Etyi palamba ononthiki 10 tunde apa Sesusi apita keulu, ovalongwa vae avapewa ononkhono mba Huku monthiki yo Pendekosite. Otyo ankho tyilekesa okuti Sesusi ukahi-ale keulu. Otyipuka otyikuavo ankho tyilekesa okuti Sesusi ukahi keulu, ankho matyimoneka komutwe. Etyi nkhele omulongwa Sitevau eheneipawe nomamanya, wapopile okuti: “Talei! Ndyiete eulu liaikuka iya Omona womulume utai kokulio kwa Huku.” — Ovilinga 7:56.

Putyina Sesusi ekahi na Tate yae keulu, ankho makala omuvo umwe nokukevela ngetyi Ondaka ya Huku yapopile. Daviti wahonekele okuti: “Siovaa wapopila Tatekulu yange [Sesusi] okuti: ‘Pumphama kokulio kuange, alo ndyipaka onondyale mbove mombuelo yonomphai mbove.’” Tyina omuvo oo wokukevela wamapu, Sesusi ankho ‘matumina pokati konondyale mbae.’ (Salmo 110:1, 2) Mahi oityi ankho malingi putyina akevela omuvo wokuhanya-ko onondyale mbae?

Pomuvo wo Pendekosite 33 P.K., ewaneno Liovakilisitau alionganekwa. Menima olio Sesusi ahimbika okuhongolela ovalongwa vae, ovalembulwa. (Ova Kolosu 1:13) Evehongolela opo vafuisepo ovilinga viokuivisa nokuvepongiya pala otyilinga ankho mavakalinga komutwe wandyila. Otyilinga patyi? Mokueenda kuomuvo, vana vatualako noukuatyili alo kononkhia, ankho mavatutiliswa avakatumina na Sesusi Mouhamba wa Huku.

Ongeleka imwe ongwa ya umwe ankho makatumina na Sesusi oya Saulu, ankho wiiwe vali unene okuti o Paulu, enyina liae liova Loma. Ankho omu Sundeu una ombili onene Movitumino vya Huku, mahi ankho walongeswa omapita nononkhalamutwe mbova Sundeu, alo umwe etavela Sitevau aipawe nomamanya. ‘Atualako okulinga onya ovalongwa va Tatekulu iya ankho watokola okuveipaa,’ pahe ankho wenda ko Damasiku. Ankho watumwa Nomunene-nakwa Wavilapo Kaifaa, okukakwata ovalongwa va Sesusi opo evetuale ko Selusalei. (Ovilinga 7:58; 9:1) Mahi pu etyi Saulu ankho ekahi mondyila, akuliaima otyimimi tyimwe otyinene, atokela pohi.

Akuivala ondaka imwe keulu yati: “Saulu, Saulu, omokonda yatyi umonesila ononkhumbi?” Saulu ati: “Ovelie Tatekulu?” Ngwe ati: “Ame, ame Sesusi, una ove ukahi nokumonesa ononkhumbi.”—Ovilinga 9:4, 5.

Sesusi apopila Saulu opo aye ko Damasiku iya akevela etyi malongeswa. Mahi mokonda otyimimi tyemukalesa omumphoki, ankho una okutualwa. Memonekelo ekuavo, Sesusi apopila Ananiya, omulongwa wae ankho ukala mo Damasiku akaovole Saulu. Ananiya atili owoma okuenda-ko, mahi Sesusi emupopila okuti: “Enda, mokonda omulume oo, nemuholovona opo atuale enyina liange kovanthu vomalongo, no konohamba, no kova Isilayeli.” Omaiho a Saulu aakala nawa, amono-po iya ‘ahimbika okuivisa mo Damasiku konthele ya Sesusi okuti Omona wa Huku.’ — Ovilinga 9:15, 20.

Sesusi akuatesako Paulu novaivisi ovakuavo okutuala no komutwe ovilinga viokuivisa, vina Sesusi ankho ahimbika-le. Huku ayambe ovilinga viavo, ovanthu avetavela. Etyi palamba omanima 25 tunde etyi Sesusi amonekelele Paulu pokuenda ko Damasiku, Paulu ahoneka okuti: ‘Onondaka onongwa mbaiviswa-le kononthele ambuho mbouye.’ — Ova Kolosu 1:23.

Etyi palamba omanima, Sesusi aavela Suau o apositolu ehole, omamonekelo omanyingi, ekahi momukanda wahulilila-ko Wombimbiliya. Momamonekelo oo, Suau wamona Sesusi wakondoka, ukahi nokutumina Mouhamba wa Huku. (Suau 21:22) ‘Kononkhono mba Huku [Suau] atualwa monthiki ya Tatekulu.’ (Eholololo 1:10) Onalupi onthiki oyo ankho maihimbika?

Omaovololo omanene alingwa konthele yomaulo Ombimbiliya alekesa okuti “onthiki ya Tatekulu,” yahimbika menima 1914 mononthiki mbetu. Menima olio, omo muamonekele Ovilwa Viotete Viouye Auho. Tunde opo, momanima alandula-ko kukahi nokumoneka ovilwa, nomauvela, nonondyala, novinimawe, novitateka ovikuavo vikahi nokulekesa vali nawa “enyingilikilo” Sesusi apopilile ono apositolu mbae, konthele ‘yokuya’ kwae no ‘yonthyulilo’ youye. (Mateusi 24:3, 7, 8, 14) Onondaka onongwa hono, kambukahi vala nokuiviswa movilongo ankho vituminwa no Loma, mbukahi nokuiviswa mouye auho.

Kononkhono mba Huku Suau apopi etyi ovipuka ovio aviho vilekesa, ati: “Pahe Huku waeta eyovo nepondolo, Nouhamba wa Huku yetu noutumini wa Kilisitu yae.” (Eholololo 12:10) Ouhamba wa Huku keulu, una Sesusi aivisile mouye, owotyotyili.

Ouhamba oo, otyipuka otyiwa ovalongwa va Sesusi vahambukilwa unene. Ovalongwa va Sesusi vapondola okuyumba onthumbi monondaka mba Suau mbati: “Mokonda yotyo hambukwei, ove ulu na vana vakala-ko! Tatiei meheke no melunga, mokonda Eliapu lialauka no ku onwe, lina onyengo onene, tyetyi lityii okuti lina omuvo uhehi.” — Eholololo 12:12.

Sesusi pahe kekahi vali lupumphi kokulio kwa Huku nokukevela. Pahe Ohamba ukahi nokutumina, iya apa katutu mahanye-ko onondyale mbae ambuho. (Ova Hebeleu 10:12, 13) Ovipuka patyi oviwa tukevelela?