Akxni xtlawamakgo Fiesta xla Pentecostés, akgkaw kilhtamaku alistalh lata Jesús alh kʼakgapun, kamaxkika espíritu santo makgapitsi xtamakgalhtawakgen. Uma limasiyalh pi xla xwi kʼakgapun. Pero ni kajwatiya uma kalimasiyanika. Akxni nina xʼaktalamakgnikan Esteban xlakata xlichuwinama Dios, xla wa: «¡Kaʼakxilhtit! Kakxilha pi talakkinit akgapun chu xKgawasa chixku ya kxpakgastakat Dios» (Hechos 7:56).

Akxni Jesús xtatawilalh xTlat kʼakgapun, xla xlikgalhkgalhit xwanit pi xwanika tuku xlitlawat chuna la xTachuwin Dios xlichuwinanit. Dios matsokgnilh David: «Jehová wanilh kiMalana: “Katawila kkimpakgastakat asta akxni nakkawili mintalamakgasitsin la xlaktay mintantun”». Akxni ksputli uma kilhtamaku, Jehová xʼama wani: «Kapit chu kakatlaja mintalamakgasitsin» (Salmos 110:1, 2). Pero ¿tuku xʼama tlawa asta akxni xchilh uma kilhtamaku?

Congregación xla kstalaninanin Cristo tsukulh kPentecostés kkata 33. Wa xlakata, Jesús tsukulh kamapakgsi lata kʼakgapun xtamakgalhtawakgen nema kalilaksakli espíritu santo (Colosenses 1:13). Kapulalilh la xlichuwinankgolh Dios chu kamasiyanilh tuku xʼamakgo tlawakgo kilhtamaku nema aku xʼama min. ¿Tuku xʼamakgo tlawakgo? Tiku ni xmakgxtakgkgolh Dios maski xnikgolh, xʼamakgo tamapakgsinankgo Jesús akxni xlakastakwanankgolh kʼakgapun.

Akgtum liʼakxilhtit xla chatum tiku xʼama litaxtu mapakgsina kʼakgapun wa Saulo, tiku tlakg lilakgapaskan xtukuwani romano, Pablo. Chatum judío tiku lhuwa liskujnit namakgantaxti xLimapakgsin Dios. Pero xpulalinanin takanajla lu nitlan la stakyawakgolh pi asta katatayalh akxni aktalamakgnikgolh Esteban. Chuntiya kaputsastalanima xtamakgalhtawakgen Jesús chu kamakgniputun. Caifás, xapuxku sacerdote, maxki talakaskin nakachipa kstalaninanin Jesús tiku wilakgo kDamasco chu nakalin kJerusalén (Hechos 7:58; 9:1). Pero akxni ama kDamasco, akgtum xkgakganat litamakgstili Saulo chu xla tamayacha kkatiyatni.

Kgaxmata akgtum tachuwin nema wani: «Saulo, Saulo, ¿tuku xlakata kimputsastalanipat?». Saulo kgalhskininan: «¿Tiku wix Malana?». Xla wa: «Akit Jesús, tiku wix putsastalanipat» (Hechos 9:4, 5).

 Jesús wani Saulo pi katanulh kDamasco chu kakgalhkgalhilh nawanikan tuku natlawa, pero wi tiku xlimakgtayat xlakata uma xkgakganat tlawalh pi nialhla xakxilhli. Kʼatanu talakawan, Jesús tasiyani Ananías, chatum xtamakgalhtawakgen tiku lama kDamasco chu wani pi kaʼalh kʼakgtum chiki xlakata natatanokglha Saulo. Xapulana, Ananías pekuan, pero Jesús wani: «Klaksaknit uma chixku xlakata nakalini kintukuwani kachikinin chu nachuna mapakgsinanin chu xkamanan Israel». Wa xlakata Saulo tlan amakgtum akxilhpara, chu antiya kDamasco tsuku lichuwinan «xpalakata Jesús ksinagogas, pi uma xKgawasa Dios» (Hechos 9:15, 20).

Xpalakata xtamakgtay Jesús Pablo chu amakgapitsi tiku lichuwinankgo Dios chuntiya tlawakgo tuku Jesús malakatsukilh. Chu xlakata xtasikulunalin Dios tlan kakitaxtuni. Akxni xtitaxtunita max puxamakitsis kata lata Jesús tasiyanilh Pablo kxtiji Damasco, Pablo tsokga pi xalakwan tamakatsin xla Tamapakgsin «lichuwinankanit kxlikalanka kakilhtamaku» (Colosenses 1:23).

Titaxtu makgapitsi kata, Jesús wi tuku maʼakxilhni apóstol Juan, tiku tlakg paxki, uma talakawan tlan nalikgalhtawakgayaw klibro xla Apocalipsis. Juan makgas latama chu akxilha makgapitsi talakawan xlakata la nataspita Jesús la chatum Mapakgsina (Juan 21:22). Espíritu santo tlawa pi Juan naʼakxilha «xkilhtamaku Malana» (Apocalipsis 1:10). ¿Tuku kilhtamaku xʼama lakgchan?

Tuku lakputsananikanit xlakata tuku lichuwinankanit pi xʼama lay masiya pi «xkilhtamaku Malana» tsukulh kkata 1914. Kʼuma kata tsukulh xaPulana Guerra xLikalanka Katiyatni. Kata nema titaxtukgonit ananit guerras, tajatat, tatsinksni, tachikinit tiyat chu atanu. Putum uma makgantaxti “tuku xʼama litasiya” tuku Jesús kawanilh xʼapóstoles xlakata akxni “xʼama katatawila” chu «xlisputni kakilhtamaku» (Mateo 24:3, 7, 8, 14). Kkinkilhtamakujkan, xalakwan tamakatsin xla Tamapakgsin ni kajwatiya talichuwinan niku xʼakgchipanankgonit romanos, wata kxlikalanka katiyatni.

Dios matsokgnilh Juan tuku kilhchanima putum uma: «¡La uku kiDioskan mastanita lakgtaxtut, chu xlitliwakga tlan kitaxtunit, chu xTamapakgsin lakkaxwilikanita chu xCristo tsukunita mapakgsinan!» (Apocalipsis 12:10). Chuna, xTamapakgsin Dios nema wi kʼakgapun, nema lichuwinalh Jesús, mapakgsinamaja.

Xlikana pi uma lu tlan tamakatsin xpalakata putum xtamakgalhtawakgen Jesús tiku ni makgxtakgkgo, nema nachuna makgkatsikgo la Juan tiku tsokgli uma: «Wa xlakata, ¡kapaxuwatit, akgapun chu tiku wilatit anta! Pero ¡kgoxota katiyatni chu pupunu! Xlakata Akgskgawini kalakgtaktanitan chu lu sitsinit, xlakata katsi pi nialh lhuwa kilhtamaku kgalhi» (Apocalipsis 12:12).

Wa xlakata Jesús nialhtu kgalhkgalhima kxpakgastakat xTlat. La uku mapakgsinamaja chu nialh makgas nakamalakgsputu xtalamakgasitsin (Hebreos 10:12, 13). Pero ¿tuku nala kilhtamaku nema aku mima nema kaks malakawaninan?