Matšatši a lesome ka morago ga ge Jesu a rotogetše legodimong, go tšhollwa ga moya o mokgethwa letšatšing la Pentekoste e bile bohlatse bja gore ge e le gabotse, Jesu o legodimong. Le gona bohlatse bjo bo oketšegile bja seo bo be bo sa tla. Pejana ga ge morutiwa Stefano a ka kgatlwa ka maswika ka baka la go nea bohlatse ka potego, o ile a goeletša a re: “Bonang! Ke bona magodimo a bulega gomme Morwa wa motho a eme ka letsogong le letona la Modimo.”—Ditiro 7:56.

Ge Jesu a na le Tatagwe kua legodimong, o be a tla letela taelo e itšego yeo e boletšwego e sa le pele Lentšung la Modimo. Dafida o buduletšwe go ngwala gore: “Jehofa o boditše Morena wa ka [Jesu] a re: ‘Dula ka letsogong la ka la le letona go fihla ke bea manaba a gago e le bogato bja dinao tša gago.’” Ge lebaka la go leta le fedile, o be a tla ‘ya go fenya gare ga manaba a gagwe.’ (Psalme 110:1, 2) Eupša Jesu o be a tla dira’ng a le legodimong ge a sa letetše nako yeo ka yona a tlago go tšea kgato kgahlanong le manaba a gagwe?

Ka Pentekoste ya 33 C.E., phuthego ya Bokriste e ile ya hlongwa. Jesu o ile a thoma go buša barutiwa ba gagwe bao ba tloditšwego ka moya a le legodimong. (Bakolose 1:13) O be a ba hlahla bodireding bja bona bja go bolela le go ba lokišeletša tema yeo ba bego ba tla e kgatha nakong e tlago. Tema efe? Bao ba botegago go fihla lehung mafelelong ba be ba tla tsošwa gomme ba hlankela e le dikgoši gotee le Jesu Mmušong wa Modimo.

Mohlala o mobotse kudu wa motho yo e bego e tla ba kgoši ya nakong e tlago ke Saulo, yoo a tsebjago ka leina la gagwe la Seroma la Paulo. E be e le Mojuda yo a fišegetšego Molao wa Modimo ka nako e telele, eupša o be a lahletšwa kudu ke baetapele ba bodumedi ba Bajuda moo a ilego a ba a dumelela gore Stefano a kgatlwe ka maswika. Ke moka, e le ge Saulo “a tšhošetša barutiwa ba Morena e bile a nyaka go ba bolaya,” o ile a leba Damaseko. O be a dumeletšwe ke Moperisita yo a Phagamego Kayafa go golega barutiwa ba Jesu le go ba bušetša Jerusalema. (Ditiro 7:58; 9:1) Lega go le bjalo, ge Saulo a sa le tseleng, seetša se se phadimago sa gadima go mo dikologa gomme a wela fase.

Lentšu leo le tšwago mothopong o sa bonagalego la goeletša la re: “Saulo, Saulo, o ntlhomaretše’ng?” Saulo a botšiša a re: “Ke wena mang, Morena?” Lentšu la fetola ka gore: “Ke nna Jesu yo o mo hlomerego.”—Ditiro 9:4, 5.

Jesu o ile a botša Saulo gore a tsene Damaseko gomme a letele ditaelo tše di oketšegilego, eupša o be a swanetše go hlahlwa ge a tsena motseng ka gobane seetša sa mohlolo se be se mo foufaditše. Ponong e nngwe, Jesu o ile a tšwelela go Ananiase, e lego yo mongwe wa barutiwa ba gagwe yo a dulago Damaseko. Jesu o ile a botša Ananiase gore a ye lefelong tsoko a yo nyaka Saulo. Ananiase o be a tshwenyegile ka go dira seo, eupša Jesu o ile a mo kgonthišetša ka gore: “Monna yoo ke sebjana se ke se kgethilego gore se iše leina la ka ditšhabeng gotee le go dikgoši le go bana ba Isiraele.” Saulo o ile a thoma go bona gape, gomme ge a le moo Damaseko o ile “a bolela ka Jesu . . . , gore Yo ke Morwa wa Modimo.”—Ditiro 9:15, 20.

Ka thekgo ya Jesu, Paulo le baebangedi ba bangwe ba ile ba tšwela pele ka modiro wa boboledi woo Jesu a bego a o thomile. Modimo o ile a ba šegofatša gomme ba atlega kudu. Mo e ka bago nywaga e 25 ka morago ga gore Jesu a tšwelele go Paulo tseleng e yago Damaseko, Paulo ile a ngwala gore ditaba tše dibotse di be di “[boletšwe] tlholong yohle yeo e lego tlase ga legodimo.”—Bakolose 1:23.

Nywaga ka morago, Jesu o ile a nea moapostola wa gagwe yo a mo ratago e lego Johane dipono tše mmalwa, tšeo di hwetšwago pukung ya Beibele ya Kutollo. Ge e le gabotse, Johane ka dipono tše o ile a bona Jesu a boa a le matleng a Mmušo. (Johane 21:22) Beibele e re: “[Johane o] bile letšatšing la Morena ka pudulelo.” (Kutollo 1:10) Le be le tla ba neng?

Go ithuta diporofeto tša Beibele ka kelohloko go utolla gore ‘letšatši la Morena’ le thomile mehleng yeno. Ka 1914, go ile gwa thoma seo se ilego se tsebja e le Ntwa ya Pele ya Lefase. Le gona nywagasome e mentši go tloga nakong yeo e ile ya swawa ka dintwa tše oketšegilego, mauba a malwetši, tlala, ditšhišinyego tša lefase le bohlatse bjo bongwe bjo bo bontšhago phethagalo e kgolo ya “pontšho” yeo Jesu a e neilego baapostola ba gagwe ya mabapi le ‘go ba gona ga gagwe’ le “bofelo.” (Mateo 24:3, 7, 8, 14) Gona bjale ditaba tše dibotse tša Mmušo wa Modimo di bolelwa lefaseng ka bophara, e sego tikologong ya Mmušo wa Baroma feela.

Johane o ile a budulelwa go hlalosa gore se se bolela eng ge a re: “Bjale go tlile phološo le matla le mmušo wa Modimo wa rena le matla a Kriste wa gagwe.” (Kutollo 12:10) Ee, Mmušo wa Modimo wa legodimong, woo Jesu a o tsebaditšego gohle, ke wa kgonthe!

Tšeo ke ditaba tše di kgahlišago go barutiwa ka moka ba Jesu bao ba botegago. Ba ka tšeela godimo mantšu a Johane a rego: “Ka baka leo, thabang lena magodimo le bao le dulago go ona! Go madimabe lefase le lewatle, gobane Diabolo o theogetše go lena a galefile kudu, ka ge a tseba gore o na le nako e kopana.”—Kutollo 12:12.

Ka go re’alo, Jesu ga a sa dutše ka letsogong le letona la Tatagwe a letile. O buša e le Kgoši gomme kgauswinyane o tla fediša manaba a gagwe ka moka. (Baheberu 10:12, 13) Re letetšwe ke ditiragalo dife tše di kgahlišago?