Ngemva kwamalanga alitshumi uJesu ehambe ezulwini, wathululela abafundi bakhe umoya ongcwele ngePhentekhosti futhi lokhu kwaba yibufakazi bokuthi sesezulwini. Kodwa kulobunye ubufakazi obabuzakuba khona. Umfundi okuthiwa nguStefane wathi esezakhandwa ngamatshe ngenxa yomsebenzi wakhe wokutshumayela wathi: “Khangelani! Ngibona amazulu evulekile leNdodana yomuntu imi esandleni sokudla sikaNkulunkulu.”​—ImiSebenzi 7:56.

UJesu eseloYise ezulwini wayezalindela umlayo owawuvele ukhulunyiwe eLizwini likaNkulunkulu. UDavida waphefumulelwa ukuthi abhale amazwi la: “UJehova uthi enkosini yami [uJesu]: ‘Hlala ngasekunene kwami ngize ngenze izitha zakho zibe yisinyathelo sezinyawo zakho.’” Kwakuzakuthi isikhathi sesifikile ‘abuse phakathi kwezitha zakhe.’ (IHubo 110:1, 2) Kodwa uJesu wayezabe esenzani ezulwini esalindele ukuzisusela amanqe izitha zakhe?

Ibandla lamaKhristu laba khona ngePhentekhosti lika-33 C.E. Esesezulwini, uJesu waqalisa ukubusa abafundi bakhe abagcotshwe ngomoya. (KwabaseKholose 1:13) Wabancedisa emsebenzini wokutshumayela futhi wabalungiselela umsebenzi ababezawenza esikhathini esizayo. Yiwuphi lowomsebenzi? Ababezathembeka baze bafe babezavuswa njalo babezabusa loJesu eMbusweni.

Omunye owayezabusa loJesu esikhathini esizayo nguSawuli owayesaziwa ngebizo lakhe leRoma okuthiwa nguPhawuli. WayengumJuda owayeselesikhathi eside etshisekela uMthetho kaNkulunkulu kodwa wayesephanjaniswe ngabakhokheli benkolo waze wavumelana lokubulawa kukaStefane. USawuli waqonda eDamaseko “ebasongela abafundi beNkosi futhi efuna ngabomvu ukubabulala.” UMphristi Omkhulu uKhayifasi wayemuphe imvumo yokuthi abophe abafundi bakaJesu abuye labo eJerusalema. (ImiSebenzi 7:58; 9:1) Kodwa uSawuli wathi esendleleni kwaba lokukhanya okwaphazima lapho ayekhona wasewela phansi.

Kwazwakala ilizwi livela ezulwini lisithi: “Sawuli, Sawuli, kanti ungihlukuluzelani?” Yena wabuza wathi:“Ungubani Nkosi?” Ilizwi lelo lathi: “NginguJesu, lowo omhlukuluzayo.”​—ImiSebenzi 9:4, 5.

UJesu watshela uSawuli ukuthi aye eDamaseko alindele ayezakutshelwa khonale, kodwa  kwakumele ayengena edolobheni lelo eqhutshwa ngoba ukukhanya okuyisimangaliso kwakumenze waba yisiphofu. UJesu wabonakala embonweni komunye umfundi ohlala eDamaseko okuthiwa ngu-Ananiya, wamlayela ukuthi uzamthola ngaphi uSawuli. U-Ananiya wayesesaba ukuya kuSawuli kodwa uJesu wathi kuye: “Indoda le iyisitsha sami esikhethwe ukuthi sifakaze ngebizo lami ezizweni lasemakhosini kanye lasemadodaneni ako-Israyeli.” USawuli waphinda wabona futhi “waqalisa ukutshumayela” khonapho eDamaseko, “etshela abantu ukuthi uJesu uyiNdodana kaNkulunkulu.”​—ImiSebenzi 9:15, 20.

UJesu wancedisa uPhawuli labanye ababetshumayela ukuthi baqhubeke ngomsebenzi wokutshumayela ayewuqalisile. UNkulunkulu wawubusisa umsebenzi wabo. Kwathi sekwedlule iminyaka engaba ngu-25 uJesu ebonakele kuPhawuli endleleni yokuya eDamaseko, uPhawuli wabhala ukuthi izindaba ezinhle ‘zasezitshunyayelwe kukho konke okudaliweyo okungaphansi kwezulu,’ okutsho ezindaweni zonke ezingaphansi koMbuso weRoma.​—KwabaseKholose 1:23.

Ngemva kweminyaka eminengi uJesu wanika umphostoli ayemthanda uJohane imibono etholakala eBhayibhilini kuSambulo. Imibono uJohane ayibonayo yenza kwaba sengathi uphile waze wabona uJesu ephenduka emandleni oMbuso. (UJohane 21:22) ‘[UJohane] waphefumulelwa waba sosukwini lweNkosi.’ (ISambulo 1:10) Usuku lolo lwaluzakuba khona nini?

Iziphrofetho eziseBhayibhilini ziveza ukuthi ‘usuku lweNkosi’ lwaba khona ngo-1914. Ngomnyaka lo kwaba leMpi Yomhlaba Yokuqala. Kusukela ngalesosikhathi sekube lezimpi ezinengi, izifo, indlala lokuzamazama komhlaba lokunye okunengi okutshengisa ukuthi siyagcwaliseka “isibonakaliso” uJesu akhuluma ngaso kubaphostoli bakhe esasimayelana ‘lokuba khona’ kwakhe kanye ‘lokuphela.’ (UMathewu 24:3, 7, 8, 14) Khathesi izindaba ezinhle zoMbuso kazisatshunyayelwa ezindaweni ezingaphansi koMbuso weRoma kuphela kodwa sezitshunyayelwa emhlabeni wonke.

UJohane waphefumulelwa ukuthi achaze ukuthi zitshengisani lezozinto. Wathi: “Khathesi isikhona insindiso, lamandla, loMbuso kaNkulunkulu wethu kanye lamandla kaKhristu wakhe.” (ISambulo 12:10) UMbuso kaNkulunkulu osezulwini uJesu akhuluma ngawo ebantwini abanengi ukhona sibili.

Lezi yizindaba ezinhle kubo bonke abafundi bakaJesu abaqotho. Bangaqiniswa ngamazwi kaJohane athi: “Ngenxa yalokho, thokozani mazulu lani elihlala kuwo! Maye ngomhlaba langolwandle ngoba uDeveli wehlele kini ethukuthele kakhulu, esazi ukuthi ulesikhathi esifitshane.”​—ISambulo 12:12.

Yikho-ke isikhathi sikaJesu sokulinda sesadlula. Khathesi uyabusa njalo sekuseduze ukuthi abhubhise zonke izitha zakhe. (KumaHebheru 10:12, 13) Pho kuyini okuhle esizakubona ngesikhathi esizayo?