Nokwakainda mazuba aali kkumi kuzwa ciindi Jesu naakaunka kujulu, ikutilwa kwamuuya uusalala mubuzuba bwa Pentekoste kwakapa bumboni bwakuti lino wakali kujulu. Alimwi bumboni abumbi ibusinizya makani aaya bwakacili kulangilwa kumbele. Kakusyeede ciindi cisyoonto buyo kuti sikwiiya Sitefano apwaigwe mabwe akaambo kakupa bumboni cakusyomeka, wakoompolola kuti: “Amubone! Ndibwene julu lijalukide a Mwanaamuntu kaimvwi kujanza lya Leza lyalulyo.”—Milimo 7:56.

Kali kujulu antoomwe a Bausyi, Jesu wakali kuyoolindila malailile aagaminide aakasinsimwa mu Jwi lya Leza. Kwiinda mukusololelwa amuuya, Davida wakalemba kuti: “Jehova wakaambila Mwami wangu [Jesu] kuti: ‘Kkala kujanza lyangu lyalulyo kusikila mane ndikabikke basinkondonyoko kuba cilyatilo camaulu aako.’” Ciindi cakulindila nocakamana, wakali ‘kuyakuunka kayaabuzunda akati kabasinkondonyina.’ (Intembauzyo 110:1, 2) Pele ino Jesu wakali kunoocita nzi kujulu naakali kulindila kuti cikkwane ciindi cakubweza ntaamu yakulwana basinkondonyina?

Lya Pentekoste 33 C.E., mbungano ya Banakristo yakabambwa. Kali kujulu, Jesu wakatalika kulela naa kweendelezya basikwiiya bakwe bananikidwe amuuya. (Bakolose 1:13) Wakali kubasololela mumulimo wabo wakukambauka akubagwasya kuti balibambile mulimo ngobanoocita kumbele. Mulimo nzi? Aabo ibasyomeka kusikila kulufwu bakali kuyoobusyigwa akubeleka anguwe Jesu kabali bami mu Bwami.

Cikozyanyo citaliboteli camuntu iwakali kuyooba mwami kumbele, ngu Saulo, ooyo uuzyibidwe kapati azina lyakwe lyabu Roma lyakuti Paulo. Wakali mu Juda iwakali musungu kumakani aa Mulawo wa Leza kwaciindi cilamfwu, pele basololi babukombi bwaba Juda bakamupa kusweeka cakuti wakasika mpazuminizya kuti Sitefano apwaigwe mabwe. Lino “kacifwundilide kuyanda kupenzya akujaya basikwiiya ba Mwami,” Saulo wakabweza lweendo lwakuunka ku Damasiko. Wakazumizyigwa a Mupaizi Mupati Kayafa kuti akaange basikwiiya ba Jesu akubaleta ku Jerusalemu. (Milimo 7:58; 9:1) Pele Saulo naakacili munzila, mumuni uutowa wakamumwekela, eelyo wakawida ansi.

Ijwi lizwa kuli yooyo uutalibonyi lyakaamba kuti: “Saulo, Saulo, ino undipenzyela nzi?” Saulo wakabuzya kuti: “Ino nduwe ni, Mwami?” Wakavwiilwa kuti: “Ndime Jesu ooyo ngopenzya.”—Milimo 9:4, 5.

 Jesu wakaambila Saulo kuti aunke mu Damasiko akulindila kupegwa malailile aambi, pele wakasolodwa buya kuunka mu Damasiko nkaambo mumuni ooyo iwakalibonya munzila yamaleele wakamoofwaazya. Mucilengaano cimbi, Jesu wakalibonya kuli Hananiya, umwi wabasikwiiya bakwe iwakali kukkala mu Damasiko. Jesu wakaambila Hananiya kuti aunke kubusena bumwi kuyooyandaula Saulo. Kumatalikilo Hananiya wakali kuyoowa kucita boobo, pele Jesu wakamusyomezya kuti: “Mwaalumi ooyu ncibelesyo ncindasala kuti akaambilizye zina lyangu kuli bamasi akubami alimwi akubana ba Israyeli.” Saulo wakatalika alimwi kubona, alimwi mumonya mu Damasiko ‘wakatalika kukambauka kujatikizya Jesu kuti ooyu Mwana wa Leza.’—Milimo 9:15, 20.

Kwiinda mukugwasyigwa a Jesu, Paulo abakambausi bambi bakazumanana kucita mulimo wakukambauka ngwaakatalisya Jesu. Leza wakabalongezya eelyo bakazwidilila kapati. Nokwakainda myaka iitandila ku 25 kuzwa ciindi Jesu naakalibonya kulinguwe munzila yakuya ku Damasiko, Paulo wakalemba kuti makani mabotu “akakambaukwa kuzilenge zyoonse zili ansi aajulu.”—Bakolose 1:23.

Mukuya kwamyaka, Jesu wakamutondezya zilengaano zili mbozibede Johane imwaapostolo wakwe ngwayandisya, eezyo izilembedwe mubbuku lyamu Bbaibbele lya Ciyubunuzyo. Kwiinda muzilengaano eezyo, nkokuti Johane wakazumanana kupona akulibonena kuboola kwa Jesu mu Bwami. (Johane 21:22) ‘Kwiinda mumuuya Johane wakazyikuba mubuzuba bwa Mwami.’ (Ciyubunuzyo 1:10) Ino eeci cakali kuyoocitika lili?

Ikubulanga-langa cakulomya businsimi bwamu Bbaibbele kutondezya kuti “buzuba bwa Mwami” bwakatalika mumazuba eesu. Mu 1914, nkondo eeyo iyakazyikwiitwa kuti Nkondo Yanyika Yoonse Yakusaanguna yakatalika. Kuzwa ciindi eeco, myaka iyatobela yazwide nkondo, zilwazi, nzala, mizuzumo yanyika, alimwi azintu zimbi izipa bumboni bwakuzuzikizyigwa kwa “citondezyo” Jesu ncaakapa baapostolo bakwe kujatikizya “kubako” kwakwe alimwi “acamamanino.” (Matayo 24:3, 7, 8, 14) Makani mabotu aa Bwami lino ali mukukambaukwa ikutali buyo mubusena ibwakali kweendelezyegwa a Bulelo bwaba Roma, pele munyika yoonse mboizulwa.

Johane wakasololelwa amuuya kupandulula ncocaamba eeci, wakati: “Lino kwaba lufwutuko, nguzu, Bwami bwa Leza wesu alimwi abweendelezi bwa Kristo wakwe.” (Ciyubunuzyo 12:10) Masimpe, Bwami bwa Leza bwakujulu oobo Jesu mbwaakaambilizya koonse-koonse nkobuli lino bulalela!

Aaya makani mabotu kapati kuli basikwiiya ba Jesu boonse ibasyomeka. Balaayeeya lyoonse majwi aa Johane aakuti: “Akaambo kaceeci amusekelele, nywebo nomajulu andinywe nomukkala mulingawo! Maawe kunyika alimwi akulwizi, nkaambo Diabolosi wamuselukila abukali bupati, mbwaanga ulizyi kuti ujisi buyo kaindi kaniini.”—Ciyubunuzyo 12:12.

Aboobo, Jesu tacili kujanza lyalulyo lya Bausyi kakkede kulindila Bwami. Lino ulalela kali Mwami, alimwi lino-lino uyoonyonyoona basinkondonyina boonse. (Bahebrayo 10:12, 13) Aboobo, ino nzintu nzi zitaliboteli nzyotulindila kumbele?