Lango bale-oko na peko ti so Jésus akiri na yayu, lo tuku yingo vulu na ndo ti adisciple ti lo na Pentecôte, na ye so afa so lo yeke biani na yayu. Nga, mbeni ye so asi na pekoni afa ni polele. Kete kozo ti tene a bo disciple Étienne na tênë, lo dekongo lo tene: “Ala bâ, mbi bâ yayu azi na Molenge ti zo ayeke luti na koti ti Nzapa.”—Kusala 7:56.

Na ngoi so Jésus asi na yayu kâ na tere ti Babâ ti lo, lo yeke ku ti tene Nzapa amû na lo yanga ti sara mbeni ye. A yeke ye so David atene ni ândo awe, lo tene: “Jéhovah atene na Seigneur ti mbi [Jésus], lo tene: ‘Duti na mbage ti maboko ti mbi ti koli juska mbi zia awato ti mo tongana mbata ti gere ti mo.’” Tongana lo ku ngbii si ngoi ni alingbi awe, lo yeke ‘gue ti sö benda na popo ti awato ti lo.’ (Psaume 110:1, 2). Me, nyen la Jésus ayeke sara na yayu kâ na ngoi so lo ngbâ ti ku ngoi so a yeke mû yanga na lo ti londo na tere ti awato ti lo?

Na Pentecôte ti ngu 33, congrégation ti aChrétien abâ gigi. Jésus angbâ na yayu kâ, me lo komanse ti komande na ndo ti adisciple ti lo so a soro ala na lege ti yingo (aColossien 1:13). Lo yeke fa lege na ala na yâ ti kua ti fango tënë nga lo yeke leke ala ndali ti kua so ayeke ku ala. Kua ni ayeke so wa? Ala so angbâ ande be-ta-zo juska na kuâ, a yeke zingo ande ala, na ala yeke gue ti sara kua na tere ti Jésus, tongana agbia, na yâ ti Royaume ni.

Mbeni kota tapande ti mbeni zo ni so ayeke ga ande gbia ayeke ti Saul, so a hinga lo mingi na iri ti lo ti Romain so ayeke Paul. Lo yeke mbeni Juif so ahinga Ndia ti Nzapa mingi, me amokonzi-nzapa ti aJuif ni asara si lo girisa lege si lo kue lo yeda même ti tene a fâ Étienne. Na pekoni, teti so Saul aye “lakue ti gi ti zia mbeto na bê ti adisciple ti Seigneur”, lo ngbâ lo mû lege ti gue na Damas. Kota Prêtre Caïphe amû yanga na lo ti gbu adisciple ti Jésus, ti ga na ala na Jérusalem (Kusala 7:58; 9:1). Me, na ngoi so Saul ayeke na lege ti guengo ni, mbeni ngangu lumière ti wâ angoro lo, na lo tï na sese.

Mbeni go asara tënë na lo atene: “Saul, Saul, mo yeke sara ye ti ngangu na mbi ngbanga ti nyen?” Saul ni angbâ atene: “Mo yeke zo wa, Seigneur?” Lo tene: “Mbi yeke Jésus, lo so mo yeke sara ye ti ngangu na lo so.—Kusala 9:4, 5.

Jésus angbâ atene na Saul ti gue na Damas ni na ti ku ye so ni yeke hunda na lo ti sara. Me, a gbu maboko ti lo gbungo, ngbanga ti so lumière so asu fade na tere ti lo so avuko lê ti lo. Na mbeni mbage, Jésus asi na Ananias na yâ ti mbeni vision. Ananias ayeke mbeni disciple ti Jésus so alango na Damas. Jésus afa na lo mbeni ndo so a lingbi lo gue dä, na fade lo yeke wara Saul kâ. Me, mbeto ti guengo ni kâ asara Ananias, me Jésus adë bê ti lo atene: “Koli so ayeke mbeni ta so mbi soro ni awe ti mû iri ti mbi ti fa na amara, agbia nga na amolenge ti Israël.” Saul akomanse ti bâ ndo, na gi kâ na Damas ni “lo komanse ti fa tënë ti Jésus na yâ ti asynagogue, lo fa so Jésus si ayeke Molenge ti Nzapa.”—Kusala 9:15, 20.

Na mungo maboko ti Jésus, Paul na ambeni disciple ni amû mbage ti ala mingi na kua ti fango tënë so Jésus akomanse ni lani so. Nzapa airi tënë nzoni na ndo ti kua ti ala ni. Angu 25 tongaso na peko ti so Jésus asi na Paul na lege ti Damas, Paul ni wani asû na mbeti atene a fa nzoni tënë “na création kue so ayeke na gbe ti yayu”.—aColossien 1:23.

Ambeni ngu na pekoni, Jésus afa ambeni molongo ti avision na bazengele Jean so lo ye lo mingi, so a yeke wara ni na yâ ti mbeti ti Apocalypse. Na lege ti avision ni so, Jean angbâ na fini ti tene lo bâ kiringo ti Jésus na yâ ti Royaume ti lo (Jean 21:22). “Na lege ti ngangu ti yingo, [Jean abâ] so [lo] yeke na lâ ti Seigneur.” (Apocalypse 1:10). Ye ni so asi lawa?

Na mandango aprophétie ti Bible nzoni, a ga ti bâ so “lâ ti Seigneur” akomanse na ngoi ti e. Na ngu 1914, Kozo Bira so Amû Sese Kue asungba. Nga, na yâ ti angu so aga na pekoni, gi tënë ti bira la ahon ndo ni, tënë ti kobela, kota nzara, yengingo ti sese nga na ambeni ye nde so afa biani so “fä” so Jésus amû lani na adisciple ti lo, na ndo ti ‘ngoi so lo yeke dä’ nga na ti “ngoi so aye ti ngoi so ayeke gue ti hunzi”, la asi awe so (Matthieu 24:3, 7, 8, 14). A yeke fa nzoni tënë ti Royaume laso mingi, pëpe gi na yâ ti akodro so ayeke na gbe ti Rome, me na ndo ti dunia mobimba.

Jéhovah amû yingo ti lo na Jean ti tene lo fa nda ti ye so: “Fadeso salut, na ngangu, na Royaume ti Nzapa ti e nga na komandema ti Christ ti lo aga tâ ye awe.” (Apocalypse 12:10). Biani, Royaume ti Nzapa so ayeke na yayu, so Jésus afa tënë ni lani mingi so, a yeke tâ ye!

A yeke tâ mbeni nzoni tënë ndali ti adisciple ti Jésus so angbâ be-ta-zo na lo. Ala peut ti zia bê ti ala na tënë ti Jean so, so a tene: “Ndani la, ala duti na ngia, ayayu na ala so ayeke kâ! Mawa na sese nga na ngu-ingo, ngbanga ti so Zabolo adescend na mbage ti ala, lo yeke na kota ngonzo, ndali ti so lo hinga so lo yeke na ngoi mingi ape.”—Apocalypse 12:12.

Na ndembe so, Jésus angbâ gi ti duti ti ku na mbage ti maboko ti Nzapa ti koli ape. Lo komanse ti komande awe, na yâ ti kete ngoi, lo yeke futi awato ti lo kue (aHébreu 10:12, 13). Pendere ye la si ayeke ku e so ape?