A Zeezi sẽn loog saasẽ wã rasem piig poore, Pãntekotã raare, a kõo a karen-biisã vʋʋsem sõngã, tɩ yaa kaset t’a sɩd bee saasẽ. La bũmb a to me n yɩ kaseto. Nand tɩ b lob karen-biig a Etɛn kug a sẽn da moond koɛɛgã yĩngã, a yeelame yaa: “Kelg-y yã, mam nee yĩngr sẽn pake la Ninsaal Bi-riblã sẽn yas Wẽnnaam dɩtgo.”—Tʋʋmã 7:56.

A Zeezi sẽn loog saasẽ n tɩ be ne a Ba wã, a ra gũudame t’a yeel gomd b sẽn da togse. Wẽnnaam da vẽnega a Davɩɩd t’a yeel woto: “Sẽn-Ka-Saab yeela mam zu-soabã [a Zeezi] yaa: ‘Zĩnd mam dɩtgo, hal tɩ m kɩt tɩ f bɛɛbã lebg f nao roagendga.’ ” A sã n gũ tɩ wakat wa ta, Wẽnnaam na n kɩtame t’a ‘soog a bɛɛbã sẽn gũbg-a wã!’ (Yɩɩn-sõamyã 110:1, 2) La bõe la a Zeezi na n maane, n gũud wakat ning a sẽn na n zab ne a bɛɛbã?

Kiris-neb tigingã lugla yʋʋmd 33 Pãntekotã sasa. Rẽ tɛka, a Zeezi lebga sẽn paam-b vʋʋsem sõng zaeebã naaba, n be saasẽ. (Koloos-rãmbã 1:13) Yẽ n sõng-b koɛɛgã mooneg pʋgẽ, la a sõng-b me tɩ b segl b mense. Segl b mens bõe yĩnga? Neb nins sẽn na n kell n sak Wẽnnaam n tãag kũumã na n wa paamame tɩ Wẽnnaam vʋʋg-ba, tɩ b tɩ naag a Zeezi a soolmã pʋgẽ, n yɩ a na-rɩt-n-taase.

Ned a ye sẽn da na n wa paam n lebg rĩm saasẽ yaa a Soll b sẽn boond me t’a Pollã. A ra yaa zʋɩfe, n da tar yẽesem wʋsg Wẽnnaam tõogã tũub pʋgẽ. Zʋɩf-rãmbã tũudum taoor dãmb belg-a lame, hal t’a sak meng tɩ b lob a Etɛn kug n kʋ. Rẽ poore, “a Soll sẽn dag n ket n namsd Zu-soabã karen-biis n dat n kʋ-bã” yĩnga, a yikame n na n kẽng Damaase. Maan-kʋʋdb kãsem a Kayif kõ-a-la sor t’a na n tɩ yõg a Zeezi karen-biisã n tall-b n wa Zeruzalɛm. (Tʋʋmã 7:58; 9:1) La a sẽn wa n be Damaas sorã zugã, vẽenem n yãg n gũbg-a t’a lʋɩ tẽnga.

A ra pa ne neda, la a wʋma koɛɛg sẽn yeele: “Solle, Solle, yaa bõe tɩ fo namsd maam?” A Soll sokame: “Zu-soaba, yãmb yaa ãnda”? La a leokame: “Mam yaa a Zeezi fo sẽn namsd a soabã.”—Tʋʋmã 9:4, 5.

A Zeezi yeela a Soll t’a yik n kẽng Damaas t’a na n wa wilg-a-la a sẽn tog n maane. La yɩɩ tɩlɛ tɩ b tɛ-a, bala vẽenemã ra kɩtame t’a lebg zoanga. A Zeezi vẽnega a karen-biig a ye sẽn be Damaas t’a yʋʋr boondẽ t’a Hananiyaase, n wilg-a a Soll sẽn be zĩig ninga, la a yeel t’a kẽng n tɩ yã-a. A Hananiyaas ra yɛɛsdame n pa rat n kẽng ye. La a Zeezi togs-a-la gomd t’a yamã gãande. A yeel-a lame yaa: “Mam yãka rao-kãngã n na n kɩt t’a tall mam yʋʋrã n wilg bu-zẽmsã la rĩm-dãmbã, la Israyɛll nebã.” A Soll ninã wa n pukame, la Damaas tẽngã pʋgẽ bala, a “sɩngame n moond koɛɛgã karen-dotã pʋsẽ n yetẽ t’a Zeezi yaa Wẽnnaam Bi-ribla.”—Tʋʋmã 9:15, 20.

Ne a Zeezi sõngre, a Poll ne koe-moondb a taab kell n moona koɛɛgã sẽn yaa tʋʋmd a Zeezi meng sẽn sɩngã. Wẽnnaam ning-b-la bark hal tɩ tʋʋmdã wom biisi. Na maan yʋʋm 25 loogr poore, a Poll mengã yeelame tɩ b moona koɛɛgã “ninsaalbã fãa sẽn be dũniyã zugã.”—Koloos-rãmbã 1:23.

Kaoosg zugẽ, a Zeezi vẽnega tʋm-tʋmd a Zã a sẽn nong wʋsgã, t’a yã bũmb toor-toore, n gʋls fãa tɩ be Biiblã sebr ning b sẽn boond tɩ Vẽnegrã pʋgẽ. A Zã sẽn yã bũmb ninsã kẽer bilgda a Zeezi sẽn da na n wa reeg naamã. (Zã 21:22) A Zã meng yeelame yaa: “Zu-soabã daare, Sɩɩg-sõng pida maam.” (Vẽnegre 1:10) La Zu-soabã daarã ra na n yɩɩ wakat bʋgo?

D sã n maag d yĩng n bʋgs Biiblã bãngr-goamã zugu, d mikdame tɩ ‘Zu-soabã daar’ sɩnga yʋʋmd 1914. Yɩɩ yʋʋm-kãng la dũni gill pipi zabrã yik-yã. Wakat kãng tɛka, yaa zaba, naongo, kom, tẽn-digimdgu, la yɛl a taaba, hal n tar yãngr bala. Woto fãa naaga bãnd ning yell a Zeezi sẽn gom ne a tʋm-tʋmdbã, a sẽn wa n gomd a waoongã la dũniyã saab yellã. (Matye 24:3, 7, 8, 14) Rũndã-rũndã, b moonda Wẽnnaam soolem koe-noogã dũniyã gill zugu. Pa Rom soolmã pʋgẽ bal ye.

Wẽnnaam vẽnega a Zã t’a wilg yel-kãensã fãa sẽn maandã võore. A yeelame: “Moasã, fãagre, la pãnga, la tõnd Wẽnnaamã naam la bãmb Kirisã noor waame.” (Vẽnegre 12:10) Hakɩɩka, Wẽnnaam saasẽ soolmã a Zeezi sẽn moon zĩig fãa wã sɩd luglame.

Woto yaa koe-noog kiris-neb hakɩɩkã yĩnga. La bũmb la a Zã togs-yã, tɩ b pa segd n yĩm ye. Ad a sẽn yeele: “Yaa woto yĩnga, saasẽ, la yãmb dãmb sẽn be beenẽ wã maan sũ-noogo! Toog na n paama tẽngã ne ko-kãsengã. Bala, Sʋtãanã sig n waa yãmb nengẽ ne sũ-puugri, a sẽn bãng t’a wakatã sẽn ketã ka waoogã yĩnga.”—Vẽnegre 12:12.

Dẽnd a Zeezi pa le zĩ Wẽnnaam rɩtg n gũudẽ ye. A lebga Rĩmã, la ka la bilfu a na n sãama a bɛɛbã fãa. (Ebre-rãmbã 10:12, 13) Woto wã, bark bʋs la tõnd na n wa paame?