Omu mwahichile makumbi 10 kufuma haze Yesu ayile mwilu, shipilitu yajila vayihingunwinyine hali vatu halikumbi lyaPendekoseta, kahechi chasolola nge chikupu vene Yesu ayile mwilu. Kaha kwasolokele nawa unjiho ukwavo. Shimbu kanda kambaji Setefwano vamwase malolwa hakushishika chenyi, atambakanyine ngwenyi: “Talenu! Ngunamono mwilu munasokoloka, naMwanamutu nawa nemana kulivoko lyachilyo lyaKalunga.”—Vilinga 7:56.

Omu Yesu apwile mwilu naIse, avandaminyine lushimbi lumwe lwamuMazu aKalunga lutesemo. Ndavichi vamuhwiminyinyine asoneke ngwenyi: “Yehova ambile kuli Mwata wami [Yesu] ngwenyi: ‘Twamanga kulivoko lyami lyachilyo palanga nomu nangukahaka vaka-kole jove kupwa chitwamo chakulyata mahinji ove.’” Omu lwola lwakuvandamina lwakumine, Yesu ‘ayile nakufungulula muli vaka-kole jenyi.’ (Samu 110:1, 2) Uno vyuma muka atelele kulinga Yesu halwola apwile nakuvandamina afungulule vaka-kole jenyi?

HaPendekoseta yamu 33 C.E. hakiko haputukilile chikungulwilo chavaka-Kulishitu. Omu apwile mwilu, Yesu aputukile kuyula tumbaji twenyi vawavisa nashipilitu yajila. (Wavaka-Kolose 1:13) Avatwaminyinyinenga mumulimo wakwambulula nakuvakafwa hamilimo navakazata kulutwe. Mulimo muka? Vaze navapwa vakushishika palanga nakukufwa chavo, navakavasangula nakukapwa vamyangana vaze navakayula hamwe naYesu muWangana.

Mutu umwe uze atelele kupwa mwangana kulutwe shina Saulu, uze apwile nalijina lyakufuma kuli vaLoma ngwavo Paulu. Apwile kaYuleya uze akavangijilenga chikuma Jishimbi jaKalunga, oloze vatwamina vamukwitava chavaYuleya vamuhungumwishile nakumulingisa jino akatwaminyine navaze vashile Setefwano malolwa. Kahomu Saulu “achipwile lika nakukinjila tumbaji twaMwata nautenu,” ayile kuNdamashiku. Vamwitavishile kuli Kapilishitu Wakulitulaho Kayafwase mangana akase tumbaji twaYesu nakuvaneha kuYelusalema. (Vilinga 7:58; 9:1) Oloze omu Saulu apwile nakuya mujila, mumunyi wamumunyikile, kaha alimbukile hamavu.

Evwile lizu nalihanjika ngwalyo: “Ove Saulu, ove Saulu, uli nakunguyanjishila ika?” Kaha Saulu ahulishile ngwenyi: “Ove Mwata, yove iya?” Vamukumbulwile ngwavo: “Yami Yesu, ou uli nakuyanjisa.”—Vilinga 9:4, 5.

 Yesu alwezele Saulu engile muNdamashiku avandamine vyuma mwamulweza, oloze asakile kumutwaminyina munganda kana mwomwo uze mumunyi vamumunyikile mujila yakukomwesa wamwilavishile meso. Yesu nawa alisolwele muchakumwenesa cheka kuli kambaji kenyi Ananyiya uze atwaminenga muNdamashiku. Alwezele Ananyiya ayenga kuchihela chimwe akawane Saulu. Ananyiya evwile woma kulinga chuma kana, oloze Yesu amukolezezele ngwenyi: “Ou mutu kuli ami napu chuma chakusakula, mangana akavilike lijina lyami kuli vaka-mafuchi, nakuli vamyangana, nakuli vana vaIsalele.” Meso aSaulu atonene, kaha muze vene muNdamashiku “aputukile kwambulula vyaYesu mujisunangonga ngwenyi, ou ikiye MwanaKalunga.”—Vilinga 9:15, 20.

Yesu apwilenga nakukafwa Paulu navaka-kwambulula veka vatwaleho lika kuzata mulimo wakwambulula uze aputukile Yesu. Kalunga avakiswile, ngocho mulimo wavo wafukilile. Omu mwahichile myaka 25 kufuma haze Yesu asolokele kuli Paulu mujila yakuya kuNdamashiku, Paulu asonekele ngwenyi mujimbu wamwaza vawambulwile “kuvyuma vyakutenga vyosena vize vyatwama mwishi yamelu.”—Wavaka-Kolose 1:23.

Mukuhita chamyaka, Yesu amwenesele kaposetolo Yowano vyakumwenesa vyavivulu vyakulikavasana vize vyatwama muMbimbiliya mumukanda waKusoloka. Kuhichila muvyakumwenesa kanevi, chikupu vene Yowano amwene Yesu mwakinduluka mungolo jaWangana. (Yowano 21:22) Yowano ambile ngwenyi: “Hakunguhwimina nashipilitu, ngwapwile mulikumbi lyaMwata.” (Kusoloka 1:10) Uno vyuma kana vyatelele kusoloka mulwola muka?

Kulinangula nakuhunanana kanawa upolofweto wamuMbimbiliya, chasolola nge “likumbi lyaMwata” lyejile nakupwako mumakumbi etu ano. Mu 1914 mukiko mwaputukile Jita yaKaye yakulivanga. Kaha kufuma vene haze, myaka yosena yinahichiho yinapunga yajijita jajivulu, namisongo yachihita, nazala yakalombolombo, namindenda, navyuma vyeka vize vinatesamo upolofweto ‘wachinjikizo’ chize Yesu alwezele vaposetolo jenyi chakutachikijilaho ‘kupwako’ chenyi ‘nakukuma’ chamyaka yino. (Mateu 24:3, 7, 8, 14) Mujimbu wamwaza waWangana vali nakuwambulula mukaye kosena, keshi muchiyulo chavaLoma kahako.

Yowano vamuhwiminyinyine asoneke mwalumbunukila vyuma kana, ambile ngwenyi: “Kuneza jino ulwilo, nangolo, naWangana vyakuli Kalunga ketu, nawata waKulishitu yenyi.” (Kusoloka 12:10) Eyo, Wangana waKalunga wamwilu uze Yesu ambulwilenga chikuma unahete jino.

Ou himujimbu wamwaza kuli tumbaji twaYesu vakushishika. Vatela kulama mazu aze ahanjikile Yowano ngwenyi: “Shikaho enu melu nayenu mwatwamamo, wahililenunga. Lamba hamavu nahakalungalwiji, mwomwo Liyavolo neza kuli enu, ali namatoto amanene, mwomwo natachikiza ngwenyi ali kaha nakashimbu kakandende.”—Kusoloka 12:12.

Ngocho oholyapwa, Yesu katwamine kulivoko lyaIse lyachilyo nakuvandaminako. Oloze ali nakuyula kupwa Mwangana, kaha kalinwomu afumiseko vaka-kole jenyi vosena. (WavaHepeleu 10:12, 13) Uno vyuma muka vyamwaza vize vili nakutuvandamina?