Pati pajumpha mazuŵa 10 kutuliya po Yesu wangulutiya kuchanya, akusambira ŵaki angulonde mzimu wakupaturika pa zuŵa la Pentekositi. Venivi vingusimikiziya kuti iyu we kuchanya nadi. Penga so ukaboni unyaki wo ungulongo kuti Yesu wenga nadi kuchanya. Pa nyengu yo wakusambira Stefano akhumbanga kumuponya mya ndi kumubaya chifukwa chakuti wapharazganga ukaboni wakukwaskana ndi Yesu, iyu wangukamba kuti: “Awonani! Ndiwona kuti kuchanya kwajulika ndipuso Mwana wa munthu wama kujanja lamaryi laku Chiuta.”—Machitidu 7:56.

Yesu wati waluta kuchanya wangulindizga dankha kuti Awisi amukambiyi vo watenere kuchita mwakukoliyana ndi mo Mazu Ngaku Chiuta ngakukambiya limu. Yehova wangukambiya Davidi kulemba kuti: “Yehova wangukambiya Ambuya [Yesu] kuti: ‘Ja kujanja langu lamaryi mpaka po ndaŵikiya arwani ŵaku kusi kwa maphazi ngaku.’” Nyengu yakulindizga yati yamala, Yesu ‘wanguluta kuchithereska ŵanthu pakati pa arwani ŵaki.’ (Sumu 110:1, 2) Kweni kumbi Yesu wachitanganji kuchanya pa nyengu yo walindizganga kuti wathereski arwani ŵaki?

Pa phwandu la Pentekositi mu  33 C.E., mpingu wachikhristu ungujalikiskika. Yesu we kuchanya, wangwamba kulamuliya akusambira ŵaki akugomezgeka wo angusankhika ndi mzimu wakupaturika. (Akolose 1:13) Iyu waŵalongozganga pa ntchitu yakupharazga kweniso kuŵanozgekereska ntchitu yo atingi azigwirengi kunthazi. Kumbi atingi azigwirengi ntchitu wuli? Akusambira wo atingi ajengi akugomezgeka mpaka nyifwa yawu azamuyuskika kuti akalamuliyi nge mafumu limoza ndi Yesu kuchanya mu Ufumu waki.

Munthu yumoza yo waziŵikanga kuti wamulamuliya limoza ndi Yesu kuchanya ndi Saulo. Iyu waziŵikanga ndi zina la Chiroma lakuti Paulo. Iyu wenga Myuda yo kwa nyengu yitali wajiperekanga ukongwa pakuvwiya Dangu laku Chiuta. Kweni alongozgi achisopa Achiyuda angumulandizga Saulo mpaka wanguzomerezga kuti Stefano wabayiki. Ivi vati vachitika, Saulo wangulutirizga ‘kuwofyeza ndi kubaya akusambira ŵa Ambuya,’ ndipu wanguluta ku Damasiko. Kayafa yo wenga Mura wa Asembi ndiyu wanguzomereza kuti Saulo waluti wakamangi akusambira aku Yesu ndi kuza nawu ku Yerusalemu. (Machitidu 7:58; 9:1) Kweni Saulo we munthowa, wanguwona ukweru wakuŵara ukongwa wo ungumuzunguliya ndipu iyu wanguwiya pasi.

Pavuli paki, Saulo wanguvwa mazu ngo ngaziŵikanga cha ko ngatuliyanga kuti: “Saulo, Saulo, utinditombozgiyanji?” Saulo wangufumba kuti: “Ndimwi  ayani Ambuya?” Iyu wangumuka kuti: “Ndini Yesu yo utimutombozga.”—Machitidu 9:4, 5.

Yesu wangukambiya Saulo kuti waluti mutawuni ya Damasiko ndipu wakalindizgi kuti wamupaski ulongozgi unyaki. Kweni kuti wasere mutawuni yeniyi, pakhumbikanga munthu munyaki kuti wamulongozgi nthowa, chifukwa ukweru wakuziziswa ungumuchitiska kuti waje wachibulumutiya. Pavuli paki, Hananiya wanguwona Yesu muchiwona. Iyu wenga wakusambira waku Yesu yo wajanga ku Damasiko. Yesu wangukambiya Hananiya mo wangayende kuti wakasaniyi Saulo. Hananiya wachitanga mantha kweni Yesu wangumusimikiziya kuti: “Munthu uyu ntchiyaŵi changu chakusankhika kuti chipingiyi zina langu ku ŵanthu amitundu yinyaki, ku mafumu ndipuso kwa Ayisirayeli.” Saulo wangwamba so kuwona ndipu we ku Damasiko kwenuku, “wangwamba kupharazga . . . vakukwaskana ndi Yesu, kuti mwenuyu ndi Mwana waku Chiuta.”—Machitidu 9:15, 20.

Yesu wanguwovya Paulo kweniso ŵanthu anyaki kulutirizga kugwira ntchitu yakupharazga yo iyu wanguyiyambisa. Chiuta wanguŵatumbika ndipu ntchitu yeniyi yayendanga umampha ukongwa. Pati pajumpha vyaka 25 kutuliya po Yesu wanguwoneke Paulo pa nthowa yakuluta ku Damasiko, Paulo wangulemba kuti uthenga wamampha ‘ungupharazgika ku chakulengeka chechosi pacharu chapasi.’—Akolose 1:23.

Pati pajumpha vyaka vinandi, Yesu wangulongo wakutumika Yohane yo wamuyanja ukongwa viwona vakupambanapambana. Viwona venivi visanirika mu Bayibolu mubuku la Chivumbuzi. Mu viwona venivi, Yohane wawonanga Yesu wachilamuliya mu Ufumu. (Yohane 21:22) ‘Mwa mzimu, Yohane wangusanirika kuti we mu zuŵa la Ambuya.’ (Chivumbuzi 1:10) Kumbi zuŵa lenili lingwamba zukwanji?

Kuvwisa umampha mauchimi ngo ngakulembeka mu Bayibolu kungatiwovya kuvwisa kuti “zuŵa la Ambuya” likwamba munyengu yidu yinu. Mu chaka cha 1914, Nkhondu Yakwamba ya Pacharu Chosi yingwamba. Kwambiya ŵaka chaka chenichi, pacharu chapasi pangwamba kuchitika nkhondu zinandi, miliri, nja, vidilirisi kweniso vinthu vinyaki vakulongo kuti “chisimikizu” cha “kuŵapu kwaki” kweniso cha “umaliru,” cho Yesu wangukambiya akusambira ŵaki chifiskika. (Mateyu 24:3, 7, 8, 14) Mazuŵa nganu, uthenga wamampha wa Ufumu upharazgika muchigaŵa cha Ufumu wa Aroma pe cha, kweni pacharu chosi chapasi.

Chiuta wangukambiya Yohane kuti walembi vo vinthu venivi ving’anamuwa. Iyu wangulemba kuti: “Sonu utaski, nthazi, Ufumu waku Chiuta widu ndi mazaza ngaku Khristu waki, vafika.” (Chivumbuzi 12:10) Ufumu waku Chiuta wo Yesu wapharazganga uliku nadi ndipu we kuchanya.

Yeniyi ndi nkhani yakukondwesa ukongwa kwa akusambira wosi akugomezgeka aku Yesu. Yiwu awona kuti mazu ngo Yohane wangulemba ngauneneska. Iyu wanguti: “Pachifukwa chenichi, kondwani yimwi machanya ndi yimwi akuja mwenimo! Soka charu chapasi ndi nyanja, chifukwa Dyaboli wasikiya kwaku yimwi. Iyu we ndi ukali ukulu, pakuziŵa kuti waja ndi kanyengu kamanavi.”—Chivumbuzi 12:12.

Pasonu panu, Yesu wechekulindizga kujanja lamaryi la Awisi cha. Kweni iyu ndi Fumu yo yilamuliya ndipu pambula kuswera watuzgengepu arwani ŵaki wosi. (Aheberi 10:12, 13) Venivi ndi vinthu vamampha ukongwa vo tilindizga!