Samploran agew kayari insegep nen Jesus ed tawen, nikalbo so masanton espiritu diad agew na Pentecostes, a saya et paneknek a sikatoy talagan wala lad tawen. Tan wala ni kaaruman ya ebidensya. Antis ya tinupak si Esteban lapud matoor ya impantasi to, inkuan to: “Nanenengneng ko ya alukasan so tawen tan akaalagey ed nikawanan na Dios so Anak na too.”​—Gawa 7:56.

Sanen kaiba la nen Jesus ed tawen so Ama to, aalagaren to so sakey ya espisipikon ganggan ya impasakbay na Salita na Dios. Pinuyanan si David a mangisulat: “Imbaga nen Jehova ed Katawan ko [a Jesus]: ‘Yurong ka ed nikawanan ko anggad iyan ko ray kakabusol mo a toonan na saray salim.’” Kayari na panaon na panalagar, sikatoy ‘onlan manuley ed pegley na kakabusol to.’ (Salmo 110:1, 2) Balet antoy gawaen nen Jesus ed tawen legan ton aalagaren so panaon na ikiwas to sumpad kakabusol to?

Niletneg so Kristianon kongregasyon nen Pentecostes 33 C.E. Diad tawen et ginmapoy Jesus a manuley ed saray nilanaan na espiritun disipulo to. (Colosas 1:13) Inwanwan to ra ed panagpulong da tan imparaan to ra ed betang da diad arapen. Antoy magmaliw a betang da? Saramay manmatoor anggad ipapatey et paolien tan manlingkor bilang arari a kaiba nen Jesus diad Panarian.

Say sakey a maabig ya alimbawa na magmaliw ya ari ed arapen et si Saulo, a mas kabat ed Romanon ngaran to a Pablo. Sikatoy sakey a Judio ya abayag lan maseseg ed Ganggan na Dios, balet ta apalikdo na saray Judion lider na relihyon, ya inabobonan to ni ingen ya tupaken si Esteban. Insan, amaarap ed Damasco, a “mamapagyaw ed saray disipulo na Katawan tan labalabay to ran pateyen.” Sikatoy inabuloyan na Atagey a Saserdoten si Caifas ya erelen iray disipulo nen Jesus tan ipawil irad Jerusalem. (Gawa 7:58; 9:1) Balet, legan a walad dalan si Saulo, biglan walay liwawan nanlapud tawen a sinminag ed kaliberliber to tan sikatoy atumba.

Walay nadngel ton boses balet agto nanengneng so mansasalita, a kuan to: “Saulo, Saulo, akin et papasegsegangen mo ak?” Intepet nen Saulo: “Siopa ka, Katawan?” Inyebat to: “Siak si Jesus, a papasegsegangen mo.”​—Gawa 9:4, 5.

Imbaga nen Jesus ed si Saulo ya onlad Damasco tan alagaren toy ibagad sikato a nepeg ton gawaen, balet kaukolan ya itabin paonlad syudad  ta abulag lapud mamilagron liwawa. Wala met so sakey nin pasingawey, a si Jesus et nampanengneng ed si Ananias, sakey ed saray disipulo to a manaayam ed Damasco. Imbaga nen Jesus ed si Ananias ya onlad sakey a lugar pian anapen toy Saulo. Ngalngali agto labay so onla, balet pinaseguroan nen Jesus: “Sayan too et sakey a pananginan a pinilik a mangawit na ngaran ko ed saray nasyon ontan met ed saray arari tan ed saray anak na Israel.” Pinmawil so pakanengneng nen Saulo, tan diad Damasco et ‘impulong ton tampol a si Jesus so Anak na Dios.’​—Gawa 9:15, 20.

Diad tulong nen Jesus, nituloy nen Pablo tan arum nin ebanghelisador so kimey a panagpulong ya inggapo nen Jesus. Benendisyonan ira na Dios kanian inmaligwas a maong so kimey da. Manga 25 taon kayarin nampanengneng si Jesus ed sikato diad dalan a paonlad Damasco, insulat nen Pablo a say maong a balita et “nipulong ed amin a pinalsa diad silong na tawen.”​—Colosas 1:23.

Kayari pigaran taon, inikdan nen Jesus so inad-aro ton apostol a si Juan na nantutumbokan a pasingawey a nabasa ed libro na Biblia ya Apocalipsis. Diad panamegley na sarayan pasingawey, nibagan singa nambilay si Juan pian nanengneng so ipawil nen Jesus bilang manuley ed Panarian. (Juan 21:22) “Diad panamegley na masanton espiritu, niyakar [si Juan] diad agew na Katawan.” (Apocalipsis 1:10) Kapigan itan nagawa?

Diad maalwar a panagaral na saray propesiya ed Biblia, naamtaan a say “agew na Katawan” et ginmapo ed panaon tayo. Nen 1914, agawa so kabkabat ya Sankamundoan a Guerra I. Tan diad tinmumbok iran dekada et wala ni ray guerra, salot, eras, yegyeg, tan arum ni ran ebidensya a talagan nasusumpal la so “tanda” ya inter nen Jesus ed saray apostol to nipaakar ed ‘kiwawala’ to tan say “anggaan.” (Mateo 24:3, 7, 8, 14) Nipupulong la natan so maong a balita na Panarian, aliwa labat ya diad sakop na Empiryo na Roma, noagta diad interon mundo.

Pinuyanan si Juan ya mangibaga no antoy kabaliksan na satan: “Natan et sinmabi lay panangiliktar na Dios tayo, nipatnag lay pakayari to, tan niletneg lay Panarian to tan ginmapo lay pakauley na Kristo to.” (Apocalipsis 12:10) On, say Panarian na Dios ed tawen, a malaknab ya impulong nen Jesus, et talagan tua!

Agaylay abig itan a balita parad amin ya matoor a disipulo nen Jesus. Dugarugad sikara so imbaga nen Juan: “Lapud saya et manliket kayo katawenan tan sikayo ran manaayam ditan! Kasi lay dalin tan say dayat, lapud linmeksab ed sikayo so Diablo, ya agaylay pasnok to, ta amta ton antikey lay panaon to.”​—Apocalipsis 12:12.

Sirin, si Jesus et agla manaalagar ya akayurong ed nikawanan nen Ama to. Sikatoy manuuley la bilang Ari, tan magano to lan paandien so amin a kakabusol to. (Hebreo 10:12, 13) Anto ni ray makapaliket a nagawad arapen?