Matuku dikumi panyima pa Yezu mumane kubanda mu diulu, ditshikijibua dia nyuma muimpe dituku dia Pentekoste divua tshijadiki tshia ne: uvua bushuwa mu diulu. Tshijadiki tshikuabu tshia bualu ebu tshivua ne bua kuenzeka mu matuku makese. Katupa kakese kumpala kua kuasabu muyidi Stefano mabue bua lulamatu luvuaye nalu mu diyisha, wakamba ne: “Tangilayi! Ndi mmona diulu dibululuke ne Muana wa muntu muimane ku tshianza tshia balume tshia Nzambi.”​—Bienzedi 7:56.

Pakavua Yezu ne Tatuende mu diulu, uvua ne bua kuindila mukenji kampanda musunguluke ukavuabu bambe mu Dîyi dia Nzambi. Ku diambuluisha dia nyuma, Davidi wakamba ne: “Yehowa wakambila Mukalenge wanyi [Yezu] ne: ‘Somba ku tshianza tshianyi tshia balume Too ne pangateka bena lukuna bebe bu kabasa ka kutekela makasa ebe.’” Pavua tshikondo tshia dindila tshijika, uvua ne bua ‘kukokesha munkatshi mua bena lukuna bende.’ (Misambu 110:1, 2) Kadi ntshinyi tshivua Yezu ne bua kuenza kumbukila mu diulu pavuaye muindile tshikondo tshia kuangata malu mu bianza bua kuluisha bena lukuna bende?

Mu Pentekoste wa mu 33 B.B., tshisumbu tshia bena Kristo tshiakenzeka. Kumbukila mu diulu Yezu wakatuadija kukokesha pa mutu pa bayidi bende bela manyi a nyuma. (Kolosayi 1:13) Wakabalombola mu mudimu wabu wa kuyisha ne wakabalongolola bua mudimu wabu utshivua ulua. Mmudimu kayi? Aba bavua bashale ne lulamatu too ne ku lufu bavua ne bua kubishibua ku lufu ne bavua ne bua kukokesha ne Yezu bu bakalenge mu Bukalenge bua Nzambi.

Shaula ke tshilejilu tshinene tshia muntu uvua ne bua kulua mukalenge, uvua mumanyike bikole mu dîna dia buena Lomo dia Paulo. Uvua muena Yuda uvua ne tshisumi tshia bungi bua Mikenji ya Nzambi, kadi bavua bamulombola bibi kudi bamfumu ba bitendelelu bena Yuda, kumufikishabi too ne ku ditaba bua base Stefano mabue. Pashishe Shaula wakaya ku Damaseke “ufunyina bayidi ba Mukalenge ne ujinga kubashipa.” Muakuidi munene Kayifa wakamuitabila bua kukuata bayidi ba Yezu ne kupingana nabu ku Yelushalema. (Bienzedi 7:58; 9:1) Kadi patshivua Shaula mu njila bukenke bukole buakamutua, ke yeye kukuluka panshi.

Kumvuaye dîyi kayi mumanye kuvuadi difumina dimuambila ne: “Shaula, Shaula, bua tshinyi udi unkengesha?” Shaula wakebeja ne: “Wewe udi nganyi, Mukalenge?” Dîyi diakamuandamuna ne: “Meme ndi Yezu uudi ukengesha.”​—Bienzedi 9:4, 5.

 Yezu wakambila Shaula bua kubuela mu Damaseke ne kuindilaku bua amuambile malu makuabu, kadi bivua bikengela muntu aye nende mu tshimenga atshi bualu bukenke bua mu tshishima ebu buvua bumuvuije mpofu. Mu tshikena kumona tshikuabu, Yezu wakamuenekela Ananiya umue wa ku bayidi bende uvua musombele mu Damaseke. Yezu wakambila Ananiya bua kuya muaba kampanda bua kupeta Shaula. Ananiya uvua mukuatshidile bua kuya, kadi Yezu wakamushindikila ne: “Muntu au udi tshivuadi tshindi musungule bua kuya ne dîna dianyi kudi bisamba bikuabu, kabidi ne kudi bakalenge ne bana ba Isalele.” Shaula wakatuadija kumona kabidi, ne ku Damaseke aku “wakatuadija diakamue kuyisha bualu bua Yezu mu nsunagoga ne: yeye eu mmuana wa Nzambi.”​—Bienzedi 9:15, 20.

Yezu wakambuluisha Paulo ne bamanyishi bakuabu bua kutungunuka ne mudimu wa kuyisha uvuaye mutuadije. Nzambi uvua mubabeneshe bua kupatula bipeta bimpe. Bu bidimu 25 Yezu mumane kumuenekela Paulo mu njila uvua uya ku Damaseke, Paulo wakafunda ne: lumu luimpe luvua luyishibue “munkatshi mua bifukibua bionso bidi muinshi mua diulu.”​—Kolosayi 1:23.

Panyima pa bidimu, Yezu wakaleja mupostolo Yone uvuaye munange bikole mulongolongo wa bikena kumona bidi mu mukanda wa Buakabuluibua. Mu bikena kumona ebi, Yone wakamona Yezu upingana mu bukokeshi bua Bukalenge. (Yone 21:22) “Ku bukole bua nyuma [Yone] wakadisangana mu dituku dia Mukalenge.” (Buakabuluibua 1:10) Ndîba kayi divua bualu ebu mua kuenzeka?

Dikonkonona ne ntema mêyi a buprofete a mu Bible didi dileja ne: “dituku dia Mukalenge” divua dituadije mu tshikondo tshietu etshi. Mu 1914, Mvita ya kumpala ya buloba bujima yakabudika. Mu bidimu bia bungi biakalonda, mvita ya bungi, bipupu, biyole bia nzala, dikanka dia buloba, ne malu makuabu biakakumbaja mu mushindu mualabale “tshimanyinu” tshivua Yezu mupeshe bapostolo bende bua “dikalaku” diende ne bua “nshikidilu.” (Matayi 24:3, 7, 8, 14) Mpindieu badi benda bayisha lumu luimpe lua Bukalenge, ki nganu mu tshipapu tshia Bukalenge bua Lomo to, kadi pa buloba bujima.

Nyuma wakambuluisha Yone bua kumvuija bualu ebu wamba ne: “Mpindieu lupandu ne bukole ne Bukalenge bia Nzambi wetu ne bukokeshi bua Kristo wende biafiki, bualu mubandi wa bana betu, udi ubabanda munya ne butuku kumpala kua Nzambi wetu, mmuedibue panshi!” (Buakabuluibua 12:10) Eyowa, Bukalenge bua Nzambi bua mu diulu buvua Yezu muyishe bikole mbualu bulelela!

Elu ndumu luimpe bua bayidi bonso ba Yezu ba lulamatu. Badi mua kuvuluka mêyi a Yone aa: “Bua bualu ebu, sankayi nuenu diulu ne nuenu badi basombamu! Diakabi bua buloba ne bua mbuu, bualu Diabolo mmupueke kunudi, muikale ne tshiji tshikole, mumanye ne: udi ne tshikondo tshîpi.”​—Buakabuluibua 12:12.

Nunku, Yezu ki mmusombe kabidi ku tshianza tshia balume tshia Tatuende muindile to. Udi ukokesha bu Mukalenge ne mu katupa kîpi emu neabutule baluishi bende bonso. (Ebelu 10:12, 13) Mmasanka kayi atuapeta tshikondo atshi?