Evinre mahiku khumi amanle Yesu owela wirimu, oyeehiwa wa munepa waweela mu Pentekoste waahooniherya wi Yesu chiryene aari wirimu. Nave sawooniherya sawaacererya saaheereya. Ahaakumve oohuserya Stefano ovonyiwa maluku nthowa na onamoona awe woororomeleya, owo aaloca: “Miyo kinnona wirimu ohulen’yewo ni Mwana a mutxhu emenle omononi wolopwana wa Muluku.”—Saweriwa T’arummwa 7:56.

Vaavaa aareiye wirimu ni Tiithi awe, Yesu aahaala oweherya nlamulo nooluluwanya naaloheryiwe mu Masu a Muluku. Mooveereliwa Tavite aahirepa: “Yehova álocha wa Apwiya aka [Yesu], Kilathini va ntatani naka nolopwana, Ophiyerya kiwiyanthe amwichani anyu yonyikala’vo inani sanyu.” Vaavaa elukuluku ya oweherya yaakhwanenlaaya, owo aahaala olamulela “véri va amwichani [awe].” (Salumu 110:1, 2, Nlakano Nahihano) Nto tiheeni Yesu aahaaleiye opaka wirimu aweheryaka elukuluku ya weeravo echu ni amwiicani awe?

Mu Pentekoste a 33 E.K., waatikitheriwa muloko Weekristu. Orweela wirimu, Yesu aapacerya olamulela variyari va arummwaawe oothanliwa ni munepa. (Kolosi 1:13) Owo aanaahoolela mmuteko aya woolaleerya ni waarehererya mu muteko aya wa muhoolo. Muteko taani? Yaala yaahaala okhala oororomela ophiyerya okhwa yaahaala oviihiwa nave erumeele ntoko mamwene ni Yesu mu Omwene.

Yootakiherya yaphaama ya mmoha a yoowo ahaala okhala mwene a muhoolo ari Saulo, osuweliwe phaama ni nsina nawe na o Roma, Paulo. Owo aari Muyuta amvai mu Nlamulo na Muluku, koma owo aahuwelihiwa ni ahooleli a malapelo ophiyerya weemererya wi Stefano ovonyiwe maluku. Voocharela “awopopihaka ni asyaka owipha amuhuserya a Apwiya,” Saulo aaheemererya oya o Tamasko. Owo aalamuleliwe ni Mutokweene Eephepa Kayafa wi aahooxe arummwa a Yesu ni aakookiherye o Yerusalemu. (Saweriwa T’arummwa 7:58; 9:1) Mwawiihiiha, vaavaa Saulo aareiye mumphironi, waarya wa ekamaama waamusareya nave aahuwela vathi.

 Nsu naahiiweya wirimu nriki: “Sáulo, Sáulo, onakikarelani?” Nave Saulo aakoha: “Wani weyano, Pwiya?” Owo aahaakhuliwa: “Miyo kà Yesu onamwikarawe.”—Saweriwa T’arummwa 9:4, 5.

Yesu aamuleela Saulo wi avolowe o Tamasko wi aakhele mahusiheryo, nto owo aaphwanela ohooliwa wi aye opooma woona wi waarya wootikhiniha waamuruhela evaasi. Mu yawoona yoohiyana, Yesu aahimphiyerya Ananiya, mmoha a arummwa aakhala o Tamasko. Yesu aahimuleela Ananiya wi aye vanipuro nooluluwanya wi amphwanye Saulo. Ananiya aatepa woova weereno yeeyo, nave Yesu aahimulipiha Ananiya ariki: “Hawé, ntakhara mulopwana owo kòmuthanla wi alaleye nsina naka wa amalapo, wa mamwene ni wa anamwane a Isarayele.” Saulo aakookela woona nave o Tamasko weiwo “àpatxerya olaleya musinagoga wi Yesu ti mwana a Muluku.”—Saweriwa T’arummwa 9:15, 20.

Nnikhaviheryo na Yesu, Paulo ni anamalaleya akina yaatitelela mmuteko woolaleerya yoowo Yesu aapaceryinheiye. Muluku aahaareeliha ni yookhumelela yaphaama. Moovira wa iyaakha makhumi meeli nathanu Yesu amanle omphiyerya mu ephiro yo Tamasko, Paulo aahirepa wi michaka yaphaama ‘solaleriwa sopatusiwa sothene sa vathi verimu.’—Kolosi 1:23.

Moovira wa iyaakha, Yesu aahimvaha sawoona sootikhiniha murummwa awe oosiveliwa Yohani, seiyo inaphwanyeya mu liivuru a Piipiliya a Wupulula. Moorweela wa sawoona seiyo, Yohani aakhanle wi amoone Yesu akookaka mu ikuru sa Omwene. (Yohani 21:22) ‘[Yohani] áphariwe ti munepa nihiku na Apwiya.’ (Wupulula 1:10, Nlakano Nahihano) Yeeyo yaaya okhala liini?

Yooloherya ya Piipiliya enooniherya wi “nihiku na Apwiya” nipacenrye mu 1914. Mu eyaakha yeeyo yaapacerya Ekhoco Etokweene Yoopacerya. Nave mu iyaakha soocharela saakhumelela ikhoco, ipahu, etala, mwaacikinye, ni sawooniherya ikina sa okhwaanela wa ‘ineneryo’ seiyo Yesu aaleenleiye arummwa awe vooloca sa “orwa” wawe ni “yomaliha elapo.” (Mateu 24:3, 7, 8, 14) Olaleeryiwa wa michaka saphaama sa Omwene woopakiwa, ohiya pahiru mu Olamulelo wa o Roma, nyenya veelaponi yoothene.

ohani aahiveereliwa othariha yeeyo enataphulelaaya: “Nòhereya vano nivuluso, owerya ni omwene wa Muluku ahu, ni otokwene wa Kristu awe.” (Wupulula 12:10) Aai, Omwene wa Muluku wirimu, yoowo Yesu aalokonheiye, chiryene eparipari!

Iha michaka sootikhiniha wa oomuchara oororomeleya oothene a Yesu. Awo anaphwanela okuha mmurimani masu a Yohani “Tiva muhakalale nyuwo irimu ni nyuwano mmankemo! Nto otakhaliwa ti wa elapo ni ti wa ephareya, ntakhara musaserya okhuruwela sanyuwo ni owali mutokwene vosuwela wi elukuluku awe ehanle vakhani.”—Wupulula 12:12.

Mweeparipari, vano Yesu hakiranthe omoono woolopwana wa Atiithi awe awehereryaka. Owo onnalamula ntoko Mwene, nave moohilekela onahaala waatoloxa amwiicani awe oothene. (Ahebri 10:12, 13) Apwanne hamunoona wi Yaweereya yoohakalaliha nnawehereryaahu?