Tin dei baka di Yesus go na hemel, a santa yeye ben kon na tapu den disipel fu Yesus na a Pinksterfesa. Disi ben de wan krin buweisi taki Yesus ben de na hemel trutru. Ma moro buweisi ben o kon ete. Syatu fosi den ston Stefanus kiri fu di a tan du a preikiwroko, a bari: „Luku! Mi e si taki hemel opo èn a Manpikin fu libisma e tanapu na Gado en reti-anusei.”​—Tori 7:56.

Gado Wortu e sori taki te Yesus ben o de baka nanga en Papa na hemel, a ben o abi fu wakti fu wan pisi ten fosi a ben o bigin tiri. Gado ben meki David skrifi: „Yehovah taigi mi Masra [Yesus]: ’Sidon na mi reti-anusei, teleki mi poti yu feanti leki wan bangi gi yu futu.’” Baka a pisi ten disi, a ben o ’go na mindri den feanti fu en èn a ben o poti den na en ondro’ (Psalm 110:1, 2). Ma san Yesus ben o du na hemel aladi a ben o wakti teleki a ten doro fu puru den feanti fu en na pasi?

Na a Pinksterfesa fu a yari 33, a Kresten gemeente seti. Yesus di ben de na hemel bigin tiri den salfu disipel fu en na grontapu (Kolosesma 1:13). A ben e tiri a preikiwroko fu den èn a ben e sreka den gi wan frantwortu di den ben o kisi bakaten. San na a frantwortu dati? Den sma di tan dini Gado te na dede ben o kisi wan opobaka èn den ben o tiri leki kownu makandra nanga Yesus na ini a Kownukondre.

Wan fu den sma di ben o tron kownu ben de Saul noso Saulus. Den Romesma ben sabi en leki Paulus. Fu wan langa pisi ten a man disi di ben de wan Dyu ben e horibaka fayafaya gi a Wet fu Gado. Ma den Dyu kerki fesiman ben kori en so te, taki a ben feni en bun taki sma ston Stefanus kiri. Baka dati a teki pasi go na Damaskus fu di „en ati ben e bron ete nanga den disipel fu Masra èn a ben de nomonomo fu kiri den”. Granpriester Kayafas ben gi en primisi fu grabu den disipel fu Yesus èn fu tyari den go baka na Yerusalem (Tori 7:58; 9:1). Ma di Saulus ben na pasi, dan wantronso wan faya fu hemel koti na en lontu èn a fadon na gron.

Ne a yere wan sten e taki: „Saul, Saul, fu san ede yu e frufolgu mi?”, ma a no ben si suma e taki. Saulus aksi: „Masra, suma na yu?” A sten piki en: „Mi na Yesus, di yu e frufolgu.”​—Tori 9:4, 5.

 Yesus taigi Saulus taki a musu go wakti na Damaskus teleki wan sma ben o kon fruteri en san a musu du. Ma na tra sma ben musu tyari en go na a foto fu di a faya di a si ben meki a kon breni. Dan Yesus sori ensrefi na Ananias na ini wan fisyun. Ananias ben de wan fu den disipel di ben e tan na ini Damaskus. Yesus taigi en pe a ben musu go fu feni Saulus. Ananias ben frede fu go, ma Yesus taigi en: „Yu kan go, bika mi teki a man disi fu go fruteri den trakondre sma, den kownu nanga den Israelsma fu a nen fu mi.” Di Saulus ben man si baka, dan leti drape na ini Damaskus „a bigin preiki na ini den snoga taki Yesus na a Manpikin fu Gado”.​—Tori 9:15, 20.

Yesus ben e horibaka gi Paulus nanga den tra preikiman, so taki den ben man go doro nanga a preikiwroko di a bigin du. Gado blesi den èn den ben abi heri bun bakapisi. Sowan 25 yari baka di Yesus sori ensrefi na Paulus di a ben de na pasi fu go na Damaskus, Paulus skrifi taki a bun nyunsu ben „preiki gi ala sma na grontapu.”​—Kolosesma 1:23.

Furu yari baka dati, Yesus meki Yohanes, na apostel di a ben lobi srefisrefi, si den fisyun di skrifi na ini a Bijbel buku Openbaring. Fu taki en leti, di Yohanes si den fisyun disi a ben de neleki a ben e libi na a ten te Yesus ben o kon leki Kownu (Yohanes 21:22). A „santa yeye tyari [Yohanes] go na a dei fu Masra” (Openbaring 1:10). Ma o ten „a dei fu Masra” ben o doro?

Wan finifini ondrosuku fu den profeititori fu Bijbel tyari kon na krin taki „a dei fu Masra” bigin na ini a ten fu wi. Na ini 1914 wan bigi feti bigin na grontapu di sma kari bakaten a Fosi Grontapufeti. Sensi a ten dati moro nanga moro presi na grontapu kisi fu du nanga feti, siki di e kiri ipi-ipi sma, angriten, gronseki nanga tra rampu. A de krin taki den sani disi abi fu du nanga „a marki” di Yesus ben taki fu en. A ben taigi den apostel taki te den si den sani disi e pasa, den musu sabi taki a „kon” èn taki „a kaba fu a grontapu disi de krosibei” (Mateyus 24:3, 7, 8, 14). Na ini a ten disi den bakaman fu Krestes no e preiki a bun nyunsu fu a Kownukondre soso na ini a Gran Kownukondre Rome, ma den e preiki en na heri grontapu.

Gado ben meki Yohanes skrifi san ala den sani disi wani taki. A skrifi: „Luku, a Gado fu wi frulusu sma, a sori a krakti fu en, a Kownukondre fu en seti kaba èn a Krestes fu en bigin tiri kaba” (Openbaring 12:10). Iya, a Kownukondre fu Gado na ini hemel di Yesus preiki fu en na ala sei, na wan trutru sani!

Disi na bun nyunsu gi ala den trutru bakaman fu Yesus. Den kan bribi a sani disi di Yohanes taki: „Fu dati ede prisiri, un hemel èn unu di e libi drape! Ma helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu.”​—Openbaring 12:12.

Sobun, Yesus no e sidon e wakti moro na en Papa reti-anusei. Now a e tiri leki Kownu èn heri esi a o puru ala den feanti fu en na pasi (Hebrewsma 10:12, 13). Sortu moi sani o pasa baka dati?