Nuuvira mahiku 10, Yesu oronwe ene wiirimu, okhala wira arummwa yaahivahiwa munepa wootteela nihiku na Pentekoositi, eyo yaahooniherya wira Yesu aari wiirimu. Nave yaahikhala etthu ekina yaarowa okhumelela. Ohinatthi ovonyakasiwa maluku mwaha woolaleerya, mwiixutti Siteefano aahimmye wira: “Nkawehani: miyo kinnona erimu etthukunwene ni Mwana a mutthu emenlene mono wolopwana wa Muluku”.​—Miteko 7:56.

Nuumala ophiya wiirimu, Yesu aamulipelela mpakha wiiraneya ele yaahimmwale vahinatthi ni Nuulumo na Muluku. Uupuxeriwaka ni Muluku, mwene Davidi aahilepa wira: “Apwiya Muluku ahahimerya Apwiy’aka [Yesu] wira: ‘Mukilathi mono aka wolopwana: kinimwakuxa awanan’inyu ekhalé ipottha sanyu’”. Nuumala okathi woolipelela, Yesu aarowa ‘wawerya awanani awe ni waruma’. (Esalimo 110:1, 2) Ori ene wiirimu, Yesu aarowa opakaka exeeni olipelelaka waawerya awanani awe?

Pentekoositi a 33 EC, waahipakiwa muloko wa eKristau. Ori ene wiirimu, Yesu aahipacerya waalamulela awiixutti awe yoottihiwe ni munepa wootteela. (aKolosi 1:13) Nave, aahaalakiherya moota woolaleerya ni aahaalokiherya mwaha wa ele yaarowa aya opakaka muhoolo. Etthu xeeni yaarowa aya opakaka? Arummwa yaarowa ororomeleya mpakha okhwa, yaamuhihimuxiwa wira yakhale mamwene alamulelaka ni Yesu.

Mutthu mmosa aavanhe ntakiheryo wira aarowa okhala mwene, aari Saulo, yoowo aasuweliwa okhala Paulo nsina na oRoma. Owo aari muYuda aaluttuweliwa Nlamulo na Muluku. Masi, owo aahiwokiwa ni ahooleli a itiini ya aYuda yaawo yeemerenrye wira Saulo Siteefano ovonyakasiwe maluku. Okhala wira “khahiya wupuwela walupattha ni wapwetexa awixutti Àpwiya” nto aahirowa oDamaasiko. Saulo eemereriwe ni Kaifa Mukhulupale a Anamukuttho, orowa waavara awiixutti a Yesu ni waaroiha oYerusalemu. (Miteko 7:58; 9:1) Masi, vaavo Saulo eetta awe mphironi, waahikhumelela waarya wuulupale waamutunthe khumorela vathi.

Nsu nimosa nahooneya, naahimwiitthana nriki: “Saulo, Saulo! Munkilupatthela-ni?” Saulo  aahaakhula wira: “Mw’àni nyuwo, Pwiya?” Nsu nne naakhunle wira: “Miyo ka Yesu, yowo munimulupatthanyu!”​—Miteko 9:4, 5.

Nto Yesu aahimuleela Saulo orowa oDamaasiko wira awehereryeke ovahiwa malakiheryo makina. Saulo aahaana ohooliwa maana otutha iwe waahimphwanyiha ohoona. Yowoonihiwa ekina, Yesu aahimukhumelela Ananiya, mwiixutti mukina yoowo aakhala oDamaasiko. Yesu aahimuleela Ananiya wira amphavele Saulo. Okhala wira Ananiya aanoova orowa okumana ni Saulo, Yesu aahimulipiha oriki: “Miyo komuthanla mulopwan’owo wira alaleye nsina naka oholo w’amalapo ni mamwene n’atthu a Isarayeli”. Vaavo Saulo aaphiyale awe oDamaasiko, aahipacerya woona, nto “ahipajerya olaleya mpani mothukumana wira Yesu ti Mwana a Muluku”.​—Miteko 9:15, 20.

Okhaliheriwaka ni Yesu, Paulo ni anamalaleerya akina, yaahivikaniha ovara muteko yoowo Yesu aapacenrye awe. Vano Muluku aahaareeliha, khukhumela saana. Nuuvira iyaakha 25, okhuma vaavale Yesu aamukhumelenle awe Paulo mphironi orowaka oDamaasiko, Paulo aahilepa wira: “khula mutthu vathí-va” aahilaleeriwa ihapari sooreera.​—aKolosi 1:23.

Muhoolo mwaya, Yesu aahimooniherya murummwa awe amphentexa awe, iihaniwa Yohani, itthu siniphwanyaneya eliivuru ya Wisupulula. Sowoonihiwa iye, Yohani aahimoona Yesu olamulelaka Moomweneni. (Yohani 21:22) Nto Yohani aahoonihiwa “nihiku n’Apwiya”. (Wisupulula 1:10) Naapacenrye silini nihiku na Apwiya?

Otokosa saana iprofesia sa Biibiliya, onnooniherya wira “nihiku n’Apwiya”, nipacenrye mahiku ala. Mwaakha wa 1914, yaahikhumelela Ekhotto Yoopacerya ya Olumwenku Wotheene. Nto iyaakha sikina sinittharelana sinnikhumelela ikhotto, iretta, etala, itetere ni itthu sikina, sinooniherya wira “ethonyeryo” Yesu aalenle awe arummwa awe voohimya sa ‘orwa’ ni ‘omala olumwenku’, enniiraneya tthiri. (Matheyo 24:3, 7, 8, 14) Olelo-va, ihapari sooreera sa Omwene sinnilaleiwa ohiya paahi Olamulelo wa oRoma, masi olumwenku wotheene.

Yohani aahuupuxeriwa ohimya yootaphulela aya, oriki: “Vano wophiya wopola n’uwerya n’Omwene wa Muluku ahu n’utokwene wa Kristu awe!” (Wisupulula 12:10) Tthiri, Omwene wa wiirimu, yoowo Yesu ahaareere awe olaleya, ti wekeekhai!

Tthiri iya ihapari sooreera wa awiixutti oororomeleya a Yesu. Nto annivarexexa masu a Yohani ani: “Erimu yothene etteliweke murima, ni nyuwo othene munkhala weiwo! Nto nyuwo, elapo n’iphareya, motakhaliwa, mana Satana òkhuruwela wa nyuwo ananariwene vanjene, okhala wira òsuwela wira orina okathi vakhani pahi”.​—Wisupulula 12:12.

Tivonto, Yesu khokhanle moono woolopwana wa Tiithi awe olipelelaka ovahiwa owerya. Vano Yesu Mwene ni onnilamulela, nto moohipisa onrowa waapwetexa awanani awe otheene. (aHéberi 10:12, 13) Mwekeekhai ninniwehererya itthu soohakalaliha muhoolo.