Dies dia despues ku Hesus a subi na shelu, el a drama spiritu santu riba su disipelnan, dunando asina prueba ku di bèrdat e tabata den shelu. Pero tabatin mas prueba. Por ehèmpel, djis promé ku nan a piedra disipel Esteban pasobra e tabata prediká fielmente, Esteban a sklama: “Ata mi ta mira shelu habrí i e Yu di hende pará na man drechi di Dios!”—Echonan 7:56.

Unabes Hesus tabata den shelu huntu ku su Tata, e mester a warda riba kumplimentu di un otro profesia. Esaki tabata e profesia ku David a ekspresá bou di inspirashon, ku ta bisa: “SEÑOR ta bisa mi Señor [Hesus]: ‘Sinta na mi man drechi, te ora mi hasi bo enemigunan un banki pa bo pianan.’” Ora e periodo di espera ei lo a terminá, Hesus lo a kuminsá “goberná meimei di [su] enemigunan.” (Salmo 110:1, 2) Pero kiko Hesus mester a hasi segun ku e tabata warda e tempu pa e kuminsá tuma akshon kontra su enemigunan?

Wèl, na Pentekòste di aña 33 di promé siglo, e kongregashon kristian a ser formá. Anto, for di shelu, Hesus a kuminsá dirigí su disipelnan ungí ku spiritu. (Kolosensenan 1:13) El a guia nan durante nan trabou di prediká i a prepará nan pa e papel importante ku nan lo mester kumpli kuné den futuro. Ki papel? Wèl, e ungínan ku keda fiel te na morto i ku tempu ser resusitá lo sirbi komo rei den e Reino selestial huntu ku Hesus.

Un di e personanan ku lo sirbi komo rei ta Saulo, kende a bira mas konosí na su nòmber romano, ku ta Pablo. E tabata un hudiu ku pa hopi tempu tabata kumpli zelosamentu ku e Lei di Dios. Ma e lidernan religioso hudiu a siega su mente asina tantu ku el a asta bai di akuerdo pa piedra Esteban. Despues, Saulo, kende a sigui “menasá e disipelnan di Señor i tabata desididu pa kaba ku nan,” a bai Damasko. Sumo Saserdote Kaifas a outoris’é pa arestá e disipelnan di Hesus i trese nan Herúsalèm bèk. (Echonan 7:58; 9:1) Pero ora Saulo tabata riba kaminda pa Damasko, un lus for di shelu a bria rònt di dje i el a kai abou.

Anto un stèm for di shelu a bis’é: “Saulo, Saulo, pakiko bo ta persiguí mi?” Saulo a puntra:  “Ken bo ta, Señor?” E stèm di kuné: “Mi ta Hesus, esun ku bo ta persiguí.”—Echonan 9:4, 5.

Hesus a bisa Saulo pa drenta Damasko i warda mas instrukshon. Ta e hòmbernan ku tabata biaha huntu kuné mester a lei e hiba den e stat, pasobra e lus milagroso a hasié siegu. Anto den un vishon, Hesus a aparesé na Ananías, un di su disipelnan ku tabata biba na Damasko, i a bis’é pa e bai na un sierto kas pa topa ku Saulo. Ma Ananías tabatin miedu di bai. Hesus a sigur’é: “Mi a skohe e hòmber akí pa hiba mi nòmber na e nashonnan, i tambe na reinan i e yunan di Israel.” Saulo a rekobrá su bista, i na Damasko mes el “a kuminsá prediká den snoa ku Hesus ta e Yu di Dios.”—Echonan 9:15, 20.

Ku yudansa di Hesus, tantu Pablo komo otro predikadó a sigui ku e trabou di prediká ku Hesus a kuminsá. Dios a bendishoná nan, i nan tabatin masha éksito. Un 25 aña despues ku Hesus a aparesé na Pablo riba kaminda pa Damasko, Pablo a skirbi ku e bon notisia a ser “prediká na henter e kreashon bou di shelu.”—Kolosensenan 1:23.

Añanan despues, Hesus a duna su apòstel stimá, Huan, un seri di vishon ku nos ta haña den e buki bíbliko Revelashon. Ta mediante e vishonnan akí, Huan a mira kon Hesus lo a bolbe komo Rei. (Huan 21:22) Sí, ‘bou di inspirashon, Huan a haña su mes den e dia di Señor.’ (Revelashon 1:10) Na ki tempu e dia ei lo a kuminsá?

Un estudio profundo di profesia di Beibel ta revelá ku “e dia di Señor” a kuminsá den nos tempu, na 1914, e aña ku mundu a konosé su Promé Guera Mundial. Durante e dékadanan ku a sigui, tabatin mas guera, malesa, hamber, temblor i otro evidensia ku ta mustra ku “e señal” ku Hesus a duna su apòstelnan tokante su “presensia” i e tempu di “fin” ta kumpliendo rònt mundu. (Mateo 24:3, 7, 8, 14) Ademas, e bon notisia di Reino ta ser prediká tur kaminda, no solamente den un teritorio manera tabata e kaso di e imperio romano.

Anto Huan a ser inspirá pa deskribí kiko tur e kosnan ei lo a nifiká. El a bisa: “Nos Dios a trese salbashon pa hende, su poder a keda revelá, su Reino a keda establesé i su Kristu a kuminsá usa su outoridat.” (Revelashon 12:10) Sí, e Reino di Dios ku ta den shelu i ku Hesus a prediká ekstensivamente tokante dje ta un realidat!

Esei ta un maravioso notisia pa tur Hesus su siguidónan leal. Nan ta tuma e siguiente palabranan di Huan na pechu: “Alegrá, shelu, i boso ku ta biba den dje! Ma ai di tera i di laman, ya ku Diabel a baha bini serka boso yen di rabia, pasobra e sa ku a ked’é masha poko tempu.”—Revelashon 12:12.

Pues, Hesus no ta sintá ta warda na man drechi di su Tata mas. E ta reinando komo Rei, i pronto lo e kaba ku tur su enemigunan. (Hebreonan 10:12, 13) Ki desaroyonan emoshonante ta spera nos?