimbo ya Mitōto 110:1, 2) Ino i bika bisa kulonga Yesu mūlu pailaija kitatyi kya kulwa na balwana nandi?

Mu Pentekosa wa 33 Yesu ke mwiye, kyo kitatyi kyaikele’ko kipwilo kya bwine Kidishitu. Yesu washilwile kuludika, nansha kubikala tamba mūlu pa bandi bana ba bwanga bashingwe māni a mushipiditu. (Kolose 1:13) Wadi wibaludika mu mwingilo wabo wa busapudi ne kwibateakanya ku mwingilo mukwabo obakengila kumeso. I mwingilo’ka? Boba bakōkela kufika ne ku lufu bakasangulwa ne kwingila bu balopwe pamo na Yesu mu Bulopwe.

Kimfwa kitulumukwa kya muntu umo wadi wa kwikala bu mulopwe i Solo, uyukene biyampe pa dijina dyandi dya bwine Loma dya bu Polo. Wādi Muyuda upyasakenine bininge Bijila bya Leza, ino bendeji ba bipwilo bya Bayuda bāmulumbakenye wāitabija’nka ne kwitabija bāse Shitevani mabwe. Solo wāendele ku Damakasa, mwanda wādi, “ukikanina kulondalonda ne kwipaya bana ba bwanga ba Mfumwetu.” Wāpelwe lupusa na Kitobo Mukatampe Kaifasa lwa kukuta bana ba bwanga ba Yesu ne kwibajokeja ku Yelusalema. (Bilongwa 7:58; 9:1) Ino Solo paādi ukidi mwishinda, kiké kikatampe kyāmwasa wāpona panshi.

Diwi dyampikwa kuyukana koditamba kedimunena’mba: “Solo, Solo, le i kika kyoumpangilapangila?” Solo wamwipangula’mba: “A Mfumwetu, le wi ani?” Wamulondolola’mba: “I ami Yesu, mwine opangapanga.”—Bilongwa 9:4, 5.

 Yesu wāsapwidile Solo atwele mu Damakasa ne kwilaija bamulombole bya kulonga, ino bāmukunkwije kufika ne mu kibundi mwanda kiké kya mu kingelengele kyāmusabile meso. Ino mu kimonwa kikwabo, Yesu wāmwekele kudi Ananaisa, mwana wandi wa bwanga wādi ushikata mu Damakasa. Yesu wāsapwila Ananaisa ende kuntu kampanda akamone Solo. Ananaisa wādi uselele mutyima kūlu wa kwenda’ko, ino Yesu wāmukulupija’mba: “Uno muntu i kingidilwa kyonatonga mwanda wa kuselela dijina dyami ku mizo enka ne ku balopwe ne ku bana ba Isalela bene.” Solo wāshilwile kumona kadi enka mu Damakasa’mo, “waanza kusapula mu mashinankonka myanda ya Yesu, amba uno’u i Mwanā Leza.”—Bilongwa 9:15, 20.

Yesu wākweshe Polo ne basapudi bakwabo ba myanda miyampe bavuije mwingilo wa busapudi waāshilwile. Leza wēbakweshe mu muswelo utendelwa babwanye’o. Myaka 25 pa kupita’po na pāmumwekele Yesu mu dishinda dya ku Damakasa, Polo wālemba amba myanda miyampe ibasapulwa “mu bipangwa byonso bidi munshi mwa diulu.”—Kolose 1:23.

Myaka mikwabo pa kupita’po, Yesu wāpa Yoano mutumibwa wandi muswedibwe bimonwa bivule bidi mu mukanda wa mu Bible wa Kusokwelwa. Na bubine, kupityila ku bino bimonwa, Yoano wāmwene kujoka kwa Yesu bu Mulopwe mubikikwe. (Yoano 21:22) “Na buludiki bwa mushipiditu [Yoano wāselelwe] mu difuku dya Mfumwetu.” (Kusokwelwa 1:10) Le i kitatyi’ka kyakyo?

Bwifundi bwa katentekeji bwa bupolofeto bwa mu Bible bulombola’mba “difuku dya Mfumwetu” i dishilule mu kino kyetu kitatyi. Mu 1914, mwaka uyukene bu washilwile Divita Dibajinji dya Ntanda. Tamba papo, myaka makumi yalondele’po i miyule mavita mavule, bipupo bya misongo, nzala, kutenkana kwa ntanda, ne bintu bikwabo bileta bukamoni ntanda yonso bwa kufikidila kwa “kiyukeno” kyāpele Yesu batumibwa bandi kitala pa “kwikala’po” kwandi ne “mfulo.” (Mateo 24:3, 7, 8, 14) Mwingilo wa kusapula myanda miyampe ya Bulopwe ukyendelela ne pano, ke’nkapo mu Umbikalo wa Loma, ino i ntanda yonso.

Yoano wāpelwe bukomo bwa mushipiditu alombole mobishintulwila amba: “Pano kubaiya lupandilo ne bukomo ne Bulopwe bwa Leza wetu ne lupusa lwa Kidishitu wandi.” (Kusokwelwa 12:10) Bine, Bulopwe bwa Leza bwa mūlu, bwine bwāsapwile Yesu konsokonso, abu kebo!

Uno i mwanda usangaja bana ba bwanga bonso balamete Yesu. Banenwe kulama binenwa bya Yoano bya amba: “Pa uno mwanda, sangalai manwe madiulu ne banwe bekele’mo! Malwa obe ntanda ne abe dijiba, mwanda Dyabola watūkila pomudi, udi na bulobo bukatampe, pa kuyuka’mba udi na kakitatyi katyetye.”—Kusokwelwa 12:12.

Nanshi Yesu kakishiketepo ku kuboko kwa lundyo lwa Shandi wilaija, aa. Ino uludikanga bu Mulopwe, kadi panopano ponka usa konakanya balwana nandi bonso. (Bahebelu 10:12, 13) Bine uno i mwanda usangaja otutengēle, mwene i amo?