Napulo ka adlaw katapos sumaka hi Jesus ha langit, iginbubo an baraan nga espiritu durante han Pentekostes. Nagpapamatuod ito nga aadto na hiya ha langit. Ngan magkakaada pa dugang nga pamatuod. Antes batuhon an disipulo nga hi Esteban tungod han iya matinumanon nga pagpamatuod, nagsiring hiya: “Nakikita ko an langit nga naabrihan ngan an Anak han tawo nga natindog ha too han Dios!”—Buhat 7:56.

Samtang kaupod ni Jesus an iya Amay ha langit, naghuhulat hiya hin espisipiko nga sugo nga igintagna ha Pulong han Dios. Hi David gin-giyahan ha pagsurat: “Hi Jehova siniring ngadto ha akon Ginoo [hi Jesus]: Lingkod ikaw dida ha akon too nga kamot, tubtob nga an imo mga kaaway magin paturumban han imo tiil.” Kon matapos na ito nga paghulat, ‘maghahadi hiya butnga han iya mga kaaway.’ (Kami an nag-italiko; Salmo 110:1, 2) Pero ano an bubuhaton ni Jesus ha langit samtang naghuhulat han panahon han iya paggios kontra ha iya mga kaaway?

Han Pentekostes 33 C.E., naestablisar an Kristiano nga kongregasyon. Tikang ha langit, hi Jesus nagtikang pagmando, o paghadi, ha iya mga disipulo nga gindihogan pinaagi han espiritu. (Colosas 1:13) Gin-gigiyahan niya hira ha pagsangyaw ngan igin-aandam ha ira magigin papel ha tidaraon. Ano nga papel? Adton magpapabilin nga matinumanon tubtob ha kamatayon babanhawon ngan makakaupod ni Jesus sugad nga mga hadi han Ginhadian.

Usa han maopay gud nga ehemplo han magigin hadi ha tidaraon amo hi Saul, nga mas kilala ha iya Romano nga ngaran nga Pablo. Judio hiya nga maiha na nga madasigon nga nagtutuman han Balaud han Dios. Pero tumoo gud hiya ha sayop nga katutdoan han Judio nga mga lider han relihiyon, nga tungod hito, inuyon pa ngani hiya nga batuhon hi Esteban. Katapos, hi Saul nga ‘nananarhog ha mga disipulo han Ginoo ngan naruruyag gud nga pamatayon hira’ kumadto ha Damasco. Gintagan hiya hin awtorisasyon han Hitaas nga Saserdote nga hi Caifas basi arestuhon ngan dad-on ha Jerusalem an mga sumurunod ni Jesus. (Buhat 7:58; 9:1) Pero samtang nagbabaktas hi Saul, may lamrag nga sumanag ha iya palibot ngan natumba hiya.

Katapos may nagpakiana pero diri niya nakikita: “Saul, Saul, kay ano nga gintitimaraot mo ako?” Nagpakiana hi Saul: “Hin-o ka, Ginoo?” Ginbaton hiya: “Ako hi Jesus, nga imo gintitimaraot.”—Buhat 9:4, 5.

Ginsidngan ni Jesus hi Saul nga sumulod ha Damasco ngan maghulat hin dugang nga instruksyon, pero kinahanglan hiya tugwayan ngadto ha syudad kay nabuta hiya tungod han milagroso nga lamrag. Katapos, ha usa pa nga bisyon, nagpakita hi Jesus kan Ananias, usa han iya mga disipulo nga naukoy ha Damasco. Ginsidngan niya hi Ananias nga kumadto ha usa nga lugar basi bilngon hi Saul. Nag-alang hi Ananias nga buhaton ito, pero ginpasarig hiya ni Jesus: ‘Ini nga tawo sugad hin surudlan nga akon ginpili nga magdara han akon ngaran ngadto ha mga nasud pati ha mga hadi ngan ha mga anak ni Israel.’ Nakakita utro hi Saul, ngan didto ha Damasco, ‘nagsangyaw hiya mahitungod kan Jesus nga Hiya an Anak han Dios.’—Buhat 9:15, 20.

Ha bulig ni Jesus, iginpadayon ni Pablo ngan han iba pa nga ebanghelisador an pagsangyaw nga gintikangan ni Jesus. Ginbendisyonan hira han Dios salit naglampos gud hira. Mga 25 ka tuig katapos magpakita hi Jesus ha iya ha dalan ngadto ha Damasco, iginsurat ni Pablo nga an maopay nga sumat ‘naisangyaw na ha ngatanan nga hinimo han Dios ha ilarom han langit.’—Colosas 1:23.

Paglabay han katuigan, gintagan ni Jesus an iya hinigugma nga apostol nga hi Juan hin sunod-sunod nga bisyon, nga mababasa ha Biblia ha libro nga Pahayag. Pinaagi hini nga mga bisyon, sugad hin buhi pa hi Juan ngan nakita niya an pagbalik ni Jesus sugad nga magmarando han Ginhadian han Dios. (Juan 21:22) “Pinaagi han baraan nga espiritu gindara [hi Juan] ngadto ha adlaw han Ginoo.” (Pahayag 1:10) San-o ito nga adlaw?

Pinaagi han maopay nga pag-aram han mga tagna ha Biblia, hinbaroan nga an “adlaw han Ginoo” nagtikang ha moderno nga panahon. Hadton 1914, nagtikang an Girra ha Kalibotan I. Ngan han sumunod nga mga dekada, mas nagtikadamu an girra, sakit, gutom, linog, ngan iba pa nga mga ebidensya nga nagpapakita nga natutuman na ha daku nga sukol ‘an tigaman’ nga iginhatag ni Jesus ha iya mga apostol mahitungod han iya “presensya” ngan han “kataposan.” (Mateo 24:3, 7, 8, 14) An pagsangyaw han maopay nga sumat han Ginhadian ginhihimo na yana, diri la ha mga lugar nga sakop han Imperyo han Roma, kondi ha bug-os nga kalibotan.

Gin-giyahan hi Juan nga ihulagway an kahulogan hini: “Yana nahitabo na an katalwasan, ngan an pagpakita han gahum, ngan an kaestablisar han Ginhadian han aton Dios, ngan an paggamit han awtoridad han iya Kristo.” (Pahayag 12:10) Oo, tinuod gud an Ginhadian han Dios ha langit, nga iginsangyaw ni Jesus ha damu hinduro nga tawo.

Makaruruyag gud ito nga sumat para ha ngatanan nga maunungon nga disipulo ni Jesus. Maopay gud nga hinumdoman nira ini nga mga pulong ni Juan: “Magkalipay kamo, kamo nga mga langit ngan kamo nga naukoy dida! Kairo han tuna ngan han dagat, kay an Yawa linusad ha iyo nga may daku nga kasina, kay maaram hiya nga halipot na la an iya panahon.”—Pahayag 12:12.

Salit hi Jesus diri na yana nalingkod ha too han iya Amay ngan naghihinulat. Nagmamando na hiya sugad nga Hadi, ngan diri mag-iiha iya bubungkagon an ngatanan niya nga kaaway. (Hebreo 10:12, 13) Katapos, ano an makalilipay nga mga hitabo nga aton maieksperyensyahan?