Hanaq pachaman kutikusqanmanta 10 punchaw pasaruptinmi Jesuspa wakin qatiqninkunaqa pentecostes fiestapi chuya espirituta chaskirqaku. Chaymantapas Diosmanta willakusqanrayku rumiwan manaraq chuqapachkaptinkum Esteban nirqa: “¡Qawaychik! Hanaq pachatam qawachkani kicharayachkaqta, runapa churintapas Diospa alliq lawninpi sayachkaqta”, nispa (Hechos 7:56). Chaykunam qawachirqa Jesusqa hanaq pachapiña kasqanta.

Chaywanpas Jesusqa suyananmi karqa huk kaqnin willakuyraq cumplikunanta. Davidmi chuya espiritupa yanapayninwan nirqaña: ‘Jehova Diosmi señorniy [Jesusta] nirqa: “Enemigoykikunata chakikipa sarupakunanta ruwanaykamayá alliqniypi tiyaykuy”’, nispa. Chay tiempo cumplikuruptinmi Diosqa Jesusta ninan karqa enemigonkuna kachkaptinraq kamachinanmanta (Salmo 110:1, 2). Ichaqa, ¿imatam chaykamaqa ruwachkanan karqa?

Pentecostes 33 kaq watapim Jehova Diosqa Jesuspa qatiqninkunata chuya espirituwan akllarqa llaqtanña kanankupaq. Paykunatam Jesusqa hanaq pachamanta kamachiyta qallaykurqa (Colosenses 1:13). Hinaspam yanaparqa Diosmanta willakunankupaq, hinaspapas yachachirqam hanaq pachapi kamachiqña kaspanku imata ruwanankumantapas. Paykunaqa wañukunankukama Diosman sunqu kaspankum Jesuswan kuska kamachiqkuna kananku karqa.

Judio castamanta Saulo sutiyuq runapas akllasqam karqa hanaq pachamanta kamachimunanpaq, payqa Pablo nisqa Roma nacionmanta sutinwanmi riqsisqa karqa. Payqa ñawpaqmantaraqmi Diosta kasukunanpaq anchata kallpanchakurqa. Ichaqa religionkunapi punta apaqkunapa yachachisqan kaspanmi Estebanta wañuchiptinkupas allinpaq hapirqa. Chaymi Jesuspa wakin qatiqninkunatapas wañuchinanpaq sacerdotekunapa kamachiqnin Caifasta nirqa iñiqkunata Damasco llaqtamanta Jerusalenman chaqnasqata pusamunanpaq (Hechos 7:58; 9:1). Ichaqa Damascoman richkaptinmi llumpay achki qunqayllamanta kanchaykuptin pampaman wichiykurqa.

Hinaspam uyarirqa: “Saulo, Saulo, ¿imanasqataq qatikachawachkanki?”, niqta. Payñataqmi nirqa: “¿Pitaq kanki señor?”, nispa. Hinaptinmi nimurqa: “Qatikachawasqayki Jesusmi kani”, nispa (Hechos 9:4, 5).

 Chaymantam Jesusqa Saulota nirqa Damascoman yaykuspan ima ninankuta chaypi suyananpaq. Ichaqa achkiwan ñawsayarusqanraykum hukkuna pusarqaku. Chaymantañataqmi Jesusqa Damascopi kaq qatiqnin Ananiasman musquyninpi hina rikuriykuspan nirqa Saulopa kasqanman rinanpaq. Chayna nisqanwan Ananias mancharikuptinñataqmi Jesus nirqa: “Kay runataqa akllarunim huk law nacionniyuqkunaman, kamachiqkunaman chaynataq Israel runakunaman ñuqapa sutiymanta willakunanpaq”, nispa. Chaynapim Sauloqa kaqmanta qawarikuruspan “Jesusmanta chaylla yachachiyta qallaykurqa ‘Jesusqa Diospa churinmi’, nispan” (Hechos 9:15, 20).

Jesuspa yanapakuyninwanmi Pablowan wakin iñiqkunapas Diosmanta hinalla willakurqaku. Willakuptinkuqa Diosmi bendecirqa, chaymi Damascoman richkaptin Jesus rikuriykusqanmanta yaqa 25 wata pasaruptin Pablo kaynata qillqarqa: “[Diosmantaqa] enteron kay pachapim willakusqaña kachkan”, nispa (Colosenses 1:23).

Watakuna pasaytañataqmi Jesusqa apostol Juanman musquyninpi hina tukuy imata rikuchirqa, chay rikusqanmantam Apocalipsis qillqapi willakun. Juanqa unay watakunam kawsakurqa, hinaspam musquyninpi hina qawarqa Jesusqa kamachiqña kaspan hamusqanta (Juan 21:22). Payqa chuya espiritupa yanapakuyninwan “señorpa punchawninpi” rikurirurqa (Apocalipsis 1:10). ¿Haykapitaq chay punchawqa qallaykurqa?

Bibliapa willakusqankunamanta allinta estudiaspam yachanchik ‘señorpa punchawninqa’ 1914 kaq watapi qallaykusqanmanta. Chay watapim enteron pachapi punta kaq hatun guerra qallaykurqa. Qatiqnin watakunapiñataqmi guerrakuna, unquykuna, muchuykuna, terremotokuna hinaspa tukuy rikchaq mana allinkuna karqa. Chaykunam qawachirqa ‘tukupay punchawkunamanta’ hinaspa Jesuspa ‘chayamunan tiempomanta’ apostolninkunaman willasqan cumplikusqanta (Mateo 24:3, 7, 8, 14). Kunanqa enteron pachapim Diosmanta willakuyqa apakuchkan.

Tukuy chaykunamantam Juanqa Diospa yanapayninwan nirqa: “¡Kunanmi Diosqa runakunata salvaykun, atiyniyuq kasqanpas sutillam kachkan, kamachiytapas qallaykunñam, Cristopas atiynintam servichikuchkanña!”, nispa (Apocalipsis 12:10). Arí, Jesusqa Diospa munaychakuyninpim kamachichkanña.

Chayqa ancha kusikuypaqmi Jesuspa lliw qatiqninkunapaqqa, paykunaqa apostol Juan hinam ninku: “Chayraykuyá, ¡cielokuna kusikuychik, kusikuychiktaqyá chaypi yachaqkunapas! ¡Ay imaynaraq kanqa kay pachawan lamar quchaqa! Diabloqa llumpa-llumpayta piñakuspanmi qamkunaman uraykaramun, payqariki yachakunmi pisi tiempoyuqllaña kasqanta”, nispa (Apocalipsis 12:12).

Jesusqa kamachimuchkanñam, manam taytanpa alliq lawninpichu hinalla suyachkan, ñam chiqniqninkunataqa wañuchinqaña (Hebreos 10:12, 13). Ichaqa, ¿imaraqtaq kanqa hamuq punchawkunapiqa?